Posts Tagged ‘nexhat-bizhdili’

Ndërpritet ndeshja Besa-Skënderbeu, revoltë e tifozëve kavajas për penalltinë

Monday, August 23rd, 2010

Nuk paskëshin qenë asgjë shishet e hedhura dje në stadiumin e Elbasanit, sepse një ditë më pas, në Kavajë, ndeshja e shumëpritur, e lënë për të hënën, si “qershia mbi tortë“ për nisjen e kampionatit të ri, ka dhënë sinjale të frikshme. Se dhuna dhe kontestimet ne kampionatin shqiptar nuk dinë të ndalen. Madje, teksa kjo ndodh që në javën e parë të një kampionati të ri, imagjinoni se cfarë sinoptike mund të hamendësojë kushdo. Futbolli shqiptar ka marrë një tjetër goditje, nga ato që lënë njolla të shëmtuara në vendet e tjera, por në Shqipëri përsëriten aq shpesh, madje që në nisje të një kampionati të ri, sa vjen më e udhës shprehja “cudia më e madhe zgjat tri ditë“. Po cfarë ka ndodhur realisht. Një ndeshje e luftuar fort, mes dy skuadrave, Besës vendase dhe Skënderbeut të Korcës, në tapetin e ri të fushës së stadiumit të Kavajës, i cili, cuditërisht, vend-vende ishte i djegur, sikur të kishte vite i shtruar. Sidoqoftë, nuk ka caluar në këtë aspekt kjo ndeshje, por tek gjykimi, i cili ka provokuar një “Vaterlo“ të vërtetë në Kavajë, teksa mijërat e tifozëve, rreth 8 mijë të tillë, kanë tentuar të pushtojnë fushën e blertë. Por policia, edhe pse e gjendur në një situatë të vështirë, ka arritur ta mbajë të paarritshme fushën e stadiumit të Kavajës. Aty ku lojtarët e të dyja skuadrave, vetë shefi i garave në FSHF, Ilir Shulku, gjyqtarë e vëzhgues të ndeshjes, po merrnin e jepnin për ta vijuar ndeshjen. E cila është ndërprerë në minutën e 87-të, për të mos vijuar më. Edhe pse është pritur e tentuar për më shumë se gjysmë ore, që loja të vijonte dhe të mbaronte sipas rregullave përkatëse. Tifozët kavajas, të irrituar në maksimum, nuk e kanë lejuar këtë gjë, sepse nga të katër anët kanë vërshuar gurë, shishe plastike uji dhe sende të tjera të forta drejt fushës. Aty ku gjyqtarët nuk kishin asnjë shans për të vijuar normalisht ndeshjen, ndaj e kanë mbyllur para kohe. Duke qenë vetë ata, shkaktarët e këtij irritimi. Pikërisht në minutën e 87-të, kur Skënderbeu po udhëhiqte ndeshjen 1-0, me eurogolin e Markovicit, në zonën korcare ka një rast të diskutueshëm. Nga pamjet televizive, në përsëritje, dukej se ishte konsumuar një penallti, sepse ndaj sulmuesit kavajas ishte ndërhyrë në mënyrë të parregullt. Por, kur të gjithë menduan penallti për Besën, kryesori Albano Janku nuk ka menduar keshtu, ndaj ka bërë shenjë për vazhdimin e lojës. Aq ka mjaftuar që lojtarët e Besës t’i vërsulen gjyqtarit, duke i kërkuar llogari për këtë mosdhënie penalltie, ndërsa stadiumi është ngritur në këmbë, me fyerje në kor ndaj Jankut. Për të mos u ulur dhe qetësuar më, përkundrazi, kanë filluar të godasin me gurë dhe sende të tjera të forta drejt fushës. Ku ka qenë e pamundur për të vijuar më tej ndeshja. Policia ka mundësuar mosinvadimin e fushës nga turma e madhe e tifozëve, të cilët e kanë tentuar këtë gjë, por pa ia arritur dot. Drejtuesit e federatës (i pranishëm në tribunën VIP të stadiumit kavajas ka qenë edhe presidenti i FSHF-së, Armand Duka, në mes dy presidentëve respektivë, Agim Zeqo dhe Nexhat Bizhdili) kanë përdorur të gjitha mënyrat për të bërë të mundur vazhdimin e lojës, duke përdorur pjesëtarë të stafit teknik dhe lojtarë të skuadrës vendase për qetësimin e publikut, por tifozët e pranishëm në stadium nuk ka lejuar kurrsesi për këtë gjë. Dukej qartë se tërë mllefin e tyre e kishin me kryesorin e ndeshjes, Albano Janku. Sipas tyre, ky gjyqtar kishte ardhur në Kavajë për t’i dhënë fitoren Skënderbeut, mjaft i përfolur kohët e fundit për përkrahjen e pushtetarëve, por edhe të segmenteve të caktuara në FSHF. Dicka që po kthehet në bumerang për Skënderbeun, i cili provoi që në ndeshjen e parë të kampionatit të ri revoltën e tifozërisë kavajase. Që e ndërpreu ndeshjen, ashtu sic ka bërë edhe para disa sezonesh, në fakt, gjatë një ndeshjeje mes Besës dhe Elbasanit, kur verdheblutë fitonin në Kavajë, të toleruar nga vendasit, dhe dilnin kampionë të vendit. Por një gjë e tillë ndodhte në fundin e kampionatit, jo qysh në javën e parë, si këtë herë, cka tregon se futbolli shqiptar jo vetëm nuk po gjen karar, por po bëhet shkas për revolta popullore, sikurse ishte kjo e tifozërisë verdhezi, pavarësisht se nuk pati të plagosur e viktima, si në revoltat e tjera.

/sportishqiptar/

separator

Bizhdili: Besa do të festojë edhe sot

Monday, August 23rd, 2010

Sot festë në Kavajë, mijëra tifozë me fishekzjarre, flamuj e banderola presin fitoren

Takimi i sotëm mes Besës dhe Skënderbeut pritet të shndërrohet në një festë të vërtetë. Gjatë kësaj jave, siç mësojmë nga shoqata e tifozëve verdhezinj, ka nisur organizimin, madje edhe me njoftime në publike që në stadium të jenë prezentë mijëra fansë. Ambicia e Skënderbeut dhe deklaratat se “nga Kavaja nis titulli”, i ka vënë në sedër më shumë fansët verdhezinj. Kavajasit thonë: “Skënderbeut, mikpritje në tribuna, “dajak” në fushë”.

“Korçarët meritojnë të gjithë respektin dhe janë të mirëseardhur, deklaron presidenti i Besës, Nexhat Bizhdil. U garantoj drejtuesve, stafit dhe tifozëve korçarë se në Kavajë do të ndihen si në Korçë. Me dallimin e vetëm se, ndërsa në tribuna u kemi rezervuar mikpritje e respekt, në fushë do të munden. Besa ime patjetër do ta nisë me fitore sezonin dhe më pas në Tiranë ndaj Dinamos do të bëjmë të njëjtën gjë.

Me këtë rast, apeloj të gjithë fansët verdhezinj, veçanërisht emigrantët që bëhen gati të largohen, të vijnë të shijojnë futbollin e vërtetë dhe furinë e Besës.”
Premio për fitore, 6 milionë lekë
Ende pa u ftohur “xhepat” nga premioja e Superkupës, futbollistët e Besës do t’i gëzoohen një tjetër premioje, asaj të fitores ndaj Skënderbeut. Vetëm pardje stafi dhe futbollistët verdhezinj morën secili nga 50 mijë lekë të rinj premio si fitues të Superkupës.

Duket se Besa këtë sezon do të përsërisë atë të tre viteve më parë, kur vetëm premiot e fituara javë pas jave kapnin shifra milionëshe për çdo futbollist. Kot nuk thonë futbollistët mes tyre: nëse do lekë, shko te Besa. Mësohet së për ndeshjen e sotme ndaj Skënderbeut, klubi ka vënë 6 milionë lekë të vjetra si shpërblim në rast se kavajasit fitojnë.

Tifozët ultras, përgatitje madhështore
Ka më se një javë që fansët verdhezinj kanë nisur organizimin e tyre me rastin e takimit të sotëm. Janë blerë me dhjetëra fishekzjarre, me qindra flamurë e bluza, por edhe disa banderola, ku i thurret himn Besës. Njëri prej tifozëve më të thekur deklaron:

“Nuk bëhet stan me ujqër. Të marrësh borxh nga Kavaja, siç bënë korçarët me Shehin, Dragushën, Vrapin, Fagun dhe Shkëmbin, që mbeten idhujt tanë, të jeni të sigurt se përballë publikut kavajas atyre do t’u lidhen këmbët, do ta shihni. Ne e kemi krenari të thërrasim emrat e tyre, por nuk fitojnë dot për ekip tjetër. Ata i dhanë shumë Besës dhe mbeten idhujt tanë.”

Dueli mes sulmit verdhezi dhe “ish”-ëve
Shehi, Dragusha dhe Vrapi përballë Haxhibuliçit dhe Cikalleshit.
Mjaft intriguese mbetet sfida e sotme edhe për një fakt mjaft domethënës. Sulmuesit verdhezinj do të kërkojnë t’u shënojnë pikërisht “ish”-ëve të Besës, Shehit, Dragushës, Vrapit dhe Fagut.

Do të jetë një duel, sa i bukur, aq edhe i vështirë, kur dihet klasi i prapavijës korçare, ajo prapavijë që vjet me fanellën verdhezi ishte pa dyshim më e mira e superligës. A do të jetë e tillë ajo edhe me fanellën bardhekuqe? Kjo mbetet për t’u parë, duke nisur nga sot.

/sportishqiptar/

separator

Teuta dhe Laçi e nisin pa gola kampionatin

Sunday, August 22nd, 2010

Për laçianët mund të quhet rezultat i mirë, ndërsa durrsakët nuk e inaguroajnë ndriçimin me fitore

Teuta Laçi 0 0

Teuta: Rizvani, Hoti, Nina, Hoxha, Sefgjini, Tahiri, Kaloti, Doçi (Dosti 68′), Frashëri (Pepa 55′), Xhemalaj, Çota. Trajner: E.Martini.
Laçi: Vashaku, Doku, Kaja, Buraku (Hima 85′), Shazivari, Gega, Vucaj, Karaxhiç, Marashi (Zefi 70′), Malo, Mile (Haliti 57′). Trajner: S.Nica.
Gjyqtarë: E.Peza, E.Biçaku, B.Mesi (Tiranë)
Kartonë të verdhë: Hoti, Nina, Shazivari, Karadziç, Malo

Radiografia
9′ Frashëri shkëputet nga e djathta dhe kroson bukur në zonën kundërshtare, ku Doçi godet fluturimthi, por topi përfundon jashtë mbi traun e portës së Vashakut.
14′ Çota depërton me shpejtësi nga krahu i majtë dhe sapo hyn në zonën kundërshtare, godet fort, por topi i tij përfundon mbi traun e portës laçiane.
34′ Malo ka rastin më të mirë për laçianët, pasi ka hyrë brenda zonës nga e djathta, në pozicion të prirët e dërgon topin mbi portierin Rizvani, por topi i tij, pasi ka parakaluar përpara pasqyrës së portës së zbrazur, ka përfunduar jashtë.
35′ Çota ka hyrë rrezikshëm nga krahu i djathtë brenda zonës dhe godet fort tokazi, por grushton Vashaku.
37′ Goditje këndi për durrsakët që ekzekutohet nga Xhemalaj, topin brenda zonës e godet me kokë Kaloti, por topi i tij përfundon jashtë, fare pak centimetra mbi portën e Vashakut.
51′ Tahiri, në kufijtë e zonës, godet fort, por pret në pozicion Vashaku.
53′ Kaloti brenda zonës shfaqet rrezikshëm përpara Vashakut, por në momentin e goditjes ndërhyn Doku, që spastron zonën.
74′ Pepa ka hyrë në zonë dhe është krejt i vetëm me Vashakun, duke pasur një rast ideal për shënim, por sulmuesi i durrsakëve vonon në goditje dhe mbrojtësit e Laçit ndërhyjnë, duke devijuar topin.
75′-90′- Përpjekje të kota të të dyja skuadrave dhe nuk ka asnjë rast për të shënuar, topi vetëm endet afër kujiftë e zonave respektive.

Komenti

Teuta ka marrë vetëm një pikë në ndeshjen e saj të parë me drita në Durrës në stadiumin “Niko Dovana”. Durrsakët, me një ekip totalisht të ri, kanë dominuar takimin ndaj skuadrës laçiane dhe kanë krijuar shumë raste shënimi, por pa arritur të finalizojnë, përballë një Laçi, që ka krijuar vetëm një rast në 90 minuta, por që është mbrojtur mjaft mirë duke marrë një pikë të çmuar në Durrës.

Ndeshja ka filluar e qetë dhe ritmi ka qenë i ulët, por shumë shpejt durrsakët dalin në sulme, duke këmbëngulur në drejtim të shënimit të një goli dhe rastet nuk mungojnë, por kapiteni Doçi dhe suluesi Çota tregohen të pasaktë përpara portës kundërshtare. Laçianët, që janë të kënaqur edhe me një pikë, e hedhin vështrimin vetëm një herë në portën dursake, kur Malo ka rastin e pastër dhe të vetëm për ekipin e tij, por që nuk ka arritur të shënjestrojë saktë portën e Rizvanit. Rastet e durrsakëve nuk rreshtin.

Ata e qarkullojnë topin shpejt dhe arrijnë të çajnë disa herë mbrojtjen e hekurt laçiane, por sërish Çota e më pas Kaloti nuk arrijnë të dërgojnë topin në kuadratin e portës së Vashakut. Pjesa e parë është mbyllur në barazim 0 0. Pjesa e dytë ka qenë kopje e së parës, me ndryshimin e vetëm se rastet janë më të pakta për durrsakët, pasi mbrojtja laçiane është bërë akoma më e ngjeshur dhe thuajse e padepërtueshme.

Trajneri Martini kryen edhe disa zëvendësime, duke heshur në lojë mesfushorin Dosti e sulmuesin Pepa, për t’i dhënë akoma më shumë rrezikshëmri sulmit, por Teuta nuk arrin të gjejë golin. Përpara portës së Vashakut gabojnë Tahiri, Pepa e Kaloti, ndërkohë që laçianët thuajse e kanë harruar sulmin, ku luan i shkëputur Malo, që mbulohet mjaft mirë nga Nino, i cili nuk i lë asnjë hapësirë. Me kalimin e minutave laçianët mbrohen me të gjitha forcat, ndërkohë që durrsakët nuk arrijnë të gjejnë më hapësira për të shënuar.

Si përfundim, ndeshja do të mbyllet me rrjeta të paprekura, ku barazimi kënaq më shumë Laçin, i cili kishte mungesa të shumta në këtë ndeshje, ndërkohë që durrsakët në ndeshjen e tyre të parë me ndriçim në “Niko Dovana” dhe të parën për këtë kampionat, nuk arrijnë të marrin tripikëshin, që për nga mënyra si u zhvillua loja, e meritonin atë. Gjithsesi, edhe një pikë konsiderohet një start pozitiv për durrsakët në këtë kampionat.

Thanë pas ndehsjes

Edi Martini, trajner i Teutës: “Eshtë për të ardhur keq që nuk fituam këtë ndeshje, pasi e kontrolluam tërësisht lojën dhe krijuam shumë raste shënimi, përballë një kundërshtari që nuk na vuri në vështirësi. Djemtë luajtën mirë, por nuk arritën te goli, megjithatë ata janë djem të rinj, që nuk kanë luajtur më parë me njëri-tjetrin, ndaj nga ndeshja në ndeshje loja jonë do të përmirësohet akoma më shumë. Jam i bindur që në ndeshjet e ardhshme do të paraqitemi akoma më mirë dhe do të arrijmë edhe rezulatet e pritura.”
Stavri Nica, trajner i Laçit: “Eshtë sukses që morëm një pikë në Durrës, për vetë situatën që kishim në ekip, ku kemi shumë mungesa.

Gjendja e ekipit nuk është kjo, pasi merkatoja është pak e vonuar dhe javën e ardhshme në ekip vijnë edhe lojtarët cilësorë, që do të rrisin cilësinë e lojës sonë. Edhe djemtë që luajnë janë të rinj dhe duhet kohë që të përshtaten më mirë me njëri-tjetrin dhe të harmonizojnë më shumë veprimet. Nuk jam i kënaqur me cilësinë e lojës, por përgëzoj djemtë për shpirtin e garës, si dhe për rezultatoin pozitiv që morëm në Durrës.”

Të veçanta:
Rreth 300 tifozë kanë ndjekur takimin në “Niko Dovana”.

Vashaku dhe Mile luajtën në ndeshjen e parë me fanellën e Laçit kundër ish-skuadrës së tyre sezonin e kaluar, ku Mile ka qenë edhe kapiteni i Teutës.
Shiritin e kapitenit për durrsakët e mbante Doçi, i cili kur është zëvendësuar, ia ka kaluar shiritin Xhemalajt.
Në tribunën VIP, përveç dy presidentëve të ekipeve, ndodhej edhe Presidenti i Nderit të Apolonisë, Koço Kokëdhima, presidenti i Besës, Nexhat Bizhdili, sekretari i FSHF së, Eduart Prodani, etj.
Topin e parë të këtij kampionati për Teutën e shkelmoi në mënyrë simbolike një nga figurat e shquara të futbollit durrsak, Kristaq Toçi.
Në tribunën e stadiumit e ka ndjekur ndeshjen edhe argjentinasi tjetër Cerda, që sapo ka ardhur në provë te durrsakët në rolin e qendërmbrojtësit.

Durrsakët nuk kanë fat me projektorët

Ka qenë ndeshja e parë që Teuta ka luajtur në stadiumin “Niko Dovana” të ndriçuar. Për herë të parë luhej një ndeshje kampionati pas miqësores me Uzbekistanin që luajti kombëtarja jonë, që gjithsesi fitoi. Ndërsa durrsakët barazojnë dhe si duket ndriçimi nuk u ka sjellur shumë fat atyre. Nuk dihet nëse gjithmonë Teuta do t’i luajë ndeshjet në këtë orë, apo vetëm ndeshjet kryesore, që gjithsesi ia vlen, të paktën gjatë periudhës së tanishme.

/sportishqiptar/

separator

Presidenti Bizhdili, ai që i solli tre trofe Kavajës

Wednesday, August 18th, 2010

Verdhezinjtë, në 4 vite, arrijnë atë që nuk e arritën në 86 vite, tani mungon vetëm titulli

Besa mbetet ndër klubet më të vjetra në historinë e futbollit shqiptar dhe, për çudi dhe ironi të fatit, për plot 82 vite nuk kishte arritur të sillte në qytetin e saj asnjë trofe. Breza të tërë kavajasish, që nga i madhi Qamil Teliti, që i dhuronte Shqipërisë të parën Kupë Ballkanike më 1946, pastaj me radhë, Vogli, Maliqati, Mërhori, Gjoçi, Daiu, Karriqi, Gërmani, Bajaziti, Shtini, Arkaxhiu, Pagria, deri te Duro, Shkurti, Rraklli, ndërsa ishin shpallur kampionë me fanellat e Dinamos, Partizanit e të tjera, me fanellën verdhezi nuk sollën dot asnjë trofe.

Shansi i vetëm i artë iu paraqit më 1958-ën e largët, kur edhe atëherë për vetëm një humbje në Korcë nuk morën dot titullin. Si asnjë qytet tjetër, Kavaja prodhoi me qindra futbollistë, të cilët jo vetëm nderuan qytetin e tyre, por mbrojtën plot dinjitet me dhjetëra bluza klubesh, që nga Korça, deri në Shkodër. Megjithëse ndihen krenarë për djersën e derdhur, talentin, trimërinë, bujarinë e këtyre brezave, faktet mbeten fakte, Kavaja kurrë nuk iu gëzua një trofeu.

Madje edhe në vitin 1971, kur Besa ishte i pari ekip shqiptar që kalonte një tur kupash në Europë, as atëherë në Shqipëri nuk mundi të merrte asnjë trofe. Me dhjetëra herë i zgjatën duart verdhezinjtë drejt kupave, duke dalë disa herë në finale, por tjetërkush i ngriti ato lart. Sa për tituj, as që mund të mendohej, përpos 1958-ës.


Bizhdili, njeriu që ndryshoi historinë

Dy Kupa Shqipërie dhe një Superkupë janë trofetë e arritura nga Besa në periudhën që Nexhat Bizhdili ka qenë president i ekipit kavajas. Para dy netësh, në Durrës tifozëria kavajase iu gëzua të parës Superkupë Shqipërie. Ajo erdhi pas fitimit të dy Kupave të Shqipërisë, ku merita i takon, para së gjithash një njeriu, ai është Nexhat Bizhdili.

Gjatë 10 viteve së presidencës së tij, Besa u kthye ndër ekipet elitare në Shqipëri, falë investimeve të mëdha të tij. Krejt i vetëm, ndryshe nga homologët e tij, Bizhdili hodhi themelet e suksesit të futbollit kavajas në Shqipëri e Europë. Vetëm në katër vitet e fundit Besa arriti të marrë dy herë Kupën e Shqipërisë dhe një Superkupë, duke arritur suksesin që Besa nuk e kishte arritur për 82 vjet të marra së bashku.

Plot tri herë në katër vitet e fundit Besa mori pjesë në Kupat e Europës, duke bërë që emri i saj të shkruhej në arenën ndërkombëtare. Tashmë me “erën Bizhdili” fanella e Besës renditet ndër më të rëndat në Shqipëri. E kemi thënë edhe herë të tjera: çfarë duhet t’i japë një njeri qytetit të tij që të meritojë tituj nderi më shumë se Nexhat Bizhdili, që i ka dhënë Kavajës së tij?

Para shumë e shumë pushtetarësh, artistësh, ndërtuesish, futbollistësh, që u bënë qytetarë nderi, duke u paguar nga rrogat e shtetit, Bizhdili mbetej njeriu që pasurinë dhe djersën e tij ia kushton çdo ditë emrit dhe nderit të Kavajës. Ky njeri meriton shumë e më shumë respekt e nderim sot nga i gjithë komuniteti kavajas.
Besa e re, e frikshme edhe këtë sezon

Kavajasit patën fatin të parët të matnin forcat në një takim zyrtar ndaj Dinamos në Superkupë. Kërshëria ishte tejet e madhe për të parë paraqitjen e Besës së re, ku ishin larguar plot 11 futbollistë e ishin afruar po 11 futbollistë të tjerë nga ajo Besë që fitonte Kupën e Shqipërisë. Fundi i sfidës vërtetoi për të gjithë se verdhezinjtë qëndronin shumë më lart se Dinamo. Plot 25 minuta lojë Dinamo nuk e gjeti “adresën” e portës verdhezi.

Ndërsa kavajasit “vallëzonin” në fushë. Një pjesë e dytë brilante, ku vihej re dallimi tejet i madh në përgatitjen fizike mes dy ekipeve. Kavajasit treguan se do të jenë një ndër ekipet pretendente edhe këtë kampionat. Po duket se formacioni verdhezi do të shtohet përsëri, kur presidenti Bizhdili deklaron se merkato e tij nuk është ende e mbyllur. Çfarë dhurate tjetër do t’i bëjë ai trajnerit Duro? Mbetet për t’u parë deri të shtunën e ardhshme.

/sportishqiptar/

separator

Cikalleshi: Besa do të flasë me rezultate, jo para kohe

Tuesday, August 3rd, 2010

Sulmuesi Sokol Cikalleshi sheh një Besë të denjë për këtë sezon

Sezoni që lamë pas evidentoi te Besa një futbollist kavajas me mjaft vlera. Ky ishte 19-vjeçari Sokol Cikalleshi. Falë kësaj paraqitjeje nuk munguan menjëherë edhe ofertat drejt tij nga brënda Shqipërisë, por edhe nga ekipet jashtë. Presidenti i Besës, Nexhat Bizhdili, nuk pranoi ta largonte dhe kësisoj, Cikalleshi të paktën edhe këtë sezon do të jetë verdhezi. Para katër ditësh, Sokoli festoi 20-vjetorin e tij së bashku me shokët në Mavrovë, ku Besa po përgatitet. Mosha e re dhe talenti i tij është një argument më tepër, për të shpresuar një tjetër sezon të shkëlqyer nga ai. Bisedojmë me të.

- Sokol, si po shkojnë përgatitjet në Mavrovë?

- Tashmë u mësuam me Mavrovën, sepse siç e dini, vimë për herë të dytë gjatë kësaj verë këtu. Trajneri ynë Shpëtim Duro “na ngordhi” me stërvitje, por të gjithë jemi koshientë se stërvitemi për vete. Deri tani s’kemi asnjë dëmtim apo lënie stërvitje nga asnjëri prej lojtarëve.

- I keni lënë pas humbjet shokuese me Olimpiakosin. Mësuat diçka prej tyre?

- Ndoqa takimin e dytë të Olimpiakosit me Makabin dhe krijova tjetër mendim mbi fatin e dy ndeshjeve tona. Jo se do të kualifikoheshim, por mendoj se duhet dhe mund të ishim paraqitur ndryshe. Ndoshta këtu ndikoi fuqishëm edhe fakti se vinim nga një minifazë përgatitore dhe se grupi ishte krejtësisht i ri. Të luanim sot, ju garantoj se Besa kurrë nuk do të humbiste aq thellë.

- Këtë sezon në krahun tuaj nuk do të jetë më Xhafaj, por Dos Santos dhe Haxhibuliç. Jeni më të fortë apo?
- Sipas mendimit tim, sulmuesit kanë padiskutim vlerat e tyre, por unë e shoh futbollin si lojë grupi. Me këtë dua të them, se vërtet Haxhibiliç ishte te Vllaznia, apo Dos Santos te Gramozi dhe përsëri ju i patë se ku u renditën të dyja këto skuadra. Ata janë sulmues mjaft të mire, por duhet edhe një mesfushë dhe një mbrotje e mire, që sulmi të bëjë detyrën e tij. Jam i bindur se te Besa këta nuk mungojnë dhe sulmi me Haxhibulicin dhe Dos Santosin, por edhe me Shtinin, do të jetë i frikshëm këtë sezon.

- Kalendari ju rezervon takimin e parë me Skënderbeun, ose më thjeshtë me ish-ët tuaj, Shehin, Dragushën, Vrapin, Fagun e Shklëmbin. Kush do të dalë fitues?

- Megjithë respektin që kam për tërë këto emra në futboll, nuk e diskutoj fare se Besa do të jetë fituesja. Pse e them këtë? Sepse të gjithë këta janë lojtarë të reparti difensiv dhe sado fort të qëndrojnë, ne do të arrijmë t’i shënojmë. Nuk mundet të fitojë një ekip duke qëmndruar vetëm në mbrotje sado e mirë të jetë ajo. Korçarët njohin forcën tonë dhe nuk do të guxojnë të na sulmojnë, prandaj besoj tek fitorja.

- Ju vjen keq që nuk mundët të largoheshit nga Shqipëria, me gjithë ofertat që patët?

- Kjo puna e largimit në moshë të re është thikë me dy presa. Shikoni se ku kanë përfunduar shumica e futbollistëve të rinj, që nga Hyka e të tjerë. Unë dua që atje ku do të shkoj, të luaj e jo të jem turist në klub. Vërtet paratë më intresojnë, por kaq i ri sa jam nuk i dua ato, duke lidhur e zgjidhur këpucët vetëm në stërvitje. Për këtë arësye nuk ndjehem keq.

/sportishqiptar/

separator

Bizhdili: S’ka më blerje, pres reagimin

Thursday, July 29th, 2010

A i duhet besuar presidentit të Besës, Nexhat Bizhdili, kur deklaron se ka mbyllur merkaton? E filluam kështu këtë shkrim, pasi dje ai deklaroi se ka mbyllur merkaton, të paktën deri në janar për verdhezinjtë. Sipas njëshit të Besës, kontigjenti i afruar në të tri repartet mbetet i plotë dhe me futbollistë cilësorë.

“Mos e shihni Besën time me Olimpiakosin. Kushdo ekip shqiptar të ishte, njësoj do të mundej, për këtë ju garantoj. Unë kam ndërtuar një Besë për superligën shqiptare, jo për Europa Ligën, duke nisur nga porta, deri te maja e sulmit. Besa do të zhvillojë edhe një minifazë tjetër e ndonjë boshllëk fizik, apo koordinim të lojës në grup do të plotësohet më së miri.

Kini besim te Besa ime se gjithmonë sa herë kam premtuar e kam mbajtur fjalën,” – shpehet Bizhdili. Po duke u kthyer te pikëpyetja e shkrimit, aktualisht Besa ka portier të parë Edvin Bakajn. Pavarësisht vlerave të tij si një portier i talentuar, mbetet për t’u parë nëse Bizhdili vërtet nuk do të afrojë portier tjetër, siç ishte përfolur, bie fjala, për Llanin, apo një portier të dytë të Partizanit të Beogradit.

Po ashtu, vetëm dy ditë më parë, presidenti deklaroi se Besës i duhej patjetër një qendërmbrojtës e tani shprehet se s’ka nevojë. Përse kjo prapa-kthehu e Bizhdilit? Mos vallë trajneri Duro e ka bindur se Besa e ka të kompletuar repartin difensiv?

Kur thamë a i duhet besuar Bizhdilit, kemi parasysh jo një rast, por disa, kur në ditët e fundit, madje edhe në orët e fundit, ai ka “shpërthyer”, duke sjellë futbollistë titullarë me mjaft vlera. Ndaj deklarata e sotme e Bizhdilit duhet marrë me rezervë, sepse Bizhdili duhet pritur deri më 20 gusht, disa orë para startit, për t’u bindur që te Besa nuk do të ketë më prurje.

Bizhdili: S’ka më blerje, pres reagimin

separator

Ks Shkumbini Peqin is proudly powered by WordPress
Entries (RSS) and Comments (RSS).
Theme by Spanish Translation US.