Posts Tagged ‘skuadrat’

50 fakte nga sezoni 2009-2010

Saturday, July 31st, 2010

Pas 33 javëve dhe 198 ndeshjeve, të nisura më 23 gusht 2009 dhe të përfunduara, më 19 maj 2010, Kategoria Superiore mbylli sezonin 2009-2010, ose Kampionatin e 71-të Kombëtar të Futbollit. Verdiktet e mëdha: Dinamo, kampione dhe në Ligën e Kampioneve; Besa, fituese e Kupës dhe në Ligën e Europës. Çiftin e bujshëm të javës së fundit e shoqëron në Europë, Laçi (debutim historik) dhe Tirana (skuadra shqiptare me më shumë ndeshje në Europë). Gramozi dhe Apolonia ranë direkt në Kategorinë e Parë, ndërsa Kastrioti dhe Skënderbeu do të përballen në “play-out” respektivisht me Lushnjën e Kamzën në kërkim të vazhdimësisë në Superiore. Gramozi-Real Madrid, nuk bëri bujë për ardhjen në Shqipëri të yjeve të gjigantëve spanjollë, si Kristiano Ronaldo, Kaka, Raul, Kazijas apo Benzema, por mori përmasa “ekstreme” në median ndërkombëtare, për shkak “black-out” prej 90 minutash të ndricimit të stadiumit “Qemal Stafa”. Vllaznia, këtë sezon nuk do të mbahet mend për humbjen në finalen e Kupës së Shqipërisë dhe as për mbetjen jashtë Europës, por për “shpikjen” e saj origjinale. Zëvëndëstrajneri Esat Rakiqi bëri një gabim në protokollin e lojtarëve. Vllaznia fitoi 3-2 me Skënderbeun në fushë, por e humbi 2-0 në tavolinë. Trajneri i Besës, Shpëtim Duro, u godit me grusht nga kryetari i Bashkisë së Peqinit, Ilir Rrusha, ndërkohë që në incidentin e rëndë është përfshirë edhe zëvendëstrajneri i Shkumbinit, Klodian Dervishi.

Faqja sportive Albania-sport.com prezanton përmes një speciale të saj “50 fakte nga sezoni 2009-2010”, ku në fokus janë një mori statistikash, kuriozitetesh, incidentesh, apo dhe “çudish” shqiptare.

1. DINAMO KAMPIONE
Dinamo është kampionia e re e Shqipërisë. Titulli i 18-të i saj përkon me 60-vjetorin e klubit blu, të themeluar në vitin 1950. Kampionatin e parë Dinamo e kishte fituar në vitin 1950, me trajner-lojtar Zihni Gjinalin, ky i fundit mban edhe rekordin si trajneri blu me më shumë trofe, 6.

2. KUPA E SHQIPËRISË
Besa fitoi Kupën e Shqipërisë për herë të dytë në historinë e klubit 85 vjeçar. Merita i takon sigurisht presidentit Bizhdili, dy trofe në katër vitet e fundit: 2006-2007 dhe 2009-2010. Të parin e fitoi Ilir Biturku në sfidën kundër Teutës (3-2); të dytin Shpëtim Duro kundër Vllaznisë (2-1).

3. VERDIKTET E EUROPËS
Pas 33 javëve dhe 198 ndeshjeve, Superliga përcaktoi verdiktet europiane: Dinamo, kampion dhe në Ligën e Kampioneve; Besa, fituese e Kupës dhe në Ligën e Europës. Çiftin e bujshëm të javës së fundit e shoqëron në Europë, Laçi (debutim historik) dhe Tirana (skuadra shqiptare me më shumë ndeshje në Europë)

4. VERDIKTET E VOGLA
Gramozi dhe Apolonia ranë direkt në Kategorinë e Parë, pasi u renditën në dy vendet e fundit. Kastrioti (vendi i 9-të) dhe Skënderbeu (vendi i 10-të) do të përballen në “play-out” respektivisht me Lushnjën e Kamzën në kërkim të vazhdimësisë në Superiore.

5. “KËPUCA E ARTË”
Daniel Xhafaj fitoi “Këpucën e artë” të sezonit 2009-2010. Sulmuesi i Besës realizoi 18 gola në Kampionatin e 71-të Kombëtar, duke lënë pas serbin Mlladen Bërkiç (Apolonia, 15 gola), Elis Bakajn (Dinamo, 15 gola), Migen Memellin (Flamurtari, 15 gola) dhe Arlind Nora (Laçi, 14 gola).

6. FITORET
Natyrshëm që skuadra me më shumë fitore është Dinamo. Kampionia e Shqipërisë për sezonin 2009-2010 regjistroi 19 fitore në 33 ndeshje, ose 57.7 për qind të ndeshjeve. Edhe në ndeshjet shtëpiake është Dinamo: 12 fitore në 17 ndeshje. Në ndeshjet në transfertë, Dinamo e Tirana kanë regjistruar nga 7 fitore.

7. BARAZIMET
Skënderbeu dhe Laçi janë skuadrat “ideale” të barazimeve. Të dyja kanë regjistruar nga 9-të tillë në 33 javë. Skënderbeu dhe Laçi kanë regjistruar edhe më shumë barazime në shtëpi: nga 5. Në ndeshjet në transfertë “rekordin” e mban Flamurtari, me 5 barazime në 17 ndeshje të zhvilluara.

8. HUMBJET
Gramozi i Ersekës, skuadra debutuese e këtij sezoni, ishte dhe formacioni që pësoi më shumë humbje: 19 të tilla në 33 javë. Më pak humbje pësuan Dinamo (kampione), Besa (vendi i dytë) dhe Laçi (vendi i katërt), të tria nga 10. Në shtëpi më shumë humbje ka pësuar Gramozi dhe Tirana, nga 6. Në transfertë: Gramozi, 13.

9. SULMI MË I MIRË
Gjatë 198 ndeshjeve të këtij sezoni u shënuan në total 448 gola, katër prej tyre autogola. Më shumë gola realizoi ekipi i Dinamos, 56 gola, njëherësh edhe sulmi më i mirë në kampionat. Më pak gola realizoi Gramozi, 25. Në ndeshjet në shtëpi më shumë shënoi Dinamo, 34. Blutë shënuan edhe më shumë gola në transfertë: 22.

10. MBROJTJA MË E DOBËT
Gramozi i Ersekës dhe Apolonia e Fierit, dy ekipet që ranë direkt nga Kategoria Superiore, ishin dy skuadrat që pësuan edhe më shumë gola: nga 43 ose 1.3 gola për ndeshje. Mbrotjen më të mirë e kishte Laçi. Kurbinasit, të cilët do të debutojnë në Europë, pësuan 28 gola (Dinamo, 42).

11. BOLLËKU I GOLAVE
Ndeshja me më shumë gola në sezonin 2009-2010 është ajo e zhvilluar në Kavajë, në takimin Besa-Gramozi, e përfunduar me rezultatin tenistik 6-4. Dhjetë gola në 90 minuta, ku protagonisti i takimit ishte golashënuesi më i mirë i Superligës, Daniel Xhafaj, autor i 3 golave në atë ndeshje.

12. KARTONËT
Gjatë 198 ndeshjeve sezonit 2009-2010 u dhanë gjithsej 605 kartonë të verdhë me një mesatare: 3.05 kartonë për ndeshje, ose 18.3 kartonë të verdhë për çdo javë. Përsa u përket kartonëve të kuq gjyqtarët e ndeshjeve dhanë 59 të tillë në po 198 sfida, ose 1.78 kartonë të kuq për ndeshje.

13. PIKËT
Dinamo, kampionia e Superligës, grumbulloi 61 nga 99 pikë të mundshme në 33 javë. Dinamo e mbylli kampionatin me 8 pikë më shumë se Besa e vendit të dytë dhe 35 pikë më shumë se Gramozi i vendit të fundit. Më shumë pikë në shtëpi koleksionioi Shkumbini, 31 pikë (Dinamo, 28) në transfertë grumbulloi Tirana: 25 pikë (Dinamo, 23)

14. TRIUMFI I LACIT
Laçi, surpriza e madhe e këtij sezoni, kompletoi ëndrrën duke fituar për herë të parë në historinë e klubit kurbinas një biletë në Ligën e Europës, e duke qenë kështu skuadra e 13-të shqiptare që debuton në Europë. Një sezon i madh i ndërtuar nga treshja: presidenti Pashk Laskaj, trajneri Stavri Nica dhe goleadori Arlind Nora.

15. TROFETË E SULAJT
Presidenti Besnik Sulaj fitoi titullin e tretë të tij, qysh kur ai financon Dinamon nga viti 1999. Bosi i bluve ka fituar titujt në sezonet 2001-2002 (trajner Sejdini), 2007-2008 (Daja) dhe 2009-2010 (Muça). Gjithsesi, Sulaj nuk ka mundur të fitojë as një Kupë të Shqipërisë.

16. TITUJT E MUCËS
Trajneri i Dinamos, Shkëlqim Muça, riktheu titullin në 60-vjetorin e themelimit të klubit blu, ndërkohë që vetë tekniku fitoi titullin e katërt si trajner, pas atyre me Tiranën në sezonet 1994-1995, 1999-2000 dhe 2006-2007. Gjithsesi, e ardhmja e tij është e pasigurt.

17. PANTEONI BLU
Shkëlqim Muça fitoi një vend në panteonin e trajnerëve fitues të Dinamos, duke qenë i 11-ti që kurorëzohet në 18 titujt e fituar nga blutë. Trajnerët e tjerë janë: Zihni Gjinali (6), Skënder Jareci (2), Durim Shehu (2),Zyber Konçi (1), Sabri Peqini (1), Stavri Lubonja (1), Fatmir Frashëri (1), Bejkush Birçe (1), Faruk Sejdini (1) dhe Ilir Daja (1).

18. GJYQTARËT E HUAJ
Gjyqarë nga Sllovenia me në krye Darko Ceferin gjykuan finalen e edicionit të 58-të të Kupës së Shqipërisë, Besa-Vllaznia (9 maj, 2-1 pas shtesave). Kjo ishte hera e katërt që “bilbila” joshqiptarë gjykuan një finale pasi më parë e kishin bërë tre tillë: dy italianë (Paparesta dhe Farina) dhe një gjerman (Rafati).

19. KOMISIONI I SUPERLIGËS
Koço Kokëdhima, presidenti i nderit të Apolonisë, u zgjodh në krye të Komisionit të Kategorisë Superiore, një organizëm që funksionin brenda Federatës Shqiptare të Futbollit. Ky është hapi i parë për krijimin e Ligës Profesioniste. Klubet do të përcaktojnë dizenjatorin e arbitrave (këtë rol aktualisht e mban Plarent Kotherja, i emëruar nga FSHF).

20. FORMULA: 12 APO 16?
Struktura e kampionatit të ardhshëm (2010-2011) do të jetë me 16 skuadra dhe jo me 12? Hasanbelliu (Teuta), Bizhdili (Besa), Ndreu (Kastrioti) u deklaruan hapur për ndryshimin e strukturës aktuale, ndërsa Fushaj (Vlaznia) ishte kundër. Kokëdhima (Apolonia) tha se kjo çështje do të diskutohet në mbledhjen e ardhshme të Komisionit të Kategorisë Superiore.

21. GRAMOZI-REAL MADRID
Edhe pse Gramozi i Ersekës doli nga Superliga, skuadra kolonjare e ka shkruar emrin jo vetëm në historinë e Kategorisë Superiore, por edhe në atë të futbollit shqiptar. Është e vetmja që ka mundur të luajë me Realin e Madridin, pavarësisht se ishte një miqësore, por luksi ama. Më parë, Tirana kishte luajtur me Milanin. Financuesi i njëjtë: “Taçi Oil”. Fatura: 2.5 milionë euro.

22. FITORET NË TAVOLINË
Tri ndeshje të Kategorisë Superiore u vendosën me rezultat në tavolinë nga Komisioni i Disiplinës. Gramozi-Skënderbeu, java e 26-të (ndeshje e ndërprerë në minutën e 75-të), Flamurtari-Kastrioti (java e 22-të, pas largimit të Kastriotit nga fusha në minutën e 90-të, kur rezultati ishte 1-1) dhe Vllaznia-Skënderbeu (java 28-të, gabim në protokollin e lojtarëve nga Vllaznia).

23. PËRSËRITJA E NDESHJES
Flamurtari-Besa, ndeshja e vlefshme për javën e 18-të Kategorisë Superiore, u luajt dy herë. Takimi i parë “origjinal” u luajt, më 24 janar dhe përfundoi 1-0 për Flamurtarin. Ndeshja u anulua për gabim të gjyqtarit (dhënie dhe anulim të një penalltie në favor të Besës). Takimi i përsëritur dhe i luajtur, më 3 shkurt, u fitua 3-0 nga Flamurtari.

24. MINUS TRI PIKË
Komisioni i Disiplinës i pranë FSHF-së i hoqi 3 pikë Kastriotit për shkak të vetëlargimit gjatë ndeshjes Flamurtari-Kastrioti (java e 22-të). Skuadra krutane u largua nga fusha në minutën e 90-të, kur rezultati ishte 1-1, për shkak të një penalltie të dhënë nga gjyqtari Sokol Jareci. Kastrioti humbi ndeshjen ne tavoline, por edhe tri pike te vlefshme nga renditja e pergjithshme, qe mund ta mbanin sot ne Superlige.

25. “BLACK-OUT” I FAMSHËM
Gramozi-Real Madrid, nuk bëri bujë për ardhjen në Shqipëri të yjeve të gjigantëve spanjollë, si Kristiano Ronaldo, Kaka, Raul, Kazijas apo Benzema, por mori përmasa “ekstreme” në median ndërkombëtare, për shkak “black-out” prej 90 minutash të ndricimit të stadiumit “Qemal Stafa”. “Viktima” ishte ish-drejtori i stadiumit Perikli Dhales.

26. “SHPIKJA” SHKODRANE
Vllaznia, këtë sezon nuk do të mbahet mend për humbjen në finalen e Kupës së Shqipërisë dhe as për mbetjen jashtë Europës, por për “shpikjen” e saj origjinale. Zëvëndëstrajneri Esat Rakiqi bëri një gabim në protokollin e lojtarëve shkodrane, fakt qe u konstatua ne verem fund te takimit. Vllaznia fitoi 3-2 me Skënderbeun në fushë, por e humbi 2-0 në tavolinë.

27. GAFA E BIZHDILIT
Besa, fituesja e Kupës së Shqipërisë (trofeu i dytë i saj në këtë kompeticion) dhe nënkampionia e vendit do të mbahet mend këtë sezon për “gafën” e presidentit Nexhat Bizhidili: akuzimin për pazare, shkarkimin dhe rikthimin në detyrë brenda 72 orëve të trajnerit Shpëtim Duro. Pas verifikimeve “Berluskoni” kavajas riktheu ne pune “Murinjon” e Beses.

27. KONTRASTI I FAZAVE
Dinamo e siguroi matematikisht titullin kampion katër javë përpara përfundimit të sezonit, edhe pse humbi 2-1 në Tiranë me Teutën. Pas dy fazave të dominuara plotësisht, faza e tretë ishte një dështim total i kampionëve në fuqi: 8 humbje në 11 javë, një rekord unikal në Europë. Gjithsesi, Dinamo e mbylli me fitore sezonin: 4-3 kunder Beses.

29. XHEPI I HALILIT
Ndeshja Tirana-Laçi (java 29) ishte parashikuar të luhej në “Selman Stërmasi”, por një ide e presidentit të ish-kampionëve, Refik Halili, e spostoi atë në impiantin ndërkombëtar “Qemal Stafa”, me mendimin e thjeshtë se do të ishte më e lehtë të fitonin kundër kurbinasve. Halili pagoi për të dyja stadiumet si për “Qemal Stafën” ashtu dhe “Selman Stërmasin”, aty ky luajt Dinamo-Teuta (1-2). Por ndërsa Dinamo humbi dhe u shpall kampion, Tirana humbi me Laçin po 1-2 dhe rrëshqiti në vendin e katërt.

30. SHTYERJET E NDESHJEVE
Kushtet e rënduara atmosferike këtë sezon, shiu dhe bora kanë “luajtur” me kalendarin e Superligës, duke anuluar ndeshje e shtyrë madje edhe një javë të tërë. Skënderbeu nuk zhvillloi disa ndeshje në datën e përcaktuar, si ato me Teutën dhe Shkumbinin. Ndeshja Gramozi-Teuta në Kupën e Shqipërisë u ndërpre gjatë zhvillimit.

31. AKUZAT E APOLONISË
Apolonia është klubi i akuzave. Klubi fierak akuzoi katër lojtarë të tij për shitje ndeshjeje: Albert Kaçi, Maringlen Shoshi, Elton Grami dhe Erion Hoti, por që nuk u vërtetuan kurrë. Pak ditë më parë, Maringlen Shoshi akuzoi menaxherin e tij, Elton Marini, se i kishte kërkuar lënien e një ndeshjeje.

32. “LAJTHITJA” E HALILIT
Presidenti i Tiranës, Refik Halili, akuzoi lojtarët e tij se ata janë të lidhur me bastet”. Akuza e fortë e, në mbledhjen e kryesisë së klubit pas humbjes 1-2 me Laçin në “Qemal Stafa”.
Halili: “Janë disa lojtarë që i menaxhojnë kompanitë e basteve.
Kam parë gabime foshnjarake nga lojtarët”.

33. HETIMET E UEFA-s
Vllaznia dhe Tirana u përfshinë zyrtarisht në hetimin e organizuar nga UEFA për dyshime në fiksimin e rezultateve, ku sipas qeverisë së futbollit europian janë shtatë ndeshje ndërkombëtare. Përveç dy klubeve shqiptare janë dhe FC Dinaburg e Letonisë, NK IB Ljubljana e Slovenisë dhe Budapest Honved i Hungarisë.

34. GJYQI DUKA-HALILI
Presidenti i Federatës Shqiptare të Futbollit, Armand Duka ka hedhur në gjyq presidentin e Tiranës, Refik Halili. Bosi i bardhebluve akuzohet për shpifje ndaj bosit të FSHF-së. Pak javë më parë, menjëherë pas listimit të Tiranës nga ana e UEFA-s në ekipet e dyshuara për trukim, Halili akuzoi Dukën se ishte i përfshirë në aferën e tenderit të ndriçimeve të stadiumeve. Ende nuk dihet fati i gjyqit.

35. “QENTË” E NALLBANIT
Portieri i Tiranës, Blendi Nallbani, u akuzua për lënien e golave në favor të Besës gjatë ndeshjeve çerekfinale të Kupës: “Te presidenti Halili janë çuar fjalë se unë kam shitur ndeshjen (Besa-Tirana 2-0 dhe Tirana-Besa 4-2). Njerëzit që i bëjnë këto akuza janë si ata qentë e rrugës që rinë gjithë ditën kot dhe flasin pa asnjë fakt”.

36. GRUSHTI I KRYEBASHKIAKUT
Trajneri i Besës, Shpëtim Duro, u godit me grusht nga kryetari i Bashkisë së Peqinit, Ilir Rrusha, ndërkohë që në incidentin e rëndë është përfshirë edhe zëvendëstrajneri i Shkumbinit, Klodian Dervishi. Ngjarja e rëndë ndodhi menjëherë pas eliminimit të Shkumbinit në gjysmëfinalet Kupës së Shqipërisë, ku Besa fitoi 1-0 në Peqin pas barazimit 1-1 në ndeshjen e parë në Kavajë.

37. “BOKSIERI” HODO
Zyrtari i Gramozit, Altin Hodo, goditi me grusht gjyqtarin gjatë takimit Gramozi-Vllaznia dhe u pezullua përjetësisht nga futbolli. Fusha e Ersekës ka qenë shpesh skenë e dhunës verbale dhe fizike të tifozerisë, madje është dënuar më pare dhe tri herë për të luajtur ndeshje pa praninë e tifozëve.

38. GODITJA E TAFAJT
Trajneri i Tiranës, Alban Tafaj, goditi e gjakosi me kokë sulmuesin e Dinamos, Elis Bakaj, gjatë një sherri masiv pas derbit në javën e 18-të, të përfunduar me fitoren 2-1. Komisioni i Disiplinës e pezulloi një vit drejtorin teknik nga drejtimi i skuadrës.

39. HULIGANËT E GRAMOZIT
Bashkia e Ersekës pas incidenteve Gramozi-Skënderbeu, që sollën edhe ndërprerjen e këtij takimi në minutën e 75-të pas hedhjes së gurëve në fushë, vendosi që “ultrasit” kolonjarë, që krijuan edhe tensionin në derbin juglindor të mos lejohen të hyjnë në stadium për dy vjet rresht. Gramozi në kërkim të “Fair play” të tribunave shfaqet me stil anglez: huliganët “non grata”

40. “PISTOLETA” E LACIT
Klubi i Flamurtarit, përmes drejtorit të Turizmit dhe Sporteve në Bashki, Ilir Metaj, akuzoi Laçin se kishte kërcënuar me pistoletë sulmuesin Migen Memelli në pushimin midis dy pjesëve të takimit Laçi-Flamurtari (3-2, java 21, 12 shkurt 2010). Klubi vlonjat denoncoi ngjarjen në media, por akuza nuk u vërtetua kurrë.

41. GURËT E GRAMOZIT
Takimi Gramozi-Skëndërbeu, java e 25-të e Superligës, një ndeshje e ndërprerë për 20 minuta u pezullua përfundimisht në minutën e 75-të, kur rezultati ishte 1-0 për korçarët për shkak të “breshërive” me gurë të tifozerisë kolonjarë ndaj gjyqtarëve të kryesuar nga Artan Taullahu. Skënderbeu fitoi 2-0 në tavolinë.

42. AUTOBUSI I VLLAZNISË
Barazimi i arritur në takimin Shkumbini-Vllaznia(0-0, java e 23-të), duket se nuk është pritur mirë nga ana e tifozërisë peqinase, e cila menjëherë pas përfundimit të ndeshjes ka demonstruar akte rrugaçërie ndaj ekipit të Vllaznisë. Grumbuj tifozësh peqinas i bënë pritë autobusit të Vllaznisë, duke i thyer xhamat.

43. “FERRI” I ERSEKËS
Sulmuesi i Laçit, Jetmir Nino, rrezikoi jetën në Ersekë në ndeshjen Gramozi-Laçi (1-2, java 13). Futbollisti laçjan u godit me shkelma e grushte në hyrje të dhomave të zhveshjes. Nino shkëmbeu fjalë me tone të ashpra me sulmuesin e Gramozit, Genn Hyseni (autori i golit të vetëm të kolonjarëve), dhe ky i fundit e goditi me grushte. Nino ra pa ndjenja dhe u dërgua me ambulancë, ku mjekët e risollën në vete.

43. NDËSHKIMET E NDREUT
Trajneri i Kastriotit, Ramadan Ndreu është ndëshkuar dy herë nga Komisioni i Disiplinës pranë Federatës Shqiptare të Futbollit, për të mos drejtuar në bankinë skuadrën e tij, herën e parë 10 javë (u reduktua më pas në 5 javë nga Apeli) dhe herën e dytë dy javë. Heren e pare Ndreu kishte goditur mbrojtesin kroat Djarmati, te cilin ne pjesen e dyte te sezonit e pati nen urdherat e tij.

45. 22 TRAJNERË
Në bankinat e 12 skuadrave të Superligës këtë sezon janë ulur 22 trajnerë, ku rekordin e mban Tirana, me pesë lëvizje në stafetën 26 javëve të zhvilluara: Lonçareviç-Tafaj-Dede-Muka-Starova. Shkumbini, Skenderbeu dhe Vllaznua u drejtuan nga 3 trajnerë.
Apolonia, Flamurtari, Gramozi dhe Teuta nga 2.

46. KATËR TË “BETONUAR”
Vetëm katër ekipe nga 12 skuadra që ka Superliga nuk i kanë ndryshuar trajnerët: Dinamo (Shkëlqim Muça), Besa (Shpëtim Duro) dhe Laçi (Stavri Nica) dhe Kastrioti (Ramadan Ndreu). Gjithsesi, duhen theksuar dorëheqjet dhe rikthimet e Shpëtim Duros te Besa, Përparim Daiut te Shkumbini, Ramadan Ndreu te Kastrioti dhe Edi Martinit te Vllaznia.

47. “REKORDI” I TIRANËS
Tirana, rekordmenia e Shqipërisë vendosi një rekord unikal. Ndryshoi pesë trajnerë brenda këtij sezoni: kroati Ilija Lonçareviç (nga java 1-6); Alban Tafaj (nga java e 7-18): Nevil Dede (nga java 19), Devi Muka (nga java 20-25) dhe Sulejman Starova (nga java 26).

48. PODIUMI I LARGIMEVE
Gugash Magani ishte trajneri i parë që dha dorëheqjen këtë sezon. Ish-tekniku i Shkumbinit dha dorëheqjen pas javës së dytë, e që përkoi me humbjen 2-1 në Peqin me Besën e Kavajës. Eqerem Memushi i Flamurtarit u shkarkua në javën e katërt, ai i Gramozit, Ilir Qirjako, në javën e pestë.

49. RIPUNËSIMET E TEKNIKËVE
Janë tre trajnerët që brenda një sezoni kanë drejtuar dy skuadra: Gugash Magani nga Shkumbini (e drejtoi 2 javë) te Flamurtari(nga java e 5-), Hasan Lika nga Vllaznia (5 javë) te Apolonia (nga java 11) dhe Mirel Josa nga Teuta (e drejtoi 19 javë) te Skëndebeu (nga java 21).

50. “SHAKAJA” E NDREUT
Ramadan Ndreu dha direkt në televizion dorëheqjen nga skuadra e Kastriotit pas humbjes në ndeshjen kyçe me Skënderbeun (2-1) në javën e 26-të të Superligës, një prej rivalëve direkt për mbijetesë. Dorëheqja e tij nuk u pranua nga presidenti Artan Djala. Ndoshta e kishte kuptuar shakanë e Ndreut.

Burimi: Albania-sport.com

separator

Blanko: Konkurrenca rrit cilësinë te Dinamo

Saturday, July 31st, 2010

Sipas trajnerit dinamovit Luiz Blanko, Dinamos i nevojiten afrime e reja për të progresuar mes grupit

Dinamo, krahas merkatos së vazhdueshme verore, tashmë do të udhëtojë drejt Sllovenisë për të kryer fazën përgatitore numër 2, pasi një të tillë blutë e kanë zhvilluar përpara performancës në Ligës e Kampionëve. Numri një i pankinës dinamovite Luis Blanko, tashmë është konfirmuar në krye të Dinamos edhe për sezonin 2010 2011. I intervistuar nga mediat e pranishme përpara nisjes drejt Sllovenisë, ai ka komentuar lakimet e fundit të merkatos së Dinamos, duke e konsideruar pozitive konkurrencën në skuadër.

Emrat e fundit që fliten në radhët e dinamovitëve janë luksi, kur bëhet fjalë për Dorian Bylykbashin dhe Ervin Bulkun. Ndërkohë që Blanko komenton edhe miqësoret e luksit ndaj Real Sociedad dhe Palermos, të cilat sipas tij, ia rritin piacën Dinamos, duke ngritur cilësinë dhe përkushtimin.

- Sa ju shërben kjo fazë përgatitore sërish në Maribor të Sllovenisë?
- Janë 8 ditë intensive dhe do të zhvillojmë 3 ndeshje miqësore dhe kjo fazë do të na shërbejë shumë. Flitet për kundërshtarë me infrastrukturë të nivelit të parë dhe ne do të na shërbejë shumë për të rritur cilësinë dhe nivelin profesional. Nuk ka se si të ndodhë ndryshe, kur flitet për ekipe si Real Sociedad dhe Palermo.

- Me çfarë strategjie do të ndërtohet stërvitja juaj atje?
- Skuadra duhet të mendojë për Ligën e Kampionëve, edhe stërvitja, mentaliteti, përkushtimi e gjithçka duhet të bazohen në këtë nivel që të mendojmë për të ardhmen. Sigurisht, në fillim duhet të mendojmë për t’u shpallur kampionë të Shqipërisë, por unë jam i bindur se, duke punuar në ritmet e Ligës së Kampioneve, do të arrihet edhe objektivi në kampionat. Kujtoj që në përballjet me Sherif Tiraspolin patëm vetëm 1 muaj kohë për të përgatitur ekipin.

- Flitet për dy lojtarë të kombëtares. Ju jeni në dijeni?
- Po, jam në dijeni që ata mund të vijnë.
- A i njihni Bylykbashin dhe Bulkun si futbollistë?
- Po, kam parë disa video të kombëtares. Sigurisht, ato nuk ishin aktuale, por më shërbyen për të parë karakteristikat e futbollistëve. Do të shohim cili nga ata do t’i bashkohet Dinamos.
- Konkurrenca në skuadër është negative apo pozitive?

- Për mendimin tim, pozitive. Unë jam për idenë që të ketë konkurrencë, është e vetmja mënyrë që skuadra të rritet në nivel. Nëse dikush nuk është i përqendruar në punën e tij, atëherë ka dikënd tjetër pas shpine që e pret. Ndërkohë, nëse do të kemi vetëm 11 futbollistë, spontanisht futbollistët nuk japin më të mirën e tyre.

- Të kesh disa futbollistë të kombëtares është një luks i madh. A e ndieni diçka të tillë?
- Eshtë luks. Le të jenë edhe 10 futbollistë nga kombëtarja, është diçka pozitive. Gjithnjë është diçka e mirë kur ke lojtarë me nivel teknikë në skuadër. Edhe skuadra me këta elementë funksionon më mirë.

Blanko: Konkurrenca rrit cilësinë te Dinamo

separator

Ks Shkumbini Peqin is proudly powered by WordPress
Entries (RSS) and Comments (RSS).
Theme by Spanish Translation US.