Faza e dytë e kampionatit hyn në startin e saj në fundjavën e ardhshme. Në Peqin kanë filluar të mendojnë mirë për përballjen ndaj Bylisit, për të nisur me këmbë të mbarë këtë fazë të dytë. Tashmë për djemtë e Miles i gjithë përqendrimi do të jetë në kampionat pasi ata kanë hequr dorë nga Kupa që në fazën e parë në grupe. Për mesfushorin Kafazi, situata mbetet e varur shumë nga nisja e kësaj faze të dytë, pasi një nisje e mbarë do të mbante lart moralin e ekipin e në rast të kundërt gjithçka mund të komplikohet dhe të marrë rrugë jo të mbarë. Në një prononcim të tij mesfushori Kafazi shprehet:

“Kjo javë që do të nisë do të jetë edhe java anti-Bylis me të cilën do të nisim fazën e dytë. Mendoj se jemi përgatitur me shumë seriozitet për vazhdimësinë e fazës së dytë dhe kjo na bën që të mendojmë tashmë për takimin e rëndësishëm të radhës. Trajneri Mile na ka bërë të qartë që pas një paraqitje të mirë në fazën e parë, është e domosdoshme të fillojmë kampionatin në mënyrën e duhur, për të mos rrezikuar që të përfshihemi në ujra të turbullt drejnt fundit”.
Duke u ndalur tek vlerat e ballshiotëve, Kafazi theksoi: “Bylisi është një kundërshtar që nuk duhet nënvleftësuar, prandaj fitoren nuk duhet ta mendojmë të lehtë. Për ekipin mendoj se vazhdimësia mund të lidhet shumë me këtë ndeshje, por kjo nuk duhet të na ngarkojë psikologjikisht. Këtë fazë të dytë do ta përballojmë sërish me forcat tona dhe padyshim që jemi koshient që gjithçka do të jetë edhe më e vështirë. Por ne do të japim maksimumin që sërisht nëpërmjet ndjenjës së sakrificës dhe mobilizimit të përgjithshëm ta kalojmë me sukses këtë provë të vështirë. Ajo për të cilën mendoj se kemi nevojë më shumë se kurrë është mbështetja e tifozëve tanë. Jo se na ka munguar por këtë herë për ne është e domosdoshme. Nëse e nisim me këmbë të mbarë në këtë ndeshje atëherë kjo do të ndikojë pozitivisht në moralin e ekipit”.

Është mbyllur edhe afati zyrtar i merkatos së lojtarëve dhe për ekipin e Shkumbinit gjithçka mbetet “në vendnumëro”. Sipas drejtuesve teknikë ishte një domosdoshmëri afrimi i të paktën dy lojtarëve në ekip, por, ndonëse ka patur bisedime të shumta, asnjë emër nuk është afruar.

Në fillimin e janarit ka qenë mesfushori Arvis Gjata që është larguar në drejtim të ekipit të Tiranës, dhe kjo ka lënë vendin vakant në rolin e fantazistit në këtë ekip. Në gjithë këto ditë kanë janë lakuar emrat e Gavës, Gramit, apo edhe Roshit, si kandidatë për të qenë pjesë e ekipit të Shkumbinit, por për secilin prej tyre ka patur arsye të ndryshme për të mos arritur marrëveshjen për të qenë pjesë e Shkumbinit.

Por si të mos mjaftonte fakti që Shkumbini nuk ka arritur të marrë asnjë lojtar këtë periudhë, një tjetër lajm i keq vjen edhe nga infermieria. Sulmuesi Dervishi ka patur një tjetër problem në shpatull, një shqetësim i përsëritur për të cilin i është dashur që të kryejë dhe një konsultë mjekësore. Shpatulla e tij ka krijuar një problem shumë serioz dhe sipas vlerësimit mjekësor, kjo mund ta ndalojë lojtarin për afro një muaj që të “prekë” fushën e blertë. Nëse vërtetë lojtarit do t’i duhet një afat i tillë për rikuperim, atëherë i bie që sulmuesi të jetë i gatshëm pas javës së katërt të fazës së dytë. Për më keq, lajmi vjen në një moment kur nuk mund të bëhet asgjë për të mbuluar qoftë edhe provizorisht boshllëkun e krijuar, pa harruar peshën madhore qa ka në skuadër një si Dervishi, që është aktualisht dhe golashënuesi më i mirë i Superiores.

Edhe pak ditë kanë mbetur nga merkatoja e janarit dhe Shkumbini ka të konfirmuar një largim dhe asnjë afrim. Mesfushori Arvist Gjata ka shkuar te Tirana dhe këto ditë është ndjerë nga afër edhe mundësia e largimit të sulmuesit Mustafai me destinacion Skënderbeun. Nga ana tjetër ka pasur disa emra të përfolur për afrim në radhët e peqinasve. i vetmi që është bashkuar me ekipin që prej ditës së mërkurë është mbrojtësi shqiptaro-maqedonas Arjeton Ziba. Qendërmbrojtësi 23-vjeçari ka qenë më parë pjesë e Shkëndijës së Tetovës, Milanit të Kumanovës dhe e Trepçes në Kosovë. Me ekipin e Shkumbinit lojtari ka pasur kontakte që vitin e kaluar, teksa ka zhvilluar një miqësore në radhët e ekipit të Strugës. Përballja ndaj Lushnjës, pasditen e sotme do të jetë një provë për t’u kaluar për lojtarin e më pas pritet që gjithçka të përfundojë në mbrëmje pas bisedimeve me drejtuesit e klubit. Për Zibën, ekipi i Shkumbinit mbetet një urë lidhëse me kampionatin shqiptar ku lojtari shpreson të afirmohet. “Që prej disa ditësh jam duke u stërvitur me Shkumbinit, ku ndihem mjaft mirë, pasi kam gjetur mbështetje nga trajneri, tepër i komunikueshëm”, thotë Ziba. “Kam gjetur deri diku veten në një ekip që është i ndërtuar nga lojtarë të rinj dhe me shumë vullnet. Pasi kam provuar eksperienca në Maqedoni dhe në Kosovë, kam menduar të bëj diçka ndryshe këtu në kampionatin Shqiptar. Prania ime këtu vjen si rrjedhojë e dëshirës që kam për të luajtur në kampionatin tuaj. Shpresoj që të bëj një paraqitje sa më të mirë dhe më pas ta kem këtë eksperiencë për vazhdimësi të mëtejshme në kampionatin Shqiptar. Shpresoj që do të gjej gjuhën e përbashkët me drejtuesit e ekipit për të qenë pjesë e ekipit në vazhdimësi”.

Lushnja – Shkumbini do të luajë sot pasdite takimin e tretë miqësor, kundër Lushnjës. Në dy takimet e mëparshme, peqinasit kanë humbur në fushën e tyre 1-3 me Elbasanin dhe 0-2 në Kavajë me Besën. Gjatë javës së ardhshme mund të kenë edhe një tjetër takim miqësor, në Peqin me Bylisin.

Tifozët e Tomorrit prej kohësh kanë një raport shumë të vështirë me trajnerin actual të skuadrës Memushi dhe nuk ngurrojnë që këtë ta shpresin hapur duke i bërë presion drejtuesve që trajneri i ekipit të jetë Kristaq Mile, i cili sipas tyre për më tepër është beratas. Vetë Mile e komenton me kënaqësi faktin që opinioni e do por shpjegon arsyet pse sipas kjo gjë për momentin nuk mund të realizohet.

A jeni në dijeni të faktit që tifozëria e Beratit ju do në krye të skuadrës?

E di, madje kundrejt meje më shumë se sa një herë tifozët më kanë kërkuar me shumë insistim të ofrohem për vendin e trajnerit. Nuk e mohoj që një gjë e tillë më kënaq dhe që ndihem i vlerësuar. Unë personalisht nuk e kam mohuar ndonjëherë që kam dëshirë të punoj në Berat me skuadrën. Ky ëhstë qyteti im dhe të gjithë do të donin të punonin të qytetin ku kanë lindur. Por…

Por?

Skuadra për momentin e ka një trajner dhe unë e respektoj dhe punën që bëj ai. Mendoj se ai është duke punuar mirë. Unë asnjëherë nuk mund të gjykoj një trajner tjetër aq më tepër që ai është në detyrë e sipër.

Nuk ka asnjë shans që të afroheni?

Sikur të mos mjaftojë respekti që kam për Memushin jam duke bërë një punë të mirë në Peqin që nuk dua ta lë në mes. Kemi marrë një zotim që megjithëse me një skuadër me djem të rinj të qëndrojmë në Superiore dhe dua ta cojmë deri në fund këtë objektiv. Kam raporte shumë të mira me drejtuesit e skuadrës peqinase, me deputetin Sula dhe me kryetarin e Bashkisë dhe bashkë kemi marrë përsipër që të shpëtojmë sezonin. Unë tashmë kam detyrim ndaj tyre dhe ndaj tifozërive peqinas.

A do ktheheni një ditë në Berat?

Patjetër që do rikthehem. Por mos nënvlerësoni një detaj, asnjëherë kryetari i Bashkisë, Nasufi apo ndonjë drejtues tjetër mua kurrë nuk më kanë telefonuar për tu ulur në bisedime. Duhet të ketë faktorë zyrtarë që të më risjellin në berat dhe jo dëshira e tifozëve, pavarësisht sa e rëndësishme është kjo gjë.

Lajmi më i keq i këtyre ditëve për Shkumbinin ka qenë largimi i mundshëm i sulmuesit Mustafai në drejtim të ekipit të Skënderbeut. Ky lajm është publikuar në mediat sportive si nga pala e ekipit por edhe nga lojtari, mirëpo jashtë kësaj marrëveshje ka mbetur klubi peqinas. Për administratorin Isai ky lajm nuk përbën ndonjë risi por fakti që klubi i Shkumbinit është i fundit që dëgjon të thuhet një gjë e tillë, vazhdon ta habisë pa masë. “Në median sportive është folur për një transfertë të mundshme të sulmuesit Mustafai në drejtim të ekipi të Skënderbeut. Për ne nuk është habi, fakti që lojtarët tanë mund të vëzhgohen nga ekipe të tjera. Jemi në periudhë merkatoje dhe për ne synimi i kësaj faze përgatitore ka qenë të përgatitemi për fazën e dytë por edhe të bëjmë ndonjë përforcim. Mirëpo merkatoja jonë më pozitive padyshim që do të ishte ruajtja e kontigjentit që ka pozicionuar Shkumbinin në mesin e artë të klasifikimit. Deri më tani klubi ka gjetur gjuhën e përbashkët në transferimin e mesfushorit Gjata drejt ekipit të Tiranës. Por na ka habitur fakti që nëpër media, sulmuesi Mustafai prezantohet si lojtar i Skënderbeut. Ne nuk do të dëshironim të mbajmë me zor asnjë lojtar por nga ana tjetër, presim mirëkuptim mes palëve për çdo lloj transferimi. Nga ekipi korçar nuk kemi patur asnjë kërkesë zyrtare ndaj për momentin, çështja “Mustafai” mbetet një “transferim në kafene”. Ne nuk dëshirojmë që merkatoja jonë të bëhet nëpër kafene dhe pa asnjë burim të saktë zyrtar. Ne jemi të hapur ndaj çdo oferte për Mustafain, duke shpresuar në gjetjen e kompromisit mes palëve”.

Provat - Pasditja e së mërkurës ishte menduar që ekipi peqinas të zhvillonte një tjetër miqësore në kuadër të përgatitores së janarit. Takimi ishte menduar të zhvillohej ndaj ekipit të Gramshit, në fushën e Peqinit. Por reshjet e shumta që kanë rënë thuajse gjatë gjithë mbrëmjes kanë bërë që ky takim të anulohet dhe të lajmërohen drejtuesit e Gramshit për mosudhëtim në drejtim të Peqinit. Nëse do të ketë ndryshim të motit në ditët në vazhdim kjo ndeshje mund të zhvillohet në fundjavë, me të njëjtin itinerar. Në stërvitjen e së mërkurës në ekipin e Shkumbinit ka qenë i pranishëm dhe një lojtar i huaj. Bëhet fjalë për një lojtar shqiptaro-maqedonas 23-vjeçar. Lojtari luan në qendër të mbrojtjes dhe do të jetë këto ditë nën vëzhgimin e trajnerit Mile dhe stafit të tij. Lojtari ka luajtur në kampionatin maqedonas dhe atë kosovar. Por duket se ky nuk do të jetë lojtari i vetëm i huaj që do të afrohet këto ditë, pasi një tjetër pritet në ditët në vazhdim. Bëhet fjalë për një mesfushor serb i cili mund t’i bashkohet ekipit, ditën e premte.