Posts Tagged ‘dinamo-’

Shkëlqim Muça, i fyer nga miqësorja me Dinamon

Friday, August 13th, 2010

Trajneri i Skënderbeut thekson se nuk do të luante kurrë me të rinjtë, nëse blutë do të vinin në Korçë

Skënderbeu humbi minimalisht të mërkurën në miqësoren me Dinamon, humbje që u trumbetua shumë në shtypin sportiv për shkak të pretendimeve që kanë korçarët këtë sezon. Por trajnerin e tyre, Shkëlqim Muçën, i cili shkoi në Korçë pasi shpalli kampione pikërisht Dinamon, e ka mërzitur së tepërmi një fakt tjetër, jo humbja e të tijve.

Ai ka mbetur i befasuar, kur në “Selman Stërmasi” ka parë të rinjtë e Dinamos. Edhe dje, 24 orë pas asaj ndeshjeje, që ishte thjesht një miqësore, trajneri Muça është dukur mjaft i inatosur me veprimin e drejtuesve dinamovitë.

Për “Sportin shqiptar” ai u shpreh: “Në radhë të parë, dua të theksoj se më vjen shumë keq që ndodhi ashtu. Ne udhëtuam drejt Tiranës për të luajtur me titullarët e Dinamos dhe nuk di si ta komentoj veprimin e drejtuesve të kësaj skuadre, të cilët nuk mund t’i detyroja të nxirrnin lojtarët e tyre më të mirë në fushë.

Ne shpenzuam shumë për të shkuar në kryeqytet dhe dëshironim të luanim një ndeshje të barabartë. Kur pashë të rinjtë pa dyshim që u mërzita shumë. Eshtë njësoj sikur Dinamoja të udhëtonte në Korçë dhe unë të nxirrja në fushë një formacion të ri. Nuk do ta bëja kurrë këtë. Gjithsesi, kjo tashmë ka kaluar dhe dua të mendoj për Skënderbeun.”

Pavarësisht humbjes, që erdhi nga një gol i pësuar në minutat shtesë, trajneri Muça nuk duket i shqetësuar: “Jemi në një periudhë, ku ende nuk e kam krijuar idenë përfundimtare për ata që do të jenë titullarë. Për këtë arsye, kam provuar shumë lojtarë dhe them se kemi luajtur mirë. Sigurisht që ka punë për të bërë. Grupi i Skënderbeut është krejt i ri dhe stërvitet bashkë që nga 1 korriku. Nuk mund të japim maksimumin në ndeshjet miqësore.

Thjesht provojmë lojtarët,” – ka thënë dje pasdite nga Durrësi trajneri Shkëlqim Muça. Në fakt, humbja me dinamovitët, edhe pse në miqësore, nuk është pritur mirë nga tifozëria korçare. Megjithatë, Muça dhe të tijtë garantojnë se Skënderbeu i këtij sezoni do të jetë një skuadër e madhe. “Kemi edhe pak kohë deri në startin e sezonit, por dua të them se në ndeshjen e parë do të jemi gati. Në Kavajë do të shihni një Skënderbe vërtet të fortë.

Në miqësoren e fundit kishim edhe disa mungesa, por, sidoqoftë këto ditë do të jenë me ngarkesë të madhe stërvitore. Skënderbeu do të jetë pretendent dhe për këtë nuk ka asnjë dyshim,” përfundon trajneri i Skënderbeut, Muça. Me skuadrën është bashkuar dje mbrojtësi Endri Vrapi, i cili ishte i grumbulluar me kombëtaren.

Korçarët stërviten në Kamzë

Drejtuesit korçarë nuk kanë dashur ta kthejnë skuadrën në qytetin juglindor pas miqësores me Dinamon, ndaj dhe e kanë sistemuar që të mërkurën në mbrëmje në hotel “Tropikal” në Durrës. Ky ka qenë edhe vendimi i trajnerit Muça, kështu që skuadra do të qëndrojë larg Korçës.

Dje pasdite është bërë një seancë stërvitore në Kamzë, ku Skënderbeu do të jetë edhe sot, ndërsa nesër do të luajë në Elbasan miqësoren e radhës. Skënderbeu do të kthehet në Korçë ditën e hënë. Miqësorja me Elbasanin do të jetë e fundit për korçarët, që më pas do të mendojnë vetëm për Besën.

Kthehet Fagu, Lako bashkohet të hënën me grupin

Infermieria e Skënderbeut është drejt boshatisjes. Erbim Fagu, mbrojtësi që ka munguar në dy miqësoret e fundit dhe në stërvitje, është bashkuar dje me grupin. Fagu mendohet të jetë pjesë e formacionit në ndeshjen e parë të kampionatit, pasi e ndien veten të gatshëm. Kurse Lako ka bërë dy ditë më parë rezonancën magnetike në kryeqytet dhe, sipas mjekëve, dëmtimi është i lehtë. Ai do të stërvitet me grupin ditën e hënë.

Vishaj lë përshtypje të mira te Muça

Kosovari Butrint Vishaj, i cili erdhi para tri ditësh te Skënderbeu, ka lënë përshtypje të mira te trajneri Muça gjatë miqësores me Dinamon. “E kam parë me vëmendje Vishajn dhe them se ka bërë një paraqitje të kënaqshme.

Eshtë shumë shpejt për të dhënë një opinion përfundimtar, por paraqitja e tij jep shpresë për qëndrimin e tij te Skënderbeu i sezonit të ri,” – tha trajneri Muça. Ndërsa për sulmuesit Bertrand dhe Kokot, trajneri pohon se do t’i shohë edhe në miqësoren e nesërme.

/sportishqiptar/

separator

Pisha: Dinamo, 4 vite radhazi kampione e Shqipërisë!

Wednesday, August 11th, 2010

Sipas kapitenit Arian Pisha blutë do të vazhdojnë të udhëheqin futbollin shqiptar

Kanë filluar përplasjet mediatike midis kampeve rivale për Superkupën e Shqipërisë. Dekleratës së trajneri Duro se Dinamo do të rivalizojë për vendin e katërt, blutë i përgjigjen me anë të kapitenit të tyre: “Është gabuar gazetari, Duro ka thënë se Dinamo do të jetë 4 vite radhazi kampione e Shqipërisë.” Një humor paksa i hidhur ky i Arian Pishës, i cili lëshon sinjale të forta ndaj Besës, për një luftë të fortë sportive më 15 gusht kur do të luhet Superkupa.

Gjendja e ekipit: Skuadra vjen pas një tjetër faze përgatitore tepër pozitive në Slloveni dhe ndihemi në formë. Kemi zhvilluar një fazë përgatitore për t’u admiruar dhe disa ndeshje miqësore, në të cilat jemi përgatitur shumë mirë.

Kjo fazë na mban akoma më të karikuar për vazhdimësinë e kampionatit.
Humbjet në miqësore: Është e vërtetë që kemi zhvilluar ndeshje të mira, por kemi pësuar gola dhe kemi humbur në dy takimet e para.

Por trajneri ka aktivizuar disa lojtarë të rinj në minutat e fundit, sigurisht nuk duam t’ua faturojmë gjithçka atyre. Formacioni ka disbalanca me lojtarët e pankinës. Na duhen edhe 3 përforcime, që të përballojmë kampionatin e gjatë dhe të lodhshëm që na pret. Grupi aktual është shumë i fortë, ju duhet të prisni edhe pak për të parë se çfarë jemi në gjendje të bëjmë. Mbase mund të jemi më mirë se një vit më parë.

Rivalët: Është mirë që ata të forcohen, sepse rritet edhe bukuria e kampiontit, por në krahun tjetër ne jemi të qetë për forcën tonë dhe nuk lëshojmë pe ndaj rivalëve tanë. Përsa i takon deklaratës të trajnerit Shpëtim Duro, për të cilin kam shumë respekt, mendoj se është një keqkuptim i gazetarit, mendoj se Duro ka deklaruar se Dinamo do të jetë 4 vite radhazi kampione e Shqipërisë (qesh në këto momente). Më vjen keq që dëgjoj për Tiranën shumë gjëra negative. Unë i di problemet e tyre.

Një derbi pa Tiranën nuk vlen. Me largimin e Devi Mukës kjo skuadër nuk mund të jetë e njejtë. Ai ishte një lider te Tirana. Gjithsesi, ato janë punët e tyre dhe pak na interesojnë. Ne shikojmë më shumë punën tonë.

Kombëtarja: Nuk më vjen keq që nuk jam pjesë e kombëtares, për moshën që kam. Po të isha më i ri do të kërkoja të isha me ngulm pjesë e saj, por tani them se jam i përqendruar vetëm te Dinamo, një klub elite në Shqipëri.

Trajneri Blanko: Trajneri Luiz Blanko duhet thënë se është tepër i komunikueshëm me ne. Është i mrekullueshëm dhe më vjen keq që dicka që bën një trajner i huaj se bëjnë trajnerët shqiptarë. Mbase ata që kanë qenë më parë në krye të stolit dinamovitë nuk janë treguar kaq të hapur me ne lojtarët, Blanko është i vecantë për të krijuar frymën e grupit,”- mbyll prononcimin e tij kapiteni i Dinamos, Arian Pisha.

Gilman Lika, në kontakte me Dinamon

Mesfushori i kombëtares së Shqipërisë, Gilman Lika mund të jetë afrimi më i afërt i Dinamos në merkaton mbetur të tregut veror të futbollit. Drejtuesit dinamovitë kanë nisur kontaktet me lojtarin në fjalë për ta afruar në radhët e tyre, por ende palët nuk janë vendosur për të gjetur gjuhën e përbashkët. Gilman Lika, aktualisht është i grumbulluar me kombëtaren e Shqipërisë për ndeshjen ndaj Uzbekistanit, por shumë shpejt ai mund të bashkohet me skuadrën kampione të Shqipërisë.

/sportishqiptar/

separator

Putinçanin: Mos na vlerësoni nga miqësoret austriake

Friday, August 6th, 2010

Sipas futbollistit Marko Putinçanin, dinamovitët do të jenë elita e kampionatit 2010 2011

Marko Putinçanin është një nga futbollistët e huaj më cilësorë në radhët e dinamovitëve. Serbi i mbërritur në fillim të sezonit 2009 2010 në radhët e kampionëve të Shqipërisë, tashmë është një futbollist bazë i Dinamos, për më tepër ai mund të aktivizohet si në rolin e mbrojtësit të djathtë, por edhe në qendër të mesfushës.

Gjatë një prononcimi për “Sportin shqiptar”, nr.21 i Dinamos analizon ndeshjet miqësore, të cilat, sipas tij, nuk duhet të konsiderohen nga rezultati, por nga vlerat që shfaq skuadra e Dinamos në fushën e blertë. “Stërvitja këtu në Slloveni është shumë e mirë. Kushtet janë optimale, pasi kjo nuk është një risi për ne. Jemi njohur më parë me komoditetin që të jep Maribori. Besoj se kur të kthehemi në Tiranë do të jemi të gatshëm jo vetëm për Superkupën e datës 15 ndaj Besës, por edhe për kampionatin e gjatë e të lodhshëm që na pret.

Sigurisht që kërkojmë në fillim trofeun e Superkupës, por duhet të djersitim për të arritur atë. Ndërkohë, ne nuk mund të analizojmë blerjet e kundërshtarëve, por shikojmë vetëm llogaritë tona. Të jeni të sigurt që, sado që skuadrat e tjera të fuqizohen, Dinamo do të jetë sërish “lokomotiva” e kampionatit. Flitet për një ekip elite dhe cilësitë në gjirin tonë janë tepër pozitive kur flitet për lojtarë me bagazh të lartë teknik dhe me eksperiencë.

Kemi zhvilluar disa ndeshje miqësore këtu, por të një nivele shumë të lartë. Por gjendja jonë fizike ka qenë e kënaqshme. Ndaj Palermos dhe Sociedadit mendoj se janë teste pozitive, pavarësisht humbjeve, mendoj se Dinamo s’mund të gjykohet nga miqësoret. Në të dyja ndeshjet kemi luajtur shumë mirë në pjesët e para.

Shpresoj që Dinamo të jetë sërish kampione e Shqipërisë. Duhet të luajmë mirë dhe të vazhdojmë të fitojmë nga ndeshja në ndeshje në fillimin e kampionatit, por edhe gjatë tij, duke e mbyllur sërish si kampionë të Shqipërisë. E kam thënë 100 herë që nga ardhja ime në Shqipëri që pozicioni im ideal është ai i mesfushorit të qendrës, por edhe në krahun e djathtë. Por nuk më pëlqen të luaj si mbrojtës i djathtë dhe shpresoj që këtë sezon ta luaj si mesfushor,”- shprehet futbollisti serb Marko Putinçanin, i cili gjatë sezonit 2009-2010 në kampionat me Dinamon ka selektuar 1941 minuta në 23 takime.

Mbrojtësi nuk stërvitet me skuadrën

Pasi është konsultuar me stafin mjekësor dhe trajnerin Luiz Blanko, futbollisti serb i Dinamos, Marko Putinçanin, nuk është stërvitur me skuadrën në seancën e vetme gjatë pasdites. Nr.21 i bluve ka pësuar një dëmtim të lehtë pas një goditjeje të marrë në ndeshjen miqësore me Real Sociedadin, por sipas Markos nuk është asgjë serioze: “Kam marrë një goditje në këmbë ndaj Real Sociedadit, por nuk është asgjë e rëndësishme. Sërish sot do të jem me ekipin në stërvitjen e ditës së premte.”

Dinamovitët, pazar në Maribor

Pas një ndeshjeje të lodhshme miqësore ndaj Real Sociedadit të mërkurën dhe të enjten paradite, blutë kanë dalë shëtitje në pazaret e qytetit të Mariborit. Kampingu i stërvitjes ndodhet në një nga kodrat e qytetit slloven dhe blutë kanë udhëtuar për disa minuta për të bërë “shoping” me rroba dhe aksesorë të ndryshëm në Slloveni.

Ndërkohë, flitet se pas ndeshjes dinamovitët kanë marrë një pagesë apo premio. Nuk dihet nëse kjo pagesë është një këst i vjetër i nga kampionati, apo ndonjë shpërblim i prapambetur nga ndeshjet e fundit. Gjithsesi, pasi kanë ngrohur mirë xhepat, dinamovitët kanë mbushur trastat me veshmbathje dhe gjëra të tjera të nevojshme dhe janë kthyer sërish në rezidencën e tyre në kampingun stërvitor.

/sportishqiptar/

separator

Dinamo “hap portën” në fund ndaj Sociedadit

Thursday, August 5th, 2010

Blutë pësojnë 3 gola në 5 minuta, kjo ishte edhe historia e kësaj miqësoreje luksi

Nuk është e thënë që një skuadër shqiptare të arrijë qoftë edhe në një miqesore luksi fitore për të ngrohur sadopak zemrat e sportdashësve shqiptarë. Kështu ka ndodhur edhe dje me Dinamon, kampionen e Shqipërisë, e cila është shkërmoqur për 5 minuta përballë spanjollëve të Real Sociedadit. Në fillimin e takimit bardhekaltrit spanjollë kanë kaluar në avantazh me anë të Lorentes, i cili merr një kros të bukur nga Xabi Petro dhe me kokë shënon, duke kaluar R. Sociedadin në avantazh.

Por është Martinena në minutën e 12-të që përfiton nga një hutim i mbrojtjes spanjolle dhe barazon shifrat për Dinamon. Pjesa e parë është më e mirë për blutë shqiptarë, pasi edhe kondicioni fizik është më lartë për kampionët e Shqipërisë, të cilët e kanë nisur me kohë përgatitoren e tyre.

Ndërkohë, spanjollët javë vetëm në hapat e para dhe ndaj Dinamos luanin miqësoren e dytë që nga startimi i fazës përgatitore. Pjesa e dytë nis pozitive për blutë, teksa Muzaka në minutën e 73-të kalon Dinamon në avantazh.

Është Bakaj që kroson për nr.17 të bluve, i cili kalon kampionët e Shqipërisë në avantazh. Kur mendohej se po arrihej një rezultat pozitiv në një miqësore të lakmuar, Dinamo pëson 3 gola për 5 minuta. Por duhet thënë se këto gola kanë ardhur, pasi dinamovitët kanë kryer disa zëvendësime në formacionin e tyre.

Në minutën e 82-të është Agirretxe që barazon shifrat dhe 2 minuta në vonë vjen dhe goli i avantazhit me autor Vigueran. Por për të vulosur të gjithë takimin në shifrat 4 2 do të mendojë sërish Agirretxe, i cili pasi merr një asist nga Viguera shënon.

Kështu dinamovitët e kanë mbyllur pa shumë histori edhe miqësoren e dytë në program gjatë fazës së dytë në Slloveni. 8 gola në dy takime flasin më tepër se niveli që disponojnë skuadrat shqiptare. Real Sociedad është një ekip i sapongritur në Premiera Divizion, pasi në kampionatin e fundit spanjollët në fjalë janë shpallur kampion të kategorisë së parë në Spanjë.

Duke filluar që sot, dinamovitët do ta nisin stërvitjen në kampingun e Mariborit në Slloveni. Ndërkohë që miqësorja e fundit për blutë gjatë qëndrimit atje do të jetë përballë portugezëve të Nacional Madieras.

Blutë marrin vlerësime në Austri

Çdo e keqe e ka edhe një të mirë, pasi pavarësisht humbjes së djeshme në Austri përballë Real Sociedadit, shumë lojtarë të Dinamos kanë marrë vlerësime nga specialistë vendës të futbollit. Sipas drejtuesve teknikë të Dinamos, Elis Bakaj, Gjergji Muzaka, Nestor Martiena, Arian Pisha, Emiliano Vila dhe Isli Hidi janë pëlqyer nga autoritet e futbollit austriak. Të paktën blutë e kanë një anë pozitive për t’u ngushëlluar pas humbjes në shifrat 4-2.

Vetëm zv.presidenti Braçe pranë skuadrës

Flitej se drejt Austrisë do të udhëtonte e gjithë presidenca dinamovite, por pranë skuadrës ka qenë vetëm zv.presidenti Avni Braçe, i cili ka ndjekur nga afër takimin e djeshëm ndaj Real Sociedadit. Dinamo nga ana tjetër vazhdon merkaton e saj dhe duket se goditje e radhës në merkato mund të jetë Klodian Duro, një nga mesfushorët më me autoritet të Shqipërisë. Por edhe Dorian Bylykbashi është në kontakte të vazhdueshme me Dinamon.

Dinamovitët, 8 me 2 në miqësoret austriake

Dinamo ka pësuar 8 gola në dy ndeshjet miqësore gjatë qëndrimit në Austri, 4 ndaj Palermos më 1 gusht dhe 4 ndaj Real Sociedadit dje. Golaverazhi total është 2-8 në miqësoret e fazës së dytë përgatitore. Ndërkohë që në sfidën e fundit blutë kanë pësuar 3 gola për 5 minuta. Një mesatara e dobët për një mbrojtje elitare, ku sado i fortë të jetë niveli i kundërshtarit, rezistenca mund të jetë më e gjatë nga ana e dinamovitëve. Tashmë blutë bëhen gati për sfidën e fundit miqësore gjatë qëndrimit në Slloveni përballë Nacional Madieras.

/sportishqiptar/

separator

Bakaj: Superkupa, “qershia mbi tortë” për Dinamon

Wednesday, August 4th, 2010

Sulmuesi Elis Bakaj e konsideron të rëndësishme përballjen me Besën, më 15 gusht

Dinamo, kampione e Shqipërisë, do të kërkojë një tjetër trofe më 15 gusht përballë Besës në finalen e Superkupës. Dhe për të lëshuar një sinjal të sigurt, që blutë do të jenë tepër kërkues ndaj kavajasve, është sulmuesi i Dinamos, Elis Bakaj, shënues i 15 golave në kampionatin e fundit kombëtar.

Sipas nr.19 të kampionëve, blutë do ta vlerësojë në maksimum këtë trofe. Bakaj aktualisht ndodhet me skuadrën në Slloveni, ku Dinamo po zhvillon sërish një përgatitore, e cila do të jetë edhe themeli i kampionatit 2010 2011.

Superkupa

“Do të jetë një sfidë tepër e vështirë për ne, pasi Besa, pavarësisht largimeve nga skuadra, ka afruar në gjirin e saj lojtarë tepër kualitativë.

Ne e vlerësojmë maksimalisht këtë trofe, pasi do të jetë edhe “qershia mbi tortë” për Dinamon pas titullit kampion të fituar gjatë sezonit të kaluar. Është e vërtetë që ia kemi marrë dorën Besës, duke fituar 3 sfidat e fundit në kampionat, por tashmë është një ndeshje e re, me një histori tjetër. Personalisht e dëshiroj këtë trofe, por jam i bindur që edhe shokët e skuadrës vlerësojnë maksimalisht këtë kupë.

Nuk e di cili është motivimi i rivalëve tanë, por sigurisht ju garantoj se ai i Dinamos do të jetë maksimal. Tifozët duhet të na mbështesin në këtë takim, kjo është detyra e tyre, ndërkohë që detyra jonë është të fitojmë ndeshjen, duke u dhuruar një tjetër kënaqësi fansëve tanë.”

Përgatitorja

“Është një moment ku sërish po marrim mbingarkesë në muskujt tanë, por kësaj radhe është me e lehtë këtu në Maribor, pasi e kemi kryer më parë një fazë përgatitore dhe arritja e ritmeve të duhura është më e lehtë për ne. Kushtet këtu janë optimale dhe po punojmë të qetë.

Sigurisht, kjo përgatitore do të na shërbejë gjatë në kampionat, pasi ky kompeticion ka një specifikë të veçantë, që zgjat shumë dhe gjatë të gjithë kohës duhet të jesh i përgatitur për çdo situatë. Trajneri Blanko dhe stafi i tij po punojnë në mënyrë voluminoze me ne, me dy seanca stërvitore në ditë.”

E ardhmja

“Nuk dua të flas më për të ardhmen. Mund të kesh talentin më të madh, por është e vështirë që nga kampionati shqiptar të kalosh menjëherë në një tjetër kampionat me shumë nivel. Edhe në provën tek Hanoveri unë e kam shpjeguar në gazetën tuaj se si qëndronin punët. Në mos gaboj, edhe kapiteni Lala, me sa kam informacion, e ka pohuar diçka të tillë këto ditë.

Shumë njerëz, përpara se të nxitohen në konkluzione për disa gjëra që s’i kanë parë me sytë e tyre, do të ishte më mirë të tregohenin më të matur. Gjithsesi, s’më prishin punë këto aspekte. Unë dua të përqendrohem tek stërvitja, të jap maksimumin për Dinamon, më pas të tjerat si të jetë e shkruar,”- citon 23-vjeçari Elis Bakaj.

Dinamo ruan ritmet në stërvitje

Skuadra e Dinamos edhe dje, ashtu si ditën e henë, në kompleksin sportiv në Maribor, ka zhvilluar 2 seanca stërvitore. Paradite blutë kanë punuar në palestër, ndërkohë që pasdite, në orën 18:30, kampionët kanë punuar në aspektin taktik në kuadër të sfidës së sotme përballë spanjollëve të Real Sociedadit. Grupi i dinamovitëve është i plotë dhe pritet që blutë të bëjnë një paraqitje të mirë përballë spanjollëve.

Presidenca, sot në Austri për miqësoren

Drejtuesit më të lartë të Dinamos do të udhëtojnë sot drejt Austrisë për të ndjekur miqësoren ndaj Real Sociedadit. Blutë do të përballen sot ndaj skuadrës spanjolle dhe duket se presidenca dinamovite kërkon të futet sërish në merkato dhe pistat serbe është më e mundshmja për momentin. Kjo është miqësorja e dytë për blutë që nga mbërritja në Slloveni, pasi më parë dinamovitët janë mundur 4-0 nga skuadra italiane Palermo.

/sportishqiptar/

separator

Blanko: Palermo, provë për të gjithë

Tuesday, August 3rd, 2010

Sipas Luiz Blankos, humbja me Palermon nuk ka pse t’i shqetësojë

Dinamo është mposhtur thellë në miqësoren e luksit përballë Palermos, por një fakt i tillë nuk e shqetëson stafin blu. Dikush mendon se Palermo ka një tjetër nivel dhe s’mund të krahasohet me skuadrat shqiptare. Ndërkohë, futbollistë të tjerë nga kampi dinamovit janë të bindur se me pak këmbëngulje rezultati s’do të ishte në shifrat 4-0 në favor të kundërshtarit. Gjithsesi, nga ana e tij, i mërzitur nga rezultati i thellë, trajneri argjentinas i Dinamos ka pohuar pas ndeshjes Palermo Dinamo 4 0 se i pa të gjithë lojtarët që ka në dispozicion në një ndeshje të vërtetë, duke krijuar edhe përshtypjet e duhura profesionale për secilin.

“Një ndeshje e këtij lloji, si ndaj Palermos, ishte test i vërtetë për të gjithë lojtarët e mi. Natyrisht, edhe për mua, sepse pashë në veprim të gjithë grupin, si ata që konsiderohen titullarët e Dinamos, por edhe të tjerët, që e nisin sezonin e ri nga stoli, por me ambicie për më shumë. Minutat në dispozicion të gjithsecilit ishin të mjaftueshme, për të më dhënë të kuptoj se deri ku kemi arritur, si në aspektin individual, ashtu dhe kolektiv. Humbja me një skuadër si Palermo, që luan në Seria A, nuk është shqetësuese, edhe pse skuadra ime nuk arriti të kapte dot ritmin e kundërshtarit. Megjithatë, u luftua fort, me shpirt, çka e ktheu këtë miqësore në një sfidë të vërtetë,”- ka nënvizuar Luis Blanko.

/sportishqiptar/

separator

Miqësorja e luksit: Palermo mund 4-0 Dinamon tonë kampione!

Sunday, August 1st, 2010

PALERMO-DINAMO 4-0 (1-0)
Shënues:
Migliaccio 5’, 78’, Hernandez 63’, Bovo 82’
PALERMO (4-3-1-2): Benussi (Brichetto 45’); Goian (Bovo 27’), Glik (Cappelletti 72’), Cassani (Darmian 55’), Garcia (Balzaretti 55’); Migliaccio (Acquah 82’) Liverani (Guana 57’), Nocerino (Cristofari 84’), Kasami (Pastore 55’); Succi (Hernandez 55’), Maccarone (Nappello 68’). Trajner: Delio Rossi
DINAMO (4-2-3-1): Hidi (Hoxha 62’), Xhafa, Pisha, Malakarne, Peqini (Daja 71’), Vila (Soza 63’), Garcia, Muzaka (Sefa 62’), Punticanin (Imami 81’), Bakaj (Berdufi 71’), Martinena (Sekseni 71’). Trajner: Luis Blanco
Gjyqtarë: T.Obwurzer, H.Dorfer, A.Stossier (Austri)
Kartonë të verdhë: Peqini 13´

Palermo ka mundur pastër, 4-0, në një ndeshje miqësore luksi, të luajtur të dielën, kampionen tonë, Dinamo. Një ndeshje, e cila ka rregjistruar edhe një dëmtim të rëndë të njërit prej lojtarëve të skuadrës italiane të Seria A, të rumunit Goian. Moment që ka vënë në panik të djya skuadrat, pasi të bërtiturat e lojtarit në fjalë, nga dhimbjet, kanë qenë lemeritëse. Aq sa është nxjerrë menjëherë me barrelë nga fusha dhe është dërguar me urgjencë në spital. Mbrojtësi i Palermos, gjatë një dyluftimi me sulmuesin dinamovit, Bakaj, ka zënë keq këmbën në terrenin jo të mirë të fushës ku u luajt miqësorja dhe ka nxjerrë kaviljen. Pikërisht në minutën e 27-të të ndeshjes, kur italianët udhëhiqnin me rezultatin 1-0, shënuar qysh herët, në minutën e 5-të. Me këtë rezultat, por me një panik në radhët e të dyja skuadrave, si pasojë e vuajtjeve dhe të bërtiturave therëse të rumunit, të dëmtuar, është mbyllur pjesa e parë. Në të dytën kanë filluar edhe zëvendësimet e shumta të të dy trajnerëve, për të eksperimentuar lojtarët në role dhe taktika të ndryshme. Skuadra italiane e Seria A, e drejtuar nga trajneri Dellio Rosi, ka realizuar edhe tre gola në pjesën e dytë, ndërkohë që e ka shndërruar në “tabelë qitjeje” kuadratin e mbrojtur nga Isli Hidi, në fillim, pastaj i zëvendësuar nga Alban Hoxha, duke e mbyllur tërë miqësoren me fitoren poker, 4-0 për Palermon.
Kjo ndeshje është luajtur në “Arena Jacques Lemans”, në Sankt Veit të Austrisë, në një kohë që të dyja skuadrat po zhvillojnë fazat e tyre përgatitore, Palermo në Austri, ndërsa Dinamo në shtetin fqinj, në Slloveni. Në fund është marrë vesh se pas lëndimit në miqësoren me Dinamon, Dorin Goian, lojtari rumun i Palermos, do të jetë i detyruar të humbasë ndeshjen miqësore, që kombëtarja e tij, Rumania, do të luajë kundër Turqisë, në Stamboll, më 11 gusht.
Në fund të miqësores, trajneri italian, Dellio Rosi, ka analizuar: “Ishte një garë shumë fizike, me disa dyluftime që i kalonin caqet, sikur të ishte një ndeshje zyrtare a finale, ndaj edhe do t’i paguajmë pasojat, pasi numri 3 i yni, Dorin Goian, ka pësuar një dëmtim të rëndë. Lëndimet, veçanërisht ato me origjinë traumatike, janë të frikshme për këdo lojtar, ndaj jam shumë i shqetësuar për Goian. Vendosa të zhvilloj këtë miqësore për t’u kalitur mendërisht si skuadër, për të qenë të gatshëm të përballemi edhe me skuadra nga vende të tjera, jashtë Italisë. Miqësoren paraardhëse e kishim luajtur me serbët e Belgrade, ndërsa e vijuam programin tonë me kampionët e Shqipërisë, të cilët po zhvillonin edhe ata përgatitjet për sezonin e ri.”
Nga ana e tij, i mërzitur nga rezultati i thellë, trajneri argjentinas i Dinamos ka pohuar se i pa të gjithë lojtarët që ka në dispozicion në një ndeshje të vërtetë, duke krijuar edhe përshtypjet e duhura profesionale për secilin. “Një ndeshje e këtij lloji, si ndaj Palermos, ishte test i vërtetë për të gjithë lojtarët e mi. Natyrisht, edhe për mua, sepse pashë në veprim të gjithë grupin, si ata që konsiderohen titullarët e Dinamos, por edhe të tjerët, që e nisin sezonin e ri nga stoli, por me ambicie për më shumë. Minutat në dispozicion të gjithsecilit ishin të mjaftueshme, për të më dhënë mua të kuptoj se deri ku kemi arritur, si në aspektin individual, ashtu edhe kolektiv. Humbja me një skuadër si Palermo, që luan në Seria A, nuk është shqetësuese, edhe pse skuadra ime nuk arriti të kapte dot ritmin e kundërshtarit. Megjithatë, u luftua fort, me shpirt, cka e ktheu këtë miqësore në një sfidë të vërtetë,” – ka nënvizuar Luis Blanko.

Miqësorja e luksit: Palermo mund 4-0 Dinamon tonë kampione!

separator

Soza: Si gjithnjë, ia lëmë fushës llogaritë

Sunday, August 1st, 2010

Dinamovitët do të luajnë në 8 ditë, 3 ndeshje miqësore, një risi për ekipet shqiptare
Blutë, më shumë miqësore se stërvitje

Miqësoret
1 gusht Palermo – Dinamo
4 gusht R.Sociedat – Dinamo
7 gusht N.Madiera – Dinamo

Dinamo është nisur dje, në orën 13:00, drejt Sllovenisë për të zhvilluar fazën përgatitore në Maribor. Pasi janë akomoduar në kompleksin sportiv, blutë kanë zhvilluar gjatë pasdites stërvitjen e parë në tokën e shtetit fqinj. Në programin e qëndrimin 8-ditor në Slloveni, blutë kanë programuar 3 takime miqësore. Më datën 1 dinamovitët do të përballen me ekipin e Serisë A, Palermo. Ndërkohë që data 4 do t’i vendosë të besuarit e Blankos të matin forcat me spanjollët e Real Sociedatit. Ndërkohë që sfida e fundit më 7 gusht do të jetë përballë portugezëve të Nacional Madieras. Është tepër unikale për një skuadër shqiptare që në një javë të zhvillojë 3 takime miqësore, ku koha për stërvitje do të jetë më e reduktuar për kampionët e Shqipërisë. Gjithsesi, tashmë blutë e konsiderojnë veten një ekip elite dhe si të tillë nuk stepen përpara asnjë kundërshtari, edhe pse nivelet janë ndjeshëm të zhbalancuara.

Sipas argjentinasit Rafael Soza, dinamovitët do të flasin gjatë kampionatit dhe jo më parë

Krahas shumë afrimeve gjatë merkatos verore, si brenda dhe jashtë tregut shqiptar, dinamovitët iu rikthyen “dashurisë së vjetër”, duke riafruar futbollistët argjentinas Lukas Malakarne dhe Rafael Soza, protagonistë të padiskutueshëm në fitimin e titullit kampion 2009 2011. Pikërisht mesfushori me tipare sulmuese Rafael Soza, përpara nisjes drejt Sllovenisë, është prononcuar për gazetën, duke e konsideruar me fat veten që ndodhet sërish pjesë e Dinamos. Soza ka shënuar 6 gola në kampionatin e fundit, duke qenë deciziv në shumë takime, pasi në dy fitoret minimale ndaj rivales Besa ka qenë pikërisht këmbëshpejti argjentinas ai që ka shënuar në fitoret minimale 1 0. Ndërkohë që nuk harrohet goli me finte në fundin e takimit të “Qemal Stafës” ndaj Flamurtarit, kur blutë fituan 1 0 në javën e 13 të. Por në përgjithësi Soza është një lojtar i sakrificës, i cili edhe këtë sezon do të jetë tepër i domosdoshëm për dinamovitët.

Sllovenia
“Jemi sërish në Slloveni për fazën përgatitore dhe kjo është diçka pozitive, pasi këtu kushtet janë optimale dhe duhet të përmirësohemi akoma më shumë në gjendjen fizike dhe teknike, pasi përpara është një kampionat i gjatë dhe i vështirë. Personalisht duhet të punoj më shumë, sepse jam bashkuar pak me vonesë me ekipin në Slloveni, kështu që s’e kam kryer të plotë fazën përgatitore. Do të jemi dy herë më të fortë si skuadër pas kësaj faze. Ne jemi një nga skuadrat me përgatitje fizike më të mirë në Shqipëri, pasi në kampionatin e fundit s’kemi pasur probleme të tilla. Këtu kushtet janë nga më të mirat, çka na japin mundësinë të punojmë të qetë.”

Miqësoret
“Këto takime janë krenari për ne lojtarët e Dinamos, sepse përballemi me skuadra nga më me emër në botë. Flas këtu për Palermon dhe Real Sociedatin. E dimë që jemi një skuadër e vogël përpara këtyre emrave, por të jeni të bindur se do të japim maksimumin për të bërë një figurë sa më të mirë. Mendoj se të tilla sfida na rritin edhe nivelin e përkushtimit.”

Formacioni
“Detyra ime është të stërvitem, më pas është trajneri ai që vendos se kë rreshton në formacion. Dinamo ka një grup të shëndoshë dhe me afrimet e reja konkurrenca shtohet. Por edhe një vit më parë kishim konkurrencë të madhe në skuadër, ndaj dhe gjërat shkuan mirë për ne, sepse në të tilla raste si futboll s’ke kohë të mendohesh, por në çdo moment duhet të jesh vigjilent, duke dhënë 100% e mundësive që disponon, në të kundërt është dikush mbas teje që mund të të zërë vendin në formacion. Gjithsesi, çdo lojtar ka llogaritë e veta në skuadër.”

Titulli kampion
“Sigurisht që me grupin aktual do të kërkojmë sërish titullin kampion. Dinamo mbetet skuadër elitare në kampionatin shqiptar. Kur skuadrat e tjera bëjnë zhurmë në media, Dinamon zhurmën e saj e ruan për në fushën e blertë. Aty tregojmë në të vërtetë se sa peshojmë, sepse s’kemi qejf të merremi më fjalë të ndryshme. Më mirë edhe kësaj radhe të presim dhe t’ia lëmë fushës gjithçka,”- e mbyll prononcimin e tij argjentinasi Rafael Soza.

Soza: Si gjithnjë, ia lëmë fushës llogaritë

separator

Blanko: Konkurrenca rrit cilësinë te Dinamo

Saturday, July 31st, 2010

Sipas trajnerit dinamovit Luiz Blanko, Dinamos i nevojiten afrime e reja për të progresuar mes grupit

Dinamo, krahas merkatos së vazhdueshme verore, tashmë do të udhëtojë drejt Sllovenisë për të kryer fazën përgatitore numër 2, pasi një të tillë blutë e kanë zhvilluar përpara performancës në Ligës e Kampionëve. Numri një i pankinës dinamovite Luis Blanko, tashmë është konfirmuar në krye të Dinamos edhe për sezonin 2010 2011. I intervistuar nga mediat e pranishme përpara nisjes drejt Sllovenisë, ai ka komentuar lakimet e fundit të merkatos së Dinamos, duke e konsideruar pozitive konkurrencën në skuadër.

Emrat e fundit që fliten në radhët e dinamovitëve janë luksi, kur bëhet fjalë për Dorian Bylykbashin dhe Ervin Bulkun. Ndërkohë që Blanko komenton edhe miqësoret e luksit ndaj Real Sociedad dhe Palermos, të cilat sipas tij, ia rritin piacën Dinamos, duke ngritur cilësinë dhe përkushtimin.

- Sa ju shërben kjo fazë përgatitore sërish në Maribor të Sllovenisë?
- Janë 8 ditë intensive dhe do të zhvillojmë 3 ndeshje miqësore dhe kjo fazë do të na shërbejë shumë. Flitet për kundërshtarë me infrastrukturë të nivelit të parë dhe ne do të na shërbejë shumë për të rritur cilësinë dhe nivelin profesional. Nuk ka se si të ndodhë ndryshe, kur flitet për ekipe si Real Sociedad dhe Palermo.

- Me çfarë strategjie do të ndërtohet stërvitja juaj atje?
- Skuadra duhet të mendojë për Ligën e Kampionëve, edhe stërvitja, mentaliteti, përkushtimi e gjithçka duhet të bazohen në këtë nivel që të mendojmë për të ardhmen. Sigurisht, në fillim duhet të mendojmë për t’u shpallur kampionë të Shqipërisë, por unë jam i bindur se, duke punuar në ritmet e Ligës së Kampioneve, do të arrihet edhe objektivi në kampionat. Kujtoj që në përballjet me Sherif Tiraspolin patëm vetëm 1 muaj kohë për të përgatitur ekipin.

- Flitet për dy lojtarë të kombëtares. Ju jeni në dijeni?
- Po, jam në dijeni që ata mund të vijnë.
- A i njihni Bylykbashin dhe Bulkun si futbollistë?
- Po, kam parë disa video të kombëtares. Sigurisht, ato nuk ishin aktuale, por më shërbyen për të parë karakteristikat e futbollistëve. Do të shohim cili nga ata do t’i bashkohet Dinamos.
- Konkurrenca në skuadër është negative apo pozitive?

- Për mendimin tim, pozitive. Unë jam për idenë që të ketë konkurrencë, është e vetmja mënyrë që skuadra të rritet në nivel. Nëse dikush nuk është i përqendruar në punën e tij, atëherë ka dikënd tjetër pas shpine që e pret. Ndërkohë, nëse do të kemi vetëm 11 futbollistë, spontanisht futbollistët nuk japin më të mirën e tyre.

- Të kesh disa futbollistë të kombëtares është një luks i madh. A e ndieni diçka të tillë?
- Eshtë luks. Le të jenë edhe 10 futbollistë nga kombëtarja, është diçka pozitive. Gjithnjë është diçka e mirë kur ke lojtarë me nivel teknikë në skuadër. Edhe skuadra me këta elementë funksionon më mirë.

Blanko: Konkurrenca rrit cilësinë te Dinamo

separator

Diop: Më fal, Dinamo, nuk kthehem më!

Friday, July 30th, 2010

Senegalezi Papa Diop rrëfehet për herë të parë pas “arratisjes” nga blutë kryeqytetas

Papa Diop nuk është më mister për opinionin sportiv në Shqipëri. Ai më në fund është bërë i gjallë dhe gjatë një interviste ekskluzive për “Sportin shqiptar” nga Senegali, tregon arsyet e divorcimit nga dinamovitët. Mbase largimi i futbollistit në fjalë nuk është pritur mirë nga dinamovitët, por ata që e njohin nga afër senegalezin e dinë mjaft mirë natyrën e tij, e cila pavarësisht faktit të pamohueshëm të largimit tinëz nga blutë, mbart në vetvete një dashuri për Dinamon, skuadër ku Papa ka kaluar plot 6 vite të karrierës së tij sportive, por edhe të jetës private.

Diop ndodhet në Senegal dhe ditën e shtunë do të udhëtojë drejt Francës. Por karriera e tij sportive është në rrezik, pasi kartoni ndodhet në duart e drejtuesve dinamovitë. Menaxheri Ilir Halili ndodhet në Tiranë dhe gjatë kësaj kohe është duke negociuar me drejtuesit e Dinamos. Mes bisedimeve ka edhe një ofertë konkrete për lojtarin Papa Diop. Por Dinamo është duke u menduar, pasi në mes është edhe pak hatërmbetja me futbollistin në fjalë.

Mbase duke parë aventurat e përsëritura të Diopit, me largime enigmatike nga Shqipëria, Dinamo mund ta lëshoj një herë e mirë, duke përfituar shumën e ofruar nga klubi Alfaisaly FC i Arabisë Saudite. “Intrigë e dashuri” duket historia e “arratisjes” nga Dinamo të senegalezit Papa Diop, i cili duket qartë gjatë prononcimit se nuk dëshiron të kthehet më tek Dinamo.

Por miqtë, shokët e skuadrës, por edhe presidencën blu, ai nuk e harron duke dërguar përshëndetje speciale nga Senegali i largët. Pak minuta në pritje të linjave telefonike me Senegalin dhe ja tek dëgjohet një zë i mbytur: Alo! Është pikërisht ai, “i arratisuri” i bluve, Papa Diop, “rebeli i penduar”, që fillon të bisedojë me ne:

- Ku ndodheni aktualisht?
- Në Senegal. Ditën e shtunë do të udhëtoj drejt Francës.
- Dukeni shumë i qetë, por a e dini që te Dinamo çështja juaj është një “bombë” e vërtetë?
- Nuk e di çfarë po ndodh atje, s’kam kontakt me asnjë njeri. Por kam arsyet e mia pse jam larguar, edhe pse ndoshta kam zgjedhur momentin jo të përshtatshëm.

- Cilat janë ato?
- Jam larguar nga Dinamo sepse kam një kohë të gjatë që pres të provoj një eksperiencë të re. 6 vite në kampin blu nuk janë pak. Unë dëshiroj që të gjithë ta kuptojnë zgjedhjen time. Kam të drejtën private të provoj edhe unë një jetë më të mirë. Por ruaj respekt maksimal për të gjithë tek Dinamo, pavarësisht zgjedhjes sime të nxituar.

Tek Dinamo kam fituar shumë famë, por edhe para, tituj kampionë, por edhe një eksperiencë që do të më vlejë gjatë gjithë karrierës sportive. Dinamo ende mbetet një shtëpi për mua, ndaj dhe dua t’i kërkoj falje për largimin tim. Dhe do t’i lutem sërish të më kuptojnë.
- Po largimi përpara ndeshjes është shumë i rëndë, shokët mendojnë që i ke lënë në baltë…?

- Unë personalisht nuk doja të ikja në asnjë mënyrë përpara ndeshjes, edhe gjatë pronocimit për gazetën tuaj jam shprehur se do të largohem pas Ligës së Kampionëve dhe do të kem një takim me presidentin. Problemi është se në momentin që kam ikur, kam qenë shumë i mërzitur. Humba kontrollin nga mërzia dhe tani e kam marrë vendimin tim.

- Do të ktheheni një ditë në Tiranë?
- S’e di. Mbase ndonjë ditë. Kam shumë shokë e miq atje, për të cilët kam respekt dhe dua t’i takoj sërish një ditë.
- Por për futbollin? Për Dinamon, s’do të kthehenit asnjëherë?
- Jo, jo, duhet ta harroni diçka të tillë.

- Si jeni ndierë pasi morët vesh lajmin që Dinamo për 1 gol nuk kaloi turin ndaj Sherifit?
- Ndiej vërtet keqardhje për Dinamon, për shokët e skuadrës, për tifozët, por edhe për presidentin Besnik Sulaj, sepse në asnjë moment s’kam pasur probleme me presidentin tonë.
- E kujtoni momentin e parë kur keni mbërritur në Tiranë?
- Po, shumë vite më parë. Është diçka që më ngjall nostalgji dhe mall, por edhe keqardhje.

- Po momentin e fundit?
- Ishte ndeshja e parë ndaj Sherif Tiraspolit. U mundëm për gabime tonat, por di që unë kam dhënë maksimumin si në ndeshjen e parë, por edhe të fundit me Dinamon. Fitova atje 2 tituj kampionë dhe një Superkupë dhe jam i lumtur për këtë.
- Dhe në fund cili është mesazhi juaj për opinionin sportiv në Shqipëri dhe atë dinamovit në veçanti?
- Lamtumirë Dinamo, gjithnjë do të mbetesh në zemrën time.

Diop: Më fal, Dinamo, nuk kthehem më!

separator

Ks Shkumbini Peqin is proudly powered by WordPress
Entries (RSS) and Comments (RSS).
Theme by Spanish Translation US.