Ks Shkumbini Peqin Albania Kampionati Shqiptar i Futbollit Superliga

Pezullohet Lundraxhiu, klubi premton rrogat

polskaAlb — Wed, 22 Feb 2012 14:46:23 +0000

Mbrojtësi i Shkumbinit, Emiliano Lundraxhiu, është pezulluar përkohësisht nga ekipi për shkak të një sherri që ka pasur gjatë procesit stërvitor me mesfushorin Balliu. Vendimi është marrë nga drejtuesit, të cilët i kanë bërë të ditur lojtarit se për t’u rikthyer në skuadër duhet më parë të flasë me trajnerin Mile, që ka munguar në stërvitjen e djeshme. Isaji – Shefi i klubit peqinas, Astrit Isaji, në një prononcim për “Panorama Sport” ka deklaruar se shtyrja e kampionatit për një kohë kaq të gjatë ka ndikuar negativisht te skuadra e tij. “Ndërprerja e kampionatit nuk na shkon shumë për shtat, pasi skuadra kishte marrë ngarkesën e duhur fizike, e cila ishte planifikuar për startin e fazës së dytë. Pra, pauza në këtë kohë mund të bëjë që skuadra të humbasë disi formën, nisur edhe nga fakti që nuk mund të rrezikohen futbollistët duke zhvilluar takime miqësore. Sidoqoftë, ne tashmë jemi të detyruar që të zbatojmë një tjetër program stërvitor. Në fundjavë kemi programuar të luajmë një ndeshje miqësore që lojtarët tanë të mbahen në tonus”, ka thënë Isaji. Në lidhje me pagesat e lojtarëve, shefi i klubit duke përfunduar është shprehur: “Pa dyshim që edhe pagesat e futbollistëve janë pjesë e axhendës së punës sonë dhe shpresojmë që brenda një kohe të shkurtër ata të likuidohen. Kjo besoj se do të bëhet përpara ndeshjes me Apoloninë, në të cilën do të kërkojmë fitoren”.

Kotorri: S’ka ndeshje të lehta, të gjitha si finale

polskaAlb — Tue, 21 Feb 2012 14:47:05 +0000

Pas dy ditëve pushim të akorduara nga drejtuesit e klubit bardhekaltër, Shkumbini ka startuar dje përgatitjet në kuadër të ndeshjes ndaj Apolonisë. Nën drejtimin e trajnerit Kristaq Mile, i gjithë kontingjenti i futbollistëve ka qenë i gatshëm. Në letër duket një përballje jo shumë e vështirë për peqinasit, mirëpo portieri Ervis Kotorri, në një prononcim për “Panorama Sport”, e hedh poshtë këtë ide. Sipas tij, në këtë fazë të dytë nuk ka ndeshje të lehta, përkundrazi. Ato do të jenë të vështira, pasi të gjitha skuadrat kërkojnë të marrin pikë. “Nuk ka absolutisht ndeshje të lehta, siç mund të duken në pamje të parë disa takime. Ne nuk duhet të nisemi asnjëherë nga pozicionet që mbajnë skuadrat në klasifikim, për të përcaktuar fituesin, sepse kjo do të ishte e gabuar. Në sfidën e parë të fazës së dytë jemi ndalur në fushën tonë nga Bylisi, një skuadër e vështirë dhe rivale e drejtpërdrejtë e jona. Ne i kishim bërë llogaritë për fitore, po ja që fati i keq e desh të ndalemi në barazim, duke vërtetuar edhe njëherë se nëse nuk shfrytëzohen rastet që të jepen para portës së kundërshtarit, atëherë rrezikon rezultatin. Kjo sfidë duhet të na shërbejë si mësim për ndeshjet e ardhshme, duke filluar që nga transferta me Apoloninë”, – u shpreh portieri bardhekaltër. Më tej, Kotorri theksoi faktin se fitorja duhet të arrihet nëpërmjet lojës, dhe jo fjalëve. “Në pamje të parë, Apolonia është një skuadër inferiore ndaj nesh, duke parë renditjen e saj në tabelë. Mirëpo, ne e kemi të qartë se çdo skuadër ka vlerat e veta dhe duhet respektuar njëlloj në fushën e blertë. Prandaj dhe Apolonia, që është kundërshtari ynë i radhës, por edhe skuadrat e tjera, duhet të kenë vëmendje ndaj nesh. Në fazën e dytë, të gjitha skuadrat i konsiderojnë sfidat e tyre si finale, kështu që edhe ne duhet të bëjmë të njëjtën gjë nëse duam të realizojmë objektivat tanë”, – shtoi portieri Kotorri.

Mustafaji: Transfertat s’janë tabu për Shkumbinin

polskaAlb — Mon, 20 Feb 2012 19:55:15 +0000

Sulmuesi i Shkumbinit, Erion Mustafaji, i cili ishte edhe autori i golit të barazimit në ndeshjen me Bylisin, është optimist se do të vazhdojnë me rezultatet pozitive edhe këtë fundjavë, ndonëse do të luajnë në transfertë. Sulmuesi bardhekaltër, i cili ishte pranë largimit te Skënderbeu gjatë merkatos, shprehet se tani mendon vetëm të shënojë sa më shumë gola për bardhekaltrit, në mënyrë që të realizohen objektivat që ka klubi. “Faza e dytë nuk ka startuar në mënyrën që e kishim planifikuar, pasi me thënë të drejtën ishim përgatitur për të marrë fitoren. Megjithatë, edhe barazimi nuk mendoj se duhet të konsiderohet si humbje, pasi ishin disa arsye që ne nuk arritëm të fitonim, të cilat dihen tashmë. Personalisht jam ndier mjaft entuziast në lidhje me shënimin e golit, madje gjatë ndeshjes jam përpjekur të shënoj sërish. Po ja që edhe terreni nuk na ka lejuar të zhvillojmë një lojë normale”, ka thënë sulmuesi. Duke vijuar më tej me prononcimin e tij, Mustafaji flet edhe në lidhje me objektivat e skuadrës dhe dëshirën që ka për të realizuar gola me peshë për Shkumbinin. “Objektivi ynë dihet se cili është: të sigurojmë qëndrimin në Superiore para përfundimit të kampionatit. Dhe nëse e realizojmë, mund të pretendojmë edhe vendin e gjashtë në klasifikim. Personalisht, dua të shënoj në çdo ndeshje, pasi kërkoj që skuadra të marrë vetëm rezultate pozitive, pavarësisht se nuk do të jetë aspak e lehtë. Këtë javë luajmë jashtë fushës sonë, por tashmë dihet që transfertat nuk janë më tabu për Shkumbinin. Këtë e kemi vërtetuar edhe me fitoren e arritur në Krujë, duke mposhtur Kastriotin. Të njëjtën gjë do tentojmë edhe në Fier kundër Apolonisë”, ka përfunduar Mustafaji.

Shenaj: Pikët e lëna i rikuperojmë në Fier

polskaAlb — Sat, 18 Feb 2012 16:59:02 +0000

Fejzo Shenaj i qan ende pikët e humbura me Bylisin. Sipas tij, peqinasit meritonin fitoren në këtë përballje. Mesfushori i bardhekaltërve, gjatë një deklarate të dhënë për “Panorama Sport”, shprehet se skuadra e tij ka lënë dy pikë, pasi meritonte fitoren dhe jo barazimin. Megjithatë, gjirokastriti shfaqet optimist për të ardhmen. Madje, beson se në takimin e radhës që bardhekaltrit kanë në Fier kundër Apolonisë, ata do të kenë mundësinë të rikuperojnë pikët e lëna me ballshiotët. “Nuk e kemi nisur ashtu siç duhej fazën e dytë, sepse me thënë të vërtetën ishim përgatitur për të marrë fitoren, por në fakt morëm vetëm një pikë. Po ja që futbolli i tillë është, ndaj duhet t’i pranosh të tria rezultatet. Në fakt, ne kemi zhvilluar lojën tonë dhe në pjesën e dytë kemi dominuar në fushë, por kundërshtari nuk u tregua korrekt dhe vonesat e shumta bënë që të binte ritmi i lojës. Gjithsesi, ajo që më kënaq për momentin është se kundërshtarët tanë, që janë më poshtë nga ne në klasifikim, nuk kanë arritur të marrin rezultate pozitive. Kjo duhet të na shërbejë si një motiv më shumë për të kërkuar fitoren që në sfidën e radhës”, – thotë Shenaj. Më tej, mesfushori gjirokastrit pranon se javën e ardhshme me Apoloninë do të jetë një tjetër sfidë e vështirë për vetë pozitat ku ndodhet kundërshtari i tyre. Mirëpo, ai beson te suksesi në këtë transfertë. “Tashmë nuk na bën më përshtypje fakti se ku luajmë, sepse nëse luan më mirë se kundërshtari mund të fitosh në çdo fushë. Skuadra fierake është e vështirë për t’u kaluar, pa diskutim, por ne do të shkojmë në Fier të bindur për të mos dalë pa pikë, – përfundoi Shenaj.

Dervishi 30-vjeçar, në jubile do “Këpucën e Artë”

polskaAlb — Fri, 17 Feb 2012 16:22:28 +0000

Sulmuesi peqinas i Shkumbinit, Roland Dervishi, ka shënuar deri tani 11 gola, duke qëndruar në krye të golashënuesve të superligës

Dita e djeshme ka qenë disi e veçantë për sulmuesin e Shkumbinit, Roland Dervishi, i cili mbushi 30 vjeç. Në këtë rast, para fillimit të seancës stërvitore, nuk munguan urimet e shumta, por edhe shakatë nga shokët dhe drejtuesit e ekipit, duke i uruar jetë të gjatë dhe sa më shumë gola në kampionat.

Jubileu i 30-të i lindjes e gjen Dervishin si një nga futbollistët më të mirë të ekipit të vet dhe si kryesues prej disa javësh i listës së golashënuesve të kampionatit tonë me 11 gola. Në ndeshjen e fundit me Bylisin në Peqin, që përfundoi 1-1, Dervishi mund të kishte shënuar një tjetër gol, duke e rritur edhe më shumë diferencën me ndjekësin më të afërt dhe me të drejtë ai e quan veten të pafat, sepse në dy raste ishte shumë pranë golit, por pa mundur të realizojë e të gjejë rrugën e rrjetës.

“Gjej rastin rastin t’i falënderoj të gjithë për urimet që më dhanë për ditëlindjen time. Është një përvjetor që do të mbahet mend gjatë nga unë, sepse më gjen më të pjekur dhe me më shumë përvojë si futbollist të Shkumbinit, por më gjen këtë vit edhe si golëshënuesin më të mirë pas 16 javësh kampionat.

Në ndeshjen me Bylisin i pata mundësitë për të shënuar përsëri dhe golin e kërkova jo për vete, por për t’u dhënë më shumë zemër shokëve dhe për ta ndihmuar ekipin në fushën e lojës që të merrte fitoren përballë kundërshtarit. E kam deklaruar dhe me sinqeritet mund të them përsëri se asnjëherë nuk kam menduar të jem në fushë për të shënuar e për të qenë në krye të listës, por gjithmonë kam kërkuar që golat e mi t’i shërbejnë ekipit për të marrë rezultatin e dëshiruar.

Si për mua, ashtu dhe për sulmuesit e tjerë, në ndeshjen e fundit me Bylisin rastet nuk munguan dhe kërkuam ta meritonim fitoren me lojën që zhvilluam, por nga dëshira e madhe, na mungoi qetësia e duhur përpara portës. Nuk duhet harruar që në pjesën e dytë ne e kishim krejt të pamundur të organizoheshim e të sulmonim për mënyrën se si u zhvillua dhe si veproi kundërshtari, duke e ndërprerë ndeshjen.

Në 20 minutat e fundit, kur epërsia jonë ishte e dukshme, u prish gjithçka nga kundërshtari ynë dhe nuk mund të flitej më për futboll, sepse gjithë kohën futbollistët kundërshtarë qëndronin të shtrirë në fushë. Nuk e nisëm si duhet fazën e dytë, sepse janë dy pikë të humbura në fushën tonë, përballë një rivali që e konsideronim të drejtpërdrejtë në të gjitha drejtimet.

Por kjo nuk ka pse të na shqetësojë, pasi Shkumbini do të qëndrojë në mesin e artë të klasifikimit, ndërsa unë shpresoj të marr “Këpucën e Artë” këtë sezon, megjithëse nuk është një fiksim,” – ka përfunduar golashënuesi më i mirë i kampionatit tonë, 30-vjeçari Roland Devishi.

Mesfushori Nastovski, arma plus e peqinasve në Fier

polskaAlb — Fri, 17 Feb 2012 16:12:07 +0000

Shkumbini e nisi fazën e dytë me pak ndryshime në kontingjent, duke u konsideruar kështu si skuadra që ka bërë merkaton më të dobët. Largimi i Arvist Gjatës drejt Tiranës krijoi një boshllëk në repartin e mesit të fushës, duke detyruar drejtuesit që të bëjnë vetëm një afrim. Flasim për blerjen e vetme të peqinasve, maqedonasin Kliment Nastovski, i cili luan pikërisht në rolin e mesfushorit. Mirëpo, duke qenë se forma e tij fizike nuk ishte optimale kur erdhi, trajneri Mile vendosi të mos rrezikojë për ta aktivizuar atë në startin ndaj Bylisit, megjithëse ish-futbollisti i Pogradecit ishte pjesë e 18-shes. Kjo periudhë ndërprerjeje duket se ka ardhur në momentin e duhur për skuadrën e Shkumbinit. Stafi teknik shpreson në rikuperimin e plotë të futbollistëve, të cilët nuk kanë qenë në formën e tyre më të mirë fizike. E njëjta gjë mund të thuhet edhe për maqedonasin e mesfushës, i cili pritet që në takimin e radhës me Apoloninë të debutojë me fanellën bardhekaltër, duke qenë një armë plus për peqinasit në Fier. Mirëpo, dihet që fjala e fundit i takon trajnerit Kristaq Mile, i cili vendos në lidhje me 11-shen që hedh në fushë përpara çdo ndeshjeje.

Shkumbini, shtyrja e kampionatit e favorizon

polskaAlb — Thu, 16 Feb 2012 18:46:18 +0000

Starti i fazës së dytë ka regjistruar një barazim për Shkumbinin, ndonëse luante në fushën e vet. Duhet thënë se në sfidën ndaj Bylisit, dyshja e sulmit Dervishi dhe Mustafaji kanë sakrifikuar në fushën e lojës duke luajtur të dëmtuar. Madje, goleadori peqinas Dervishi, i cili është autori i 11 golave për Shkumbinin në fazën e parë, ka qenë në dyshim deri në minutat e fundit përpara se të luhej ky takim. Shkak për mëdyshjen në aktivizimin e tij është bërë një dëmtim në shpatull që e shqetësonte prej disa ditësh. Megjithatë, sulmuesi ka pranuar të sakrifikojë në këtë përballje duke luajtur për 90 minuta.
Ndërprerja - Shtyrja e kampionatit me një javë duket se i shkon shumë për shtat skuadrës së drejtuar nga trajneri Kristaq Mile në këtë periudhë. Kjo për faktin se stafi drejtues shpreson që të mund të rikuperohen plotësisht nga dëmtimi pikërisht ata futbollistë që kanë pasur probleme në fillim të fazës së dytë. Këto dëmtime i kanë privuar disi futbollistët që në një terren të rrëshqitshëm, në të cilin u zhvillua takimi ndaj Bylisit, të mos shprehnin dot vlerat e tyre më të mira. Mirëpo, përveç rikuperimit të lojtarëve, stafi teknik i bardhekaltërve po mendon që këtë periudhë ta shfrytëzojë edhe për të rregulluar diçka në aspektin difensiv në lojën e skuadrës, në mënyrë që në sfidat e ardhshme gabimet në këtë repart të jenë sa më të vogla. Me gjithë reshjet e shiut të rëna në ditët e fundit, peqinasit nën drejtimin e teknikëve Mile, Dervishi e Ballhysa kanë vijuar punën rregullisht me seancat stërvitore, në kuadër të ndeshjes së radhës ndaj Apolonisë. Ata besojnë se ndonëse do të luajnë në transfertë do të marrin një tjetër rezultat pozitiv, me qëllim që t’i realizojnë synimet e tyre në këtë sezon futbollistik.

KLUBI JONE I KRIJUAR QE ME 1911 ?!?!

polskaAlb — Tue, 14 Feb 2012 19:24:21 +0000

Pas hulumtimeve në arkiva të ndryshme, historianë shqiptarë, kanë arritur të zbulojnë fakte të reja për hapat e para të topkëmbës në Shqipëri. Një turne i viti 1911, zhvilluar në Fier ku merrnin pjesë qytetet: Tiranë, Lushnje, Kavajë, Peqin, Berat, Elbasan, Vlorë dhe Fier. Kampion në këtë turne është shpallur Tirana, sipas gazetës “Zgim e C`qipërisë”, e vitit 1912.

Turneu futbollistik i Panairit të Fierit

Ja çfarë shkruan një gazetë e vitit 1911:

“Në Rahije të Fierit, bëhet një panair i madh. Në këtë panair kishin ardhur nga Tirana, Elbasani, Kavaja, Peqini, e nga vise të tjera. Për të mbledhur të hollat e vendit që ne shitblerësit, katundaria kish shënuar të birë e Mydyrit. Këtu u mblodhën shumë popull, ku me këtë rast u zhvillua dhe një aktivitet sportiv, top`kambe, me skuadra të formuara nga qytetarë e katundarë të ardhur nga këto qytete, gjithsej 8 skuadra, që u ndeshën në këtë lojë të re, për të fituar një shpërblim, e cila kishte një vleftë sa 6 monedha ari ” Nga data 7-14 Prill 1911, në qytetin e Fierit, u zhvillua një turne futbolli, me pjesëmarrjen e 6 skuadrave, të asaj kohe: Tirana, Kavaja, Peqini, Fieri, Lushnja, Berati dhe Vlora. 8 Skuadrat u ndanë në 4 çifte duke u ndeshur me sistemin e eliminimit, me nga një takim. Më pas 4 fitueset, ndeshen në gjysmëfinale dhe më pas në finale. Të gjitha takimet janë luajtur në Fier. Tirana u shpall fituese e turneut në Panairin e Fierit. Kupën dhe çmimin e mori kapiteni i Tiranës, z.Zyber Hallulli”, marrë nga gazeta “Zgim e C`qipërisë”, me drejtor Abdyl Kadri, e datës 21.04.1911, fq.2, art.174.

Pas këtyre fakteve të dala në dritë së fundmi, ngrihet pyetja: A duhet parë dhe rivlerësuar dhe njëherë tjetër historia dhe hapat e para të futbollit shqiptar?!

Çerekfinale: Fier 7-10 Prill 1911

07.04.1911

Tirana – Elbasani 9-4

08.04.1911

Kavaja – Berati 8-2

09.04.1911

Peqini – Vlora 11-3

10.04.1911

Fieri – Lushnja 6-2

Gjysmëfinale

11.04.1911

Tirana – Kavaja 4-0

12.04.1911

Fieri – Peqini 2-16

Finalja, Fier 14 Prill 1911

Tirana – Peqini 6-1

Shkumbini, tifozët duan “dhuratën” e parë

polskaAlb — Fri, 10 Feb 2012 13:10:10 +0000

Fillimi i fazës së dytë është në prag dhe në Peqin janë të shumtë sportdashësit, të cilët po e presin me padurim që ta shikojnë në stadium skuadrën e tyre të zemrës. Fitorja e arritur në fundin e fazës së parë përballë Vllaznisë ka qenë edhe sfida e fundit që kanë ndjekur sportdashësit peqinas. Për fat të mirë, edhe faza e dytë për Shkumbinin do të startojë në shtëpi, kështu që mbështetja e tifozerisë pritet të jetë e madhe. Madje, në rrjetin social “Facebook”, prej kohësh kanë nisur thirrjet që bën tifogrupi “Besnikët”, në drejtim të sportdashësve të tjerë për të qenë sa më të shumtë në mbështetje të Shkumbinit. Në komentet e ndryshme në këtë faqe, vihet re një farë pakënaqësie ndaj mungesës së kryerjes së një merkatoje, e cila mund ta përforconte skuadrën për fazën e dytë. Por, ka mjaft sportdashës, të cilët besojnë se edhe me këtë grup futbollistësh, pjesa më e madhe e të cilëve janë vendës, Shkumbini do të arrijë objektivin kryesor, që është qëndrimi në Kategorinë Superiore. Nastovski – Futbollisti i vetëm i ardhur në radhët e Shkumbinit në këtë merkato, maqedonasi Kliment Nastovski, duket se nuk është ende në formën e tij më të mirë. Mesfushori do ta nisë ndeshjen me Bylisin nga stoli dhe nuk përjashtohet mundësia e aktivizimit të tij në pjesën e dytë. Trajneri Mile e ka thuajse gati 11-tëshen me të cilin do të prezantohet në sfidën e së shtunës. Deri nesër, dilemat duket se do të jenë në repartin e mesit të fushës. Kafazi, Shenaj, Isaji dhe Sulkja pritet ta nisin si titullarë.

Isaj: Na duhen pikët, nuk na interesojnë “hakmarrjet”

polskaAlb — Fri, 10 Feb 2012 13:06:17 +0000

Sekretari i klubit të Shkumbinit, Astrit Isaj, pohon se ekipi peqinas do të mbështetet sërish tek ai grup futbollistësh që mbaruan fazën e parë

Shkumbini – Bylis (nesër 14:00)

Shkumbini: Kotorri, Salliu, Diop, Lundraxhiu, Pashja, Shena, Sulkja, Kafazi, Isaj, Mustafaj, Dervishi.

Bylis: Frashëri, Kelmendi, Ristevski, Adebayo, Idrizi, Popoviç, Kule, Meto, Teqja, Xhafa, Koreshi. Trajner: N. Shensoj.

Bilanci

20 ndeshje (+8 =2 -10. Gol: 26-27)

Fitorja e fundit e Shkumbinit:

4-2, më 24.8.2008

Barazimi i fundit:

1-1, më 28.9.2002

Fitorja e fundit e Bylisit:

5-2, më 10.9.2011

Stadiumi i Peqinit

Ka vuajtur jo pak këtë sezon klubi peqinas, kjo për shkak të financave të dobëta, por të menaxhuara mirë nga klubi, ku nuk bëhet fjalë për mungesë pagash, por vetëm që mungojnë përforcimet cilësore, sidomos në këtë periudhë.

Gjithsesi, ashtu siç e thotë edhe sekretari i klubit të Shkumbinit, Astrit Isaj, ekipi peqinas do të mbështetet sërish tek ai grup që mbylli fazën e parë, tek ata të rinj që madje i tejkaluan parashikimet. Shkumbini nesër do të presë Bylisin, por sipas Isajt, nuk bëhet fjalë për “hakmarrje”, por thjesht për të marrë pikët maksimale…

Si paraqitet situata në klubin bardhekaltër përpara takimit me Bylisin?

Janë marrë të gjitha masat e nevojshme për ta filluar mbarë fazën e dytë. Gjendja e lojtarëve përpara këtij takimi është shumë e mirë. Futbollistët gjatë kësaj kohe kanë marrë ngarkesat e duhura dhe pritet që në takimin e parë të fazës së dytë me Bylisin të shprehen normalisht për ta treguar në fushë punën që kanë bërë. Duke u nisur nga puna që është bërë, jam shumë optimist që Shkumbini do të fitojë.

Shkumbini e ka ruajtur grupin, por gjithçka u mbyll me vetëm një përforcim, atë të Nastovskit. Komenti juaj?

Shumë ekipe dhe drejtues skuadrash kërkojnë të mos e prishin harmoninë e grupit dhe mendoj që Shkumbini është njëri prej tyre. Kjo tregon që ne jemi në rrugë të mbarë, duke besuar te ky grup futbollistësh. Dihet që një ekip në periudhë merkatoje kërkon përforcime dhe si klub jemi përpjekur, por vështirësitë tona dihen.

Nën drejtimin e stafit teknik çdo gjë ka shkuar më se normalisht gjatë fazës përgatitore dhe si një shenjë e mirë për punën e bërë mund të themi që gjatë kësaj periudhe nuk kemi pasur asnjë dëmtim. Duke u nisur nga kushtet konkrete, kemi synuar për këtë sezon ta përfundojmë me sukses kampionatin me të njëjtin grup lojtarësh që e nisëm në fillim.

Faza përgatitore u zhvillua përsëri në Peqin. Mendoni se ajo ka qenë e plotë dhe i ka vlejtur ekipit?

Është zhvilluar më se normalisht dhe sipas të gjitha kërkesave të programit të drejtuesve, pavarësisht nga moti i ftohtë i ditëve të fundit. Në sajë të punës së bërë nga stafi teknik, ditët janë shfrytëzuar duke u stërvitur dy herë në ditë dhe futbollistët e kanë marrë ngarkesën e duhur, duke qenë tani të gatshëm për fazën e dytë.

Gjatë kësaj kohe kemi zhvilluar edhe disa miqësore për të parë edhe më mirë gjendjen e ekipit. Duhet thënë që në këto miqësore, në asnjë takim nuk ka qenë formacioni i plotë i ekipit, sepse pikësynimi ynë në këto takime ishte që të shpërndaheshin sa më mirë ngarkesat sipas planifikimit të bërë nga stafi teknik. Gjatë kësaj jave është punuar me formacionin bazë dhe themi tani që ai është i konsoliduar.

Nesër, përballja e parë me Bylisin. Mendoni që Shkumbini do ta kalojë me sukses kundërshtarin?

Do ta quaja një ndeshje të radhës dhe nuk do ta shihja si një hakmarrje për humbjen e thellë që pësuam në Ballsh. Për ne ishte takimi i parë për shumë lojtarë të rinj që luanin për herë të parë në superiore, por që me kalimin e javëve ditën të përshtateshin dhe të mbanin peshën e ekipit, duke u kthyer në futbollistë të formacionit. Është ndeshje që është vlerësuar dhe prej ekipit kërkohet marrja e fitores për ta nisur mbarë fazën e dytë.