Doja te kujtoj faktin se që nga java e 4-t e kampionatit kam qenë në krye të listës së golashënuesve dhe kam kryesuar për plot 22 javë kampionat.

Megjithëse kampionati ka përfunduar dhe skuadra e Shkumbinit ka siguruar mbijetesën në elitën e futbollit, në Peqin ka ende diskutime rreth çështjes së trofeut të “Këpucës së Artë”. Sportdashës të shumtë shprehen se sulmuesi Roland Dervishi e meriton plotësisht marrjen e trofeut të golashënuesit më të mirë të kampionatit. Ndërkaq edhe vetë Dervishi argumenton se e meriton këtë çmim.
Dervishi, ka përfunduar një sezon i vështirë për Shkumbinin…
Ka qenë një sezon vërtet i vështirë, por ndër më të bukurit dhe më emocionuesit për skuadrën e Shkumbinit. Ndryshe nga sezonet e mëparshme, risia në këtë kampionat pa dyshim që kanë qenë futbollistët vendës në ekip, të cilët edhe pse të rinj kanë ditur të mbajnë mbi supe peshën e Superligës. Është për t’u vlerësuar edhe puna e stafit teknik, që i ka ndihmuar të rinjtë. Shpresojmë që të kemi një bazë financiare më të plotë, pasi në këtë sezon gjithçka i është falur spontanitetit.
Jeni shpallur golashënuesi i kampionatit, por ka pasur polemika në lidhje me trofeun. Çfarë mendoni për këtë?
Unë që në fillim kam qenë i sinqertë dhe e kam pohuar se nuk e kisha menduar që do të fitoja “Këpucën e Artë”. Por më duhet të kujtoj faktin se që nga java e 4-t e kampionatit kam qenë në krye të listës së golashënuesve dhe kam kryesuar për plot 22 javë kampionat. Ky besoj se është një fakt, që tregon qartë se Dervishi ka qenë pretendentët kryesorë që prej fillimit dhe ky sigurisht që ka qenë një motiv më shumë për mua në fushën e lojës.
Duhet thënë se keni pasur mbështetjen e ekipit…
E vërtetë, në ndeshje të caktuara e gjithë skuadra ka luajtur për mua, pra që unë të realizoja gola dhe për këtë dua t’i falënderoj të gjithë. Nisur nga këto fakte, nuk e kuptoj pse duhet të ketë polemika në lidhje me fitimin e trofeut nga ana ime. Më vjen keq që ende lexoj në lidhje me këtë çështje, pasi nuk jam shpallur golashënues në javën e fundit, por ka qenë një kryesim gjatë gjithë kampionatit.
Fatmir Ahmeti

Personalisht në Peqin që prej fillimit kam gjetur një ambient të ngrohtë futbolldashës, ku jo vetëm shokët e skuadrës, por edhe tifozët më kanë mbështetur shumë.

Tashmë që kampionati ka ulur siparin për Shkumbinin dhe gjithçka ka shkuar në mënyrën e duhur, teksa skuadra ka siguruar qëndrimin në elitën e futbollit shqiptar, futbollistët duket se kanë nisur pushimet. Mirëpo duhet thënë se ata janë në pritje për të kontaktuar sërish me drejtuesit e klubit, jo vetëm për të përmbyllur detyrimet financiare të këtij sezoni, por gjithashtu edhe për të folur lidhur me të ardhmen e tyre. Lojtari i vetëm i huaj që mbylli sezonin me peqinasit, Papa Diop, shprehet se në Peqin ka kaluar një sezon të mirë, duke mos e fshehur dëshirën që ka për të qëndruar sërish. Mirëpo kjo, sipas tij, do të varet edhe nga drejtuesit e klubit. “Kemi përfunduar një sezon mjaft të vështirë, por nga ana tjetër të suksesshëm, pasi me shumë sakrifica kemi arritur që të sigurojmë qëndrimin në Superiore, çka ishte dhe objektivi kryesor i Shkumbinit. Gjatë gjithë kampionatit ne kemi qenë një kundërshtar mjaft dinjitoz përballë çdo skuadre dhe me meritë kemi arritur që të marrim pikë në transfertë, pavarësisht se në përbërje kemi mjaft futbollistë të rinj, por të talentuar”, – thotë Diop, teksa analizon ecurinë e peqinasve gjatë sezonit që sapo u mbyll. Në lidhje me të ardhmen e tij në radhët e Shkumbinit, ai shprehet: “Personalisht në Peqin që prej fillimit kam gjetur një ambient të ngrohtë futbolldashës, ku jo vetëm shokët e skuadrës, por edhe tifozët më kanë mbështetur shumë. Kjo pa dyshim që ka pasur efektin e saj, pasi në fushën e lojës jam munduar që gjithmonë të jap maksimumin tim.

Sa i takon së ardhmes, mendoj se është një çështje që duhet të diskutohet mes meje dhe drejtuesve të klubit, por unë pohoj se dëshira për të qëndruar është edhe për sezonin e ardhshëm. Siç e thashë, janë disa detaje që duhen biseduar me drejtuesit e Shkumbinit, më pas do të vendos për të ardhmen time”, – shton Diop.
Fatmir Ahmeti

Lulzim Resuli

Lojtari i Shkumbinit Roland Dervishi është fituesi i “Këpucës së Artë” të Kategorisë Superiore 2011 – 2012,  me 20 gola në 26 javë,

GOLASHËNUESIT MË TË MIRË TË SEZONIT 2011 / 2012

Nga katër gola për secilën skuadër, Vllaznia dhe Shkumbini kanë dhënë spektakël në fushë, ku më shumë i ka shërbyer goleadorit peqinas, Roland Dervishi, për fitimin e “Këpucës së Artë”.

VLLAZNIA-SHKUMBINI 4-4
GOLAT Gjini 30′, Kruja 75′, Mujeci 80′, Erkoçeviç 89′/ Shenaj 32′, R.Dervishi 78′, 85′ (11-m), 90′+1
VLLAZNIA: Gjokoviç, Smajli (Kruja 46′), Kraja, Sykaj, Belisha (Ujka 71′), Karakaçi, Gocaj, Tafa, Hajdari, Gjini (Erkoçeviç 58′), Mujeci. Trajner: A.Grima
SHKUMBINI: Kotorri, Salliu (Xhyra 44′), Ramazani, Isaji, Pasha, Magani, Sulkja (Magani 72′), Kafazi (Lluca 72′), Shenaj, Dervishi, Diop. Trajner: K.Mile
KARTONË TË VERDHË: Gocaj 67′, Erkoçeviç 90′, Gjokoviç 91′ / Isaji 23′
VËZHGUES: N.Jareci / DELEGAT: H.Hitaj
GJYQTARET: K.Cjapi, I.Tartari, R.Rrapaj (Fier)

MINUTAT
30′ Top i gjatë në zonën peqinase pas shpinës së mbrojtjes mike, Gocaj pason te Gjini që, i gjendur krejtësisht i vetëm në zonë, shënon dhe 1-0.
32′ Top i gjatë nga e djathta në zonën shkodrane, aty ku Shenaj me kokë, i pambuluar nga mbrojtësit shkodranë, e dërgon topin në rrjetë, 1-1.
75′ Krosi nga e majta për Krujën që godet me kokë, pret Kotorri, topi kthehet sërish te Kruja, i cili kësaj here e dërgon drejt e në rrjetë dhe 2-1.
78′ R.Dervishi brenda një minute shfaqet dy herë i vetëm përballë portierit Gjokoviç dhe nëse në rastin e parë pengohet nga portieri, në të dytin shënon duke barazuar shifrat në 2-2.
80′ Mujeci kalon në avantazh Vllazninë. I gjendur i vetëm përballë Kotorrit nuk e ka të vështirë ta mposhtë atë.
85′ Sykaj ndërhyn në mënyrë të parregullt ndaj Dervishit. Për gjyqtarin ka penallti. Gjuan Dervishi, por pret Gjokoviç. Mirëpo, gjyqtari anësor vendos për përsëritjen e 11-metërshit, pasi konstaton vendosje jo të rregullt të portierit. Herën e dytë, sulmuesi peqinas është i saktë dhe barazon shifrat.
89′ Erkoçeviç, i gjendur i vetëm përballë portierit Kotorri, gjuan duke realizuar golin e katërt dhe 4-3.
90′+1 R.Dervishi nuk e ka të vështirë të shënojë golin e barazimit, 4-4.

Grima nuk prononcohet
Nuk është hera e parë që trajneri i Vllaznisë, Armir Grima, nuk prononcohet pas përfundimit të takimit. Edhe dje, pas përfundimit të ndeshjes, në të cilën Vllaznia nuk shkoi më shumë se barazimi ndaj Shkumbinit, ndryshe nga homologu i tij Mile, ai nuk u prononcua në konferencën për shtyp. Ndonëse vetëm pesë javë më parë mori drejtimin e Vllaznisë, Armir Grima nuk mund të bënte dot asgjë, veçse të “blindonte” vendin e gjashtë.

Mile: Nuk e diskutinim mbijetesën
Pas përfundimit të takimit, numri një i pankinës peqinase, Kristaq Mile, në konferencën për shtyp u shpreh mjaft i kënaqur për pikën e marrë ndaj Vllaznisë. Sipas tij, asnjëherë nuk janë ndier në siklet të daljes në “play out”. “Jam shumë i kënaqur me pikën e marrë në ‘Loro Boriçi’ ndaj skuadrës vendëse. Ne na duhej një pikë e tillë që të ishim më të sigurt në pozicionin tonë. Megjithatë, në asnjë moment nuk jemi ndier në siklet të daljes në ‘play-out’. Të vjen keq që shikon stadium me të tillë numër sportdashësish. I uroj suksese në sezonin e ardhshëm ekipit tim, por edhe Vllaznisë”, – ka përfunduar trajneri i Shkumbinit, Mile.

Mbijetesa, shanset e skuadrave në finish

Si shpëton Shkumbini – Peqinasit (27 pikë) duhet të fitojnë me patjetër në Shkodër përballë Vllaznisë, por jo vetëm kaq: skuadra e Kristaq Miles duhet të shpresojë që edhe Apolonia të mund ta ndalë Tomorin, minimalisht në një barazim. Kështu Shkumbini shpëton direkt. Ndërkaq, peqinasit mund të shpëtojnë direkt edhe me një barazim në Shkodër, por gjithnjë nëse edhe Kamza nuk shkon më shumë se një barazim me Tiranën (ose humbet, mjaft që mos fitojë) dhe Tomori humb me Apoloninë. Të tria këto skuadra do shkonin me pikë të barabarta 28 dhe me ndeshjet direkte, Shkumbini do renditej para beratasve, pasi ka fituar 6-2 dhe humbur 1-0 me Tomorin, si dhe ka fituar 3-1 dhe humbur 1- 0 me Kamzën. Ndërkohë, humbja me Vllazninë, natyrisht e detyron Shkumbinin që ta luajë gjithsesi ndeshjen “play-out”, me një nga skuadrat e kreut (3, 4, 5) të Kategorisë së Parë.
Si shpëton Tomori – Beratasit (28 pikë) duhet të fitojnë në Fier për të qenë të sigurt për mbijetesën direkte, pa harruar që përballja është shumë vitale edhe për Apoloninë. Sakaq, nëse Tomori barazon, duhet të shpresojë që edhe Shkumbini apo Kamza të mos marrin më shumë sesa një pikë secila në përballjet që kanë, respektivisht me Vllazninë dhe Tiranën. Ndërsa nëse beratasit humbasin, eliminojnë “play-out”-in vetëm nëse humbasin edhe peqinasit dhe kamzalinjtë, në të kundërt, do jenë të detyruar të luajnë edhe nga një ndeshje shtesë me një nga ekipet e Kategorisë së Parë për të qëndruar në Superiore edhe sezonin tjetër.
Si shpëton Kamza – Kamzalinjtë (27 pikë) duhet të paktën të fitojnë në ndeshjen e fundit ndaj Tiranës dhe përveç kësaj të shpresojnë që Shkumbini të mos fitojë në Shkodër (barazim ose humbje) dhe Tomori të mos fitojë në Fier (barazim ose humbje). Çdo rezultat tjetër do t’i detyronte blutë nga rrethinat e kryeqytetit që të luanin edhe një ndeshje shtesë me një nga ekipet e Kategorisë së Parë. Edhe sikur Tomori të humbë dhe Kamza veçse të barazojë, të dyja skuadrat do kishin pikë të barabarta, por në ndeshjet direkte është skuadra beratase ajo që ka dalë më mirë (ka fituar 4-1, është mundur 2-1 nga kamzalinjtë).
Si shpëton nga rënia Pogradeci – Liqenorët (19 pikë) hë për hë janë të sigurt se nuk i ndahen edhe një ndeshje shtesë, por ata rrezikojnë seriozisht edhe rënien direkt nga kategoria duke qenë se në ndeshjen e fundit do të kenë përballë Skënderbeun. Korçarët nuk mund të tolerojnë as barazimin, pasi në të kundërt mund që të humbin titullin kampion, pikërisht në javën e fundit. Në këtë kontekst, për të luajtur ndeshjen shtesë (pra për të mos rënë nga kategoria) më së pari duhet të fitojnë ndaj Skënderbeut. Në të kundërt, nëse barazojnë, duhet të shpresojnë që Apolonia nuk shkon edhe ajo më shumë sesa një barazim në fushën e vet me Tomorin. Ndërsa nëse Pogradeci humbet, për t’i shpëtuar rënies duhet që edhe Apolonia të humbasë me Tomorin.
Si shpëton nga rënia Apolonia –Fierakët (18 pikë) duhet më së pari të mundin në fushën e tyre Tomorin. Por kjo gjë ndoshta nuk do t’u mjaftonte nëse edhe Pogradeci (teorikisht) do fitonte me Skënderbeun. Edhe nëse Apolonia do barazonte me Tomorin dhe Pogradeci do humbiste me Skënderbeun, çka do të thoshte barazim me pikë nga 19, përsëri do të ishin liqenorët ata që do shkonin në “play-out”, pasi në ndeshjet direkte kanë fituar 2-3 në Fier dhe kanë barazuar 1-1 në Pogradec. Kështu që çdo rezultat tjetër i Apolonisë, përveçse fitorja me Tomorin dhe humbja ose barazimi i Pogradecit me Skënderbeun, do ta rrëzonte direkt nga Kategoria Superiore.

VARIANTET PËR SECILËN SKUADËR
SI SHPËTON TOMORI
Tomori fiton me Apoloninë.
Tomori barazon, por duhet që edhe Shkumbini e Kamza të barazojnë.
Tomori humbet, por duhet që edhe Shkumbini e Kamza të humbin.
SI SHPËTON SHKUMBINI
Shkumbini fiton me Vllazninë dhe Tomori nuk fiton në Fier.
Shkumbini barazon, Kamza barazon dhe Tomori humb me Apoloninë.
SI SHPËTON KAMZA
Kamza fiton me Tiranën, Shkumbini humb ose barazon në Shkodër dhe Tomori humb ose barazon në Fier.
SI SHPËTON POGRADECI
Pogradeci fiton me Skënderbeun dhe luan “play-out”.
Pogradeci barazon dhe Apolonia barazon ose humb me Tomorin.
Pogradeci humb dhe Apolonia humb me Tomorin. Në të tria rastet liqenorët luajnë veçse për “play-out”.
SI SHPËTON APOLONIA
Apolonia fiton dhe Pogradeci barazon ose humb me Skënderbeun.
Çdo rezultat tjetër i Apolonisë, përveç fitores, i rrëzon në Kategori të Parë.

LEONARD KARAJ/panoramasport/ksshkumbini.com

Ai është sulmues, por zë vendin e parë për kartonë. Bëhet fjalë për lojtarin e Shkumbinit, Erjon Mustafaji, i cili është edhe rekordmeni absolut për sa u përket kartonëve. Qendërsulmuesi i peqinasve është ndëshkuar me 9 kartonë të verdhë dhe 2 të kuq në 25 javë kampionat, çka të bën të mendosh, me një llogari të thjeshtë, se në vetëm 4-5 ndeshje ky futbollist nuk e ka parë veten në listën e të ndëshkuarve. Mustafaji është pezulluar të paktën 4 herë nga Disiplina për shkak të kartonëve, duke ndikuar edhe në lojën e skuadrës së tij, pasi trajnerit Kristaq Mile i është dashur t’i bëjë llogaritë pa të në formacion. Pas tij vjen një tjetër lojtar i Shkumbinit, senegalezi Diop si dhe kapiteni i Kamzës, Fatjon Tafaj. Që të dy këta kanë grumbulluar 13 pikë, por me afrikanin që mban një rekord më vete: numrin më të madh të kartonëve të kuq. Diopin në këtë seksion e konkurron vetëm Bici i Skënderbeut, edhe ky me tre kartonë të kuq. Madje mbrojtësi u la për një kohë të gjatë edhe në stol nga trajneri Levi, pikërisht për shkak të kartonëve të shumtë që merrte gjatë ndeshjeve të kësaj skuadre. Më pas renditja vazhdon me Mehmetajn e Apolonisë (në fazën e dytë kaloi tek Elbasani), Shametin e Tomorit dhe kapitenin e Kastriotit, Fatmir Caca. Ndërkohë bie në sy se në këtë listë janë edhe dy kapitenë të tjerë, Kuli (Dinamo) dhe Sina (Tirana), të cilët presupozohet se duhet të ishin më të kujdesshmit dhe më pak të ndëshkueshmit, pasi shihen si liderët e skuadrave të tyre, por kjo aksiomë nuk vlen për dinamovitin dhe mbrojtësin bardheblu. Ndërkaq, rekordmenët aktualë në secilën skuadër janë si më poshtë: tek Apolonia: Ledion Muça (7/1), te Bylisi: Frashëri (5/ 2), Dinamo: Kuli (9/1), Flamurtari: Lena (8/0), Kamza: F.Tafaj (7/2), Kastrioti: Caca (9/1), Laçi: Trajkoviç (7/0), Pogradeci: Çipi (9/ 0), Shkumbini: Mustafaji (9/2), Skënderbeu: Radas (8/0), Teuta: Tairi (7/0), Tirana: Sina (9/0), Tomori: Shameti (6/2) dhe Vllaznia: Smajli (11/0).