Posts Tagged ‘superliga’

Tirana nuk ngroh askënd, trajneri Starova me sytë nga “dera”…

Friday, August 13th, 2010

Largimi i papritur i Julian Ahmatajt e ka bërë me dhimbje koke “Bobin” para startit të kampionatit

Largimi i papritur i mesfushorit të majtë Julian Ahmataj drejt Flamurtarit, duket se ka shokuar jo vetëm trajnerin e Tiranës, Sulejman Starova, por edhe lojtarët dhe sportdashësit bardheblu. Pas largimit të Abrahamit, krahu i majtë tashmë është një problem për bardheblutë. Vetë trajneri i bardhebluve, Sulejman Starova, gjatë bisedës që patëm dje më të për “Sportin shqiptar”, pohoi: “Largimi i Julian Ahmatajt natyrisht që na hap probleme, pasi dihej kontributi që ai ka dhënë për Tiranën gjatë sezonit të kaluar. Ai është një lojtar me eksperiencë, që do të na bënte shumë punë edhe për sezonin e ri që po troket. Ahmataj ishte llogaritur si pjesë e formacionit në skuadër dhe largimi i tij na krijon jo pak probleme në krahun e majtë, pasi nga ana teknike është lojtar që luan si mesfushor, por edhe në mbrojtje. Krahas largimeve të shumta pas kampionatit, ikja e Ahmatajt e komplikon pak më tepër situatën. Por Ahmatajt i erdhi një ofertë shumë e mirë dhe, duke qenë se është në kulmin e karrierës, ne nuk mund ta pengonim. Megjithatë, unë jam në pritje të përforcimeve që do të bëjë presidenti Refik Halili së bashku me klubin. Po presim afrimin e Gilman Likës, me të cilin, me sa di unë, drejtuesit janë në bisedime, por edhe Bulkun. Gjithashtu, mund të rikthehet edhe sulmuesi Sebino Plaku. Në qoftë se vijnë këta tre lojtarë, atëherë situata do të jetë akoma më e mirë, në qoftë se nuk vijnë, do të mundohemi që rreth këtij grupi të ndërtojmë një skuadër dinjitoze,”- u shpreh “Bobi”.

Letonezi Silagails, përfundimisht bardheblu
Duket se besimin e trajnerit Starova e ka fituar edhe mbrojtësi letonez, Artur Silagails, për të cilin trajneri i kryeqytetasve është shprehur me nota pozitive. Dje, “Bobi” ka thënë se Silagails është zyrtarisht pjesë e skuadrës së Tiranës: “Mbrojtësi Silagails, siç e kam thënë edhe më parë qëkur këto dy javë që ka qenë pjesë e skuadrës sonë, ka treguar nivel të njëjtë me lojtarët e tjerë të repartit të mbrojtjes. Në miqësoret që kemi zhvilluar me Tërbunin dhe Besëlidhjen ai ka luajtur si titullar, duke ma mbushur mendjen se vlen si lojtar për ekipin tonë. Mendoj se gjatë kampionatit ai do të përshtatet akoma më tepër dhe do të jetë një forcë e madhe në repartin e mbrojtjes,” – e përfundoi prononcimin e tij për “Sportin shqiptar” trajneri i skuadrës së Tiranës, Sulejman Starova.

Dimraj: Plakun e presim të vijë sot
Pavarësisht se sulmuesi Sebino Plaku aktualisht po stërvitet në radhët e ekipit të Flamurtarit, drejtuesit e klubit bardheblu shpresojnë që ai shumë shpejt të vihet sërish nën urdhrat e trajnerit Sulejman Starova. Këtë e konfirmon edhe shefi i klubit të Tiranës, Rauf Dimraj. “Plakun e presim që të rikthehet sot në stërvitje me skuadrën tonë. Kam folur edhe me presidentin Halili dhe e kam diskutuar disa herë këtë çështje dhe ai është i preokupuar që ta rikthejë Plakun. Madje presidenti Halili më tha se do t’i paguante pagat e prapambetura dje dhe Plaku do të rikthehej sërish këtu. Edhe me Sebinon kam pasur kontakte gjatë këtyre ditëve dhe ai ka thënë se, në qoftë se dëmshpërblehet, atëherë do të rikthehet sërish te Tirana. Shefi Dimraj foli edhe për përforcimet që mund të vijnë te bardheblutë. “Krahas rikthimit të Plakut, jemi në bisedime me Likën dhe Bulkun. Por kemi hyrë në tratativa edhe për afrimin e një lojtari shumë të mirë, emrin e të cilit nuk mund ta përmend, sepse jemi në periudhë merkatoje dhe i prishim punë vetes,”- theksoi dje shefi i klubit të Tiranës, Rauf Dimraj.

Andi Lila bashkohet me skuadrën
Mbrojtësi i bardhebluve Andi Lila, i cili ka qenë nën urdhrat e trajnerit të përfaqësueses Jospi Kuzhe dhe është aktivizuar në miqësoren me Uzbekistanin, dje është vënë nën urdhrat e Starovës. Lila po gëzon një formë të mirë dhe kjo do ta ndihmojë së tepërmi Tiranën në kampionat, aq më tepër që krahas detyrës së mbrojtësit ai po luan shumë mirë edhe si shkatërrues.

Pas Laçit, “operacion fshesa”
Duket se pas miqësores së zhvilluar të mërkurën me ekipin e Laçit, që u fitua me rezultatin 2-1 nga bardheblutë, pritet që disa lojtarë të largohen andej nga kanë ardhur. Konkretisht bëhet fjalë për disa lojtarë të rinj, të cilët nuk ia kanë mbushur mendjen stafit të ekipit të Tiranës. Këtë e konfirmojnë burime pranë pankinës bardheblu.

/sportishqiptar/

separator

Shkumbini, sot testi i radhës me Bylisin

Thursday, August 12th, 2010

Peqinasit do të luajnë miqësoren e fundit në Strugë dhe nesër do të kthehen në Shqipëri

Ekipi Shkumbinit do të luajë sot një tjetër takim miqësor në stadiumin e Strugës. Përballë do të jetë Bylisi, i rikthyer në superligë. Për ekipin e Josës do të jetë miqësorja e 6-të dhe e fundit në Strugë, pasi nesër peqinasit do të kthehen në qytetin e tyre. Në 5 miqësoret e para Shkumbini ka bërë një paraqitje të mirë, duke fituar 4 takime dhe barazuar vetëm atë me Flamurtarin. Nga presidenti Ylli Ndroqi është investuar si asnjëherë tjetër për këtë ekip, me qëllim që të jetë pretendent për trofe. Kanë ardhur futbollistë nga më të mirët e kampionatit shqiptar dhe faza përgatitore është bërë në kushte ideale në Maqedoni.

Kështu, Shkumbini do të jetë plotësisht gati për nisjen e kampionatit javën e ardhshme. I fundit që është bashkuar me këtë ekip është mesfushori durrsak, Bledar Hodo, i cili, pas nënshkrimit të kontratës me presidentin Ndroqi, ka shkuar në Strugë. Ai ka zhvilluar dje seancën e parë stërvitore, ndërkohë që trajneri Josa “blindon” mesfushën. Lorenc Pashja, ish kapiteni ekipit, është detyruar të largohet përpara kohe nga Struga, pasi të martën paradite është dëmtuar gjatë stërvitjes.

Mjeku Edmond Mukaj ka vendosur që veterani të kthehet në Shqipëri për të bërë një ekzaminim më të saktë për të mësuar shkallën e dëmtimit. Këtë gjë ai e ka bërë dje dhe është mësuar se dëmtimi nuk është aq i rëndë sa u mendua në fillim. Pashjes i është rekomanduar vetëm një javë pushim. Nesër Shkumbini i jep fund periudhës përgatitore në Maqedoni, ku u stërvit një muaj. Nga drejtuesit është menduar që ekipi të zhvillojë nesër një seancë paradite dhe pas drekës të marrë rrugën drejt Peqinit.

Doku: Jam përshtatur mjaft mirë në Laç

Elton Doku është një nga lojtarët e afruar në merkaton e verës tek ekipi i Laçit. Mbrojtësi tiranas, i cili e mbylli sezonin e kaluar te Skënderbeu, hedh poshtë zërat që qarkullojnë për një “dështim” të ekipit kurbinas këtë sezon: “Faza përgatitore e zhvilluar në Mavrovë ishtë nga më të mirat që kam bërë. Puna e stafit teknik ishte e mrekullueshme dhe ngarkesa mjaft efektive. Shpresoj që kjo ngarkesë dhe stërvitja intensive që po zhvillojmë edhe në Shqipëri, të na shërbejë për ta përballuar kampionatin sa më mirë. Laçi ka luajtur 5 ndeshje miqësore, ku, edhe pse nuk kemi pasur rezultate të mira, mendoj se nuk duhet të shqetësohemi, pasi ato më shumë kanë qenë për të testuar lojtarët. Disa fusha, ku kemi luajtur, kanë qenë tërësisht të papërshtatshme dhe nuk na kanë lejuar të zhvillonim një lojë të vërtetë. Megjithatë, po punojmë dhe po stërvitemi shumë fort.

Të gjithë jemi të kënaqur, ndërsa unë po përshtatem mjaft mirë në Laç. Gjithashtu, presim edhe ndonjë përforcim, por këto gjëra janë në kompetencat e drejtuesve tanë. Për zërat që Laçi nuk do përfaqësohet denjësisht këtë sezon, them që janë fjalë të atyre që nuk ia duan të mirën këtij klubi. Ne nuk kemi frikë dhe besoj shumë se në ndeshjen e parë, që e kemi në Durrës me Teutën, nuk do të dalim pa gjë. Do të jetë një fillim i mbarë, që do ta arrijmë bashkë me tifozët laçianë,” ka theksuar mbrojtës i Laçit, Elton Doku. Ndërkohë, në Laç po kërkojnë edhe një portier, sepse pas largimit të Ervin Llanit, kuadrati bardhezi ka mbetur i zhveshur. Kurse dje është kthyer në Laç sulmuesi Julian Malo.

/sportishqiptar/

separator

Elbasani merr Emiljano Çelën

Thursday, August 12th, 2010

Verdheblutë shtojnë radhët. Presidenti Laze konfirmon ardhjen e mbrojtësit të krahut

Elbasani ka bërë lëvizjen e radhës në merkato, duke siguruar shërbimet e mbrojtësit Emiljano Çela. Lajmi është konfirmuar mesditës e së mërkurës nga presidenti i skuadrës së Elbasanit, Arben Laze. Në një kohë që ekipi verdheblu bëhej gati të nisej drejt Vlorës për të luajtur miqësoren e radhës, numri një i klubit elbasanas, Laze, sapo kishte arritur akordin me lojtarin.

Në fakt, dukej pak surprizë një lëvizje e tillë në merkato, sepse mbrojtësi Çela kishte afro 2 javë që stërvitej te Bylisi, ku ishte deklaruar si një blerje e ballshiotëve. Por Laze ka pohuar se me këtë futbollist është mbyllur gjithçka me dijeninë edhe të klubit ballshiot dhe lojtari do të fillojë ditën e enjte stërvitjen me pjesën tjetër të ekipit. “Blerja e radhës që kemi bërë është Emiljano Çela. Me lojtarin kemi mbyllur gjithçka edhe sa i takon anës financiare.

Ky mbrojtës që nga dita e hënë do të jetë nën drejtimin e trajnerit Krenar Alimehmeti. Të enjten, gjithashtu ardhja e tij do të bëhet zyrtare, pasi do të firmoset edhe kontrata. Pra, duke qenë se parimisht mes nesh është mbyllur gjithçka pozitivisht, Çela mund të konfirmohet si lojtari ynë,” – ka pohuar Arben Laze për gazetën. Burime të sigurta për “Sportin shqiptar” thanë se kalimi i lojtarit tek Elbasani është lehtësuar ndjeshëm, si pasojë e marrëdhenieve shumë të mira që presidenti Laze ka me kolegun e tij ballshiot, Besnik Kapllanaj.

Nuk dihen megjithatë shkaqet se përse Bylisi nuk këmbënguli ta mbajë këtë lojtar në organikë për sezonin e ri. Emiljano Çela është 24 vjeç dhe ka disa sezone që aktizohet rregullisht në kategorinë e parë dhe në superligë me skuadra si Apolonia, Lushnja dhe së fundi me Laçin, ku ka bërë një sezon shumë të mirë. Çela është një mbrojtës me fizik të mirë dhe preferon të luajë në të majtë të këtij reparti. Por e veçanta e tij është se mund të luajë edhe në të djathtë, ashtu si dhe mesfushor, çka mund t’i shërbejë shumë trajnerit Alimehmeti për skemat e tij taktike.

Tani që ka afruar edhe një tjetër lojtar, Laze ka si objektiv të rëndësishëm të gjejë edhe një qendërmbrojtës cilësor, gjë që është kërkuar me ngulm edhe nga trajneri Alimehmeti, që ka në dispozicion vetëm Ramazanin, Muçën dhe Bellon.

Lazes i qan zemra për Bylykbashin

Ndërkohë që po mendon për një lojtar të fortë në zemër të mbrojtjes, mendja e Lazes dhe e gjithë drejtuesve të skuadrës së Elbasanit punon për Dorian Bylykbashin, gjë të cilën nuk e fsheh presidenti i verdhebluve. “Do të bëjmë të pamundurën për të marrë shërbimet e Dorit. E dimë shumë mirë se me të do të jemi një skuadër shumë herë më e frikshme.

Bylykbashi është një lojtar që mund të ndryshojë i vetëm fatet e një ndeshjeje. Për të ia vlen të sakrifikojmë pak më shumë. Të shohim se çfarë do të ndodhë, edhe pse unë jam shumë optimist,” – përfundoi Arben Laze. Në të vërtetë, edhe miqësorja e fundit kundër Besës tregoi se me një lojtar të tillë në organikë, ekipi i trajnerit Alimehmeti do të ishte krejt ndryshe. Por a janë paratë e duhura për të bindur fantazistin e kombëtares?

Flamurtari “shpartallon” Elbasanin në miqësore

Flamurtari e ka fituar me rezultatin e thellë, 4-0, ndeshjen e radhës miqësore. Në Vlorë kanë qenë miq elbasanasit, të cilët janë mundur keq. Roshi dhe Plaku kanë shënuar nga një gol në pjesën e parë, për ta bërë të njëjtën gjë edhe në 45 minutat e dyta.

Pra, fieraku dhe kryeqytetasi i Flamurtarit kanë realizuar nga një dygolësh në këtë miqësore, ku të besuarit e trajnerit Gugash Magani kanë treguar supermacinë e tyre. Ky është një tjetër sinjal i qartë se vlonjatët do të jenë pretendentë në kampionatin që nis javën e ardhshme. Ata kanë bërë një merkato të studiuar mirë, duke afruar lojtarë cilësorë dhe me përvojë, ku i fundit është elbasanasi Julian Ahmataj.
Elton Nika

/sportishqiptar/

separator

KE vendos: Superliga, 14 ekipe në sezonin 2011-2012

Thursday, August 12th, 2010

Komiteti ekzektutv ka kryer dje një mbledhje maratonë ku vendos struktura e sezonit 2011-2012

Komiteti ekzekutiv i FSHF-së ka zhvilluar dje mbledhjen e radhës, ku primare ishte shqyrtimi i propozimit të komisionit të klubeve të kategorisë superiore për një pjesëmarrje më të gjerë në sezonin 2011-2012, ku në përfundim është arritur që ajo të përbëhet nga 14 skuadra. Mbledhja ka nisur pasdite dhe ka zgjatur më shumë se tri orë, ku ka pasur edhe debate mes palëve për çështjet që janë diskutuar, kryesisht për rregulloren e edicionit të ri. Nga 12 anëtarë që përbëhet ky komitet, nuk ishin të pranishëm në mbledhjen e djeshme vetëm dy, Artan Hajdari dhe Arben Dervishi.

I pranishëm ishte edhe zoti Koço Kokëdhima, kryetar i Komisionit të Klubeve të Kategorisë Superiore, që në emër të komisionit që përfaqëson, ka paraqitur propozimin e klubeve që kategoria superiore, duke filluar nga sezoni 2011-2012 të ketë më shumë ekipe. Debati për zgjerimin e strukturën ka nisur prej kohësh dhe ka pasur dy mendime, që superliga të bëhet me 16 ose me 14 ekipe. Por pas mbledhjes së djeshme, gjithçka është bërë e qartë, ku në sezonin 2011-2012 në kategorinë superiore do të marrin pjesë 14 skuadra. Ky ka qenë edhe vendimi kryesor që është marrë në mbledhjen e djeshme nga KE (komiteti ekzekutiv), por nuk është detajuar asgjë rreth mënyrës dhe formës organizative se si do të funksionojë ky sezon.

Pa dyshim që duke filluar nga muaj shtator, do të nisin konsultimet mes komisionit të klubeve të kategorisë superiore dhe FSHF-së, për të mbledhur opinionin e të gjithëve skuadrave, në mënyrë që në fund të merret një vendim unanim se si do të funksionojë superliga e sezonit 2011-2012. Për herë të fundit kategoria superiore e ka pasur strukturën me 14 ekipe pikërisht në sezonin 2002-2003. Struktura aktuale që përdor kategoria superiore është huazuar nga Kroacia, por edhe atje, duke nisur nga ky vit, kjo lloj strukture nuk aplikohet më.

Miratohet shefi i gjyqtarëve, Arsen Hoxha

Dihet që para disa kohësh Komisioni i Klubeve të Kategorisë Superiore vendosi që Arsen Hoxha të jetë shefi, ose e thënë ndryshe dizenjatori i gjyqtarëve të kategorisë superiore. Edhe ky propozim është shqyrtuar në mbledhjen e djeshme të KE-së dhe në fund është miratuar. Pra, duke filluar nga ky edicion, 2010-2011, ish-gjyqtari i kategorisë ndërkombëtare, Arsen Hoxha do të jetë dizenjatori i gjyqtarëve të ndeshjeve të kategorisë superiore. Ndërsa Plarent Kotherja vazhdon punën e tij në federatë si shef i gjyqtarëve, por tashmë puna e tij do të jetë e fokusuar te kategoria e parë dhe e dytë, si dhe te kampionati i moshave. Përveç Arsen Hoxhës si dizenjator i gjyqtarëve të superiores, dje KE ka miratuar edhe toplistën e gjyqtarëve, që pa dyshim do të kenë barrën kryesore në arbitrimin e ndeshjeve të sezonit që është në prag.
KE, sërish mbledhje më 19 gusht

Përveç çështjeve të mësipërme, në mbledhjen e djeshme të KE është folur edhe për sezonin e ri, që pritet të fillojë më 21 gusht. Është vendosur që në përfundim të edicionit 2010-2011 dy ekipet e fundit të kategorisë superiore (vendi 11 dhe 12) bien automatikisht në kategorinë e parë, ndërsa katër ekipet e para të kategorisë së parë ngjiten direkt në superiore. Por do të ketë edhe ndeshje shtesë, ku vendi 9 dhe 10 i superligës do të kryejë ndeshje “play-off”-i me të pestën dhe të gjashtën e kategorisë së parë dhe fituesi i këtyre përballjeve fiton të drejtën të jetë pjesë e kategorisë superiore të sezonit 2011-2012. Por për mungesë materialesh, kuorumi dhe kohe, është vendosur që KE të mblidhet sërish më 19 gusht, në të cilin do të përcaktohen edhe rregullat e sezonit 2010-2011.

Ka pasur debate kryesisht rreth mënyrës së zhvillimit të fazës së tretë të edicionit të ri. Ka pasur mendime që në përfundim të dy fazave, gjashtë të parat të diskutonin titullin dhe gjashtë të dytat qëndrimin në superligë, por ka pasur edhe propozime që në përfundim të dy fazave pikët e skuadrave të përgjysmoheshin dhe në fazën e tretë të vazhdonte gara për përcaktimin e verdikteve. Duke ditur që një sezon më pas kategoria superiore do të ndryshojë strukturën e saj, KE e ka parë të udhës që edhe këtë vit, me që është e fundit, faza e tretë të vijojë ashtu siç është kryer në të shkuarën. Njëkohësisht, në parim është rënë dakord për ristrukturimin edhe të sekretariatit në federatë, por kjo çështje do të diskutohet sërish në mbledhjen e radhës. Pra, me 19 gusht, KE do të kryejë mbledhjen e radhës, ku do të përcaktojë rregulloren e sezonit të ri dhe ndryshimet në strukturën e sekretariatit të FSHF-së.

8
Pas 8 edicionesh, rikthehet përsëri struktura organizative e kampionateve kombëtare të futbollit me nga 14 skuadra për Kategorinë e Parë, apo siç quhet tani, Kategoria Superiore. Për herë të fundit një format i tillë është përdorur në sezonin 2002 2003.

3
Pas viteve 2000, në tri edicione, struktura e kampionateve kombëtare të Kategorisë së Parë është zhvilluar me nga 10 skuadra pjesëmarrëse, të cilat luanin me sistem vajtje ardhje, me katër faza. Konkretisht kjo ka ndodhur në harkun kohor 2003 2006.

5
Edicione radhazi ka zgjatur formula ekzistuese e kampionateve kombëtare me nga 12 skuadra, që ndesheshin në tri faza. Kjo formë, e huazuar nga kampionatit kroat, nisi në Kampionatin e 68 të për të vazhduar deri në të 72 tin, që pritet të nisë më 21 gusht.

Superkupa, Dinamo-Besa shtyhet më 16 gusht
Ishte menduar që sezoni i ri do të ngrinte siparin më 15 gusht me ndeshjen e superkupës, Dinamo-Besa. Por dje është mësuar se se kjo ndeshje do të shtyhet një ditë dhe do të zhvillohet në Durrës. Pra, takimi i Superkupës Dinamo-Besa do të zhvillohet më 16 gusht në stadiumin “Niko Dovana” të Durrësit dhe ashtu si, miqësorja Shqipëri-Uzbekistan, do të mbahet në dritat e projektorëve të sapopëruruar.

Ervin Skela në fokusin e Lask Linzit në Austri
Mesfushor i kombëtares shqiptare, Ervin Skela, vazhdon të jetë lojtar i lirë. Pas një sezoni jo të mirë me Koblencin në bundesligën e dytë të Gjermanisë, vlonjati po kërkon një ekip të ri, por ende nuk ka gjetur një strehë. Dje është mësuar se për shërbimet e mesfushorit kuqezi është interesuar skuadra austriake e Lask Linzit. Në katër javët e para Lasku nuk ka marrë asnjë pikë, kështu që drejtuesit kërkojnë përforcime të reja kryesisht në mesfushë. Përveç Skelës, kandidaturë është edhe shqiptaro-maqedonasi Emin Sulimani, që luan me Austrinë e Vjenës.

/sportishqiptar/

separator

Plori: Edhe një sulmues dhe jemi pretendentë!

Thursday, August 12th, 2010

Krahu i djathtë i trajnerit Radonjiç, shkodrani Elvis Plori, shprehet optimist për Vllazninë e këtij edicioni

Të martën në darkë, ekipi shkodran ka mbërritur në qytetin e tij. Pas 15 ditësh stërvitje në Zllatibor, aty ku gjithçka ka shkuar mirë sa u takon përgatitjeve dhe bërjes gati për sezonin e ri. Në pamje të parë, për Vllazninë gjërat nuk janë ende në lartësinë e duhur, nisur pikërisht nga rezultatet e ndeshjeve miqësore. Por krejt ndryshe mendojnë pjesëtarët e stafit drejtues të skuadrës kuqeblu. Njëri prej tyre, pikërisht krahu i djathtë i trajnerit Radonjiç dhe njëkohësisht ndihmësi i tij, Elvis Plori, në një intervistë për “Sportin shqiptar” shpjegon gjithçka ka ndodhur në ditët e qëndrimit në Serbi. Ja intervista e tij:

- Z. Plori, pas dy javësh qëndrimi në Zllatibor, cila është gjendja e skuadrës aktualisht?

- Mund të them se kemi zhvilluar një stërvitje të përkryer, në kushte tepër komode dhe për rrjedhojë gjërat kanë shkuar shumë mirë. Nuk kemi pasur asnjë dëmtim serioz gjatë gjithë këtyre ditëve. Më e shumta, ka qenë ndonjë dëmtim i vogël që i ka kushtëzuar lojtarit ndonjë qëndrim mënjanë për një apo dy ditë. Skuadra tashmë ka arritur formën e duhur dhe besoj se jemi në rrugën që kemi menduar.

- Ndërkohë, miqësoret që Vllaznia ka zhvilluar nuk kanë bindur shumë. Sa e shprehin realitetin e skuadrës ato miqësore?

- Në radhë të parë, dua të them se kemi luajtur përgjithësisht ndaj kundërshtarëve shumë të fortë. Shumica e tyre vinin pas pjesëmarrjeve në Kupat e Europës dhe ishin në kulmin e tyre, ndërkohë që ne ishim më prapa sa u takon përgatitjeve. Megjithatë, jemi përballur denjësisht dhe mendoj se po bëjmë gjëra të mira. Vllaznia ka ardhur duke e rritur formën e saj dhe deri në momentin e fillimit të kampionatit, besoj se do të kapë formën e duhur.

- E çuditshme, por disa nga titullarët e skuadrës nuk kanë luajtur titullarë në këto miqësore ngaqë nuk kanë formën e duhur. Çfarë po ndodh me ta?

- Ajo që ne konstatojmë është se futbollistët e Vllaznisë kanë pushuar për një kohë relativisht të gjatë këtë verë. Ata nga mesi i majit dhe deri në javën e parë të korrikut, pra për gati 50 ditë, kanë bërë pushim absolute, duke e rënduar jo pak peshën e trupit të tyre. Nuk u kishte ndodhur kështu asnjëherë këto vitet e fundit ngaqë Vllaznia ka marrë pjesë gjithnjë rregullisht në Kupat e Europës. Duke mos marrë pjesë sivjet, ata ndërprenë stërvitjen dhe për këtë arsye, disa prej futbollistëve e patën të vështirë të tregonin formën e tyre të vërtetë dhe të kapnin ritmin e grupit.

- Kanë luajtur në ndeshjet miqësore disa futbollistë të rinj. Eshtë politikë e vetë stafit për t’i promovuar apo vërtet gëzojnë formë të mirë?

- Trajneri Radonjiç ua ka bërë të qartë gjithë futbollistëve se do të luajë ai që stërvitet më mirë. Disa prej të rinjve, natyrisht jot ë gjithë, kanë treguar formë shumë të mirë. Kanë treguar rezistencë të lartë dhe e kanë justifikuar plotësisht besimin e stafit. Do të veçoja sidomos dy futbollistë, Hasanin dhe Djepaxhinë, që janë treguar në lartësinë e duhur në të gjitha testet e bëra.

- Si është pritur vendimi për lënien në stol të disa titullarëve?

- Trajneri Radonjiç ka një mënyrë të veçantë komunikimi. Pasi vendos për zgjedhjet e tij, ai shkon e takon një nga një lojtarët që nuk janë në këtë listë të përzgjedhurish dhe ua bën të qartë pse nuk luajnë. Përgjithësisht, edhe lojtarët e kanë kuptuar këtë situatë dhe i janë përshtatur.

- Po në aspektin profesional, çfarë kishte të veçantë stërvitja në Serbi?

- Do të veçoja testet kompjuterike. Për Vllazninë mund të them se është hera e parë që i bën dhe janë teste që nxjerrin “të palarat” e çdo futbollisti. Këto teste natyrisht që janë një ndihmë e madhe edhe për ne trajnerët për të kuptuar gjendjen e secilit futbollist. – A është gati Vllaznia për nisjen e sezonit të ri?

- Kemi zhvilluar një fazë përgatitore shumë të mirë. Tashmë vjen momenti për uljen e ngarkesave të stërvitjes dhe bërjen gati për nisjen e kampionatit. Jam i bindur se do bëjmë gjëra të mira.

- Për Plorin, a mund të pretendojë kjo skuadër në edicionin e ri?

- Na duhet edhe një sulmues cilësor, sepse kemi pak mangësi në këtë repart. Aktualisht kemi vetëm një sulmues e gjysmë në dispozicion. Nëse na vjen edhe një sulmues tjetër, besoj se do të jemi shumë kompetitivë dhe pretendentë në sezonin e ri.

Dy ditë pushim pas kthimit nga Serbia

Trajneri Mojash Radonjiç ka vendosur që ta lërë pushim skuadrën e tij pas kthimit nga Serbia. Dhe jo një ditë, por dy të tilla, në mënyrë që futbollistët të çlodhen plotësisht nga ngarkesat e mëdha fizike që kanë marrë gjatë ditëve të qëndrimit në Serbi dhe të bëhen gati për nisjen e kampionatit. Në këtë mënyrë, ditën e djeshme, por edhe të sotmen, kuqeblutë e kanë shfrytëzuar për t’u relaksuar në njëfarë mënyre.

Jovanoviç, një sulmues që mund të vijë

Një ditë para se të kthehet në Shkodër, tek ekipi i Vllaznisë kanë dalë në stërvitje edhe dy futbollistë të tjerë serbë që kishin ardhur për provë. Njëri prej tyre luante si mbrojtës i majtë dhe tjetri një sulmues. Për këtë të fundit, shkodranët kanë treguar më tepër interes. Janë zhvilluar bisedimet paraprake me të dhe tashmë pritet edhe vendimi i presidentit Fushaj për anën financiare të kontratës. Trajnerit Radonjiç i pëlqen ky sulmues që quhet Jovanoviç dhe mbase mund të jetë pjesë e skuadrës në vazhdim.

Vjen tapeti, sot nis shtrimi i “Loro Boriçit”

Pasditen e djeshme ka mbërritur në Shkodër tapeti i ri i stadiumit “Loro BoriçI”. Para tij kishin mbërritur edhe makineritë që do shërbenin për shtrimin e tij. Gjatë ditës së sotme do të punohet intensivisht për shtrimin e tij dhe kjo procedurë mendohet të mbarojë nesër. Ende nuk është përcaktuar qartësisht nëse ndeshja e parë e kampionatit do mund të luhet në këtë fushë apo jo. Kjo do vendoset në ditët në vazhdim, por mundësitë janë të pakta.

/sportishqiptar/

separator

Flamurtari tenton sërish për Ervin Bulkun

Tuesday, August 10th, 2010

Vlonjatët po përpiqen me të gjitha mundësitë për të marrë mesfushorin tiranas

Flamurtari po shkon gjithnjë e më shumë drejt riformatimit të skuadrës për sezonin e ri futbollistik. Prurjet e reja e kanë rritur ndjeshëm optimizmin në stafin teknik dhe te sportdashësit vlonjatë.

Tratativat e njëpasnjëshme të krerëve të klubit për të përforcuar skuadrën me elementë cilësorë, duket se kanë rezultuar efikase. Të paktën kështu duket nga ndeshjet miqësore që kuqezinjtë kanë zhvilluar deri tani. Flamurtari ka fituar dy herë, është mundur në dy sfida, ndërsa tri ndeshje i ka mbyllur në barazim.

Nga ana tjetër, gjatë këtyre ndeshjeve, dhjetë lojtarë të ndryshëm janë provuar në harkun kohor të një muaji. Teksa Magani dhe stafi i tij teknik kanë përzgjedhur më të domosdoshmit. Gjithsesi, krerët e klubit vlonjat nuk mjaftohen me kaq, teksa insistojnë për të bërë edhe dy blerje të tjera, një mesfushor dhe një sulmues. Burime të sigurta pranë presidencës kuqezi informojnë se kanë rinisur për të dytën herë tratativat me mesfushorin e kombëtares sonë, Ervin Bulku.

Për mesfushorin, vlonjatët kanë pasur interesim që para një muaji. Por për arsye të ndryshme, këto tratativa ishin ndërprerë. Sipas po këtyre burimeve, Bulku është kontaktuar me anë të linjës telefonike nga drejtuesit e klubit vlonjat dhe gjatë ditëve në vijim pritet të merret një përgjigje nga ish-mesfushori i Tiranës. Në rast se kjo tratativë mbyllet pozitivisht, atëherë me Bulkun dhe Devollin mesfusha vlonajte do bëhej mjaft e fortë.

Por njëkohësisht do të rritej akoma më shumë konkurrenca në këtë repart, çka do të nënkuptonte edhe shtimin e riskut për disa prej mesfushorëve të Flamurtarit për t’u ulur në stol. Ndërkohë, për sa i përket lojtarit tjetër që pritet të vijë, është një sulmues maqedonas. Për këtë lojtar ende nuk ka ndonjë informacion të saktë.

Por insistimi i drejtuesve të Flamurtarit për ta pasur këtë lojtar tregon se ai është cilësor. Aktualisht vija sulmuese e kuqezinjve përbëhet nga tre sulmues, Xhafaj, Plaku dhe Shehaj. Ndërkohë që vetë trajneri Gugash Magani nuk ka shprehur asnjë mendim për sa u përket këtyre dy lojtarëve, duke mos dashur të prishë atmosferën në ekip.

Çështja “Plaku”, ende e paqartë

Vazhdon të mbetet e paqartë situata për ish-sulmuesin e Tiranës, Sebino Plaku. Drejtuesit e klubit, edhe pse janë të bindur që lojtari do të qëndrojë me Flamurtarin, ata përsëri nuk e thonë me plot gojën. Shefi i klubit, Geri Çipi, rreth këtij problemi u shpreh: “Duhet pritur deri në afatin e dhënë nga disiplina për shlyerjen e pagesave të prapambetura nga ana e Tiranës për sulmuesin. Në rast se kjo gjë nuk arrihet, Plaku mund të quhet plotësisht pjesë e Flamurtarit.

Por unë jam i mendimit se tashmë kjo çështje ka përfundur dhe përpjekjet e Tiranës janë të kota, pasi këtë gjë e dinë vetë drejtuesit bardheblu.” Ndërkohë, dje, sulmuesi Sebino Plaku është paraqitur normalisht në stërvitjen e kuqezinjve, por nuk ka preferuar të shprehet për këtë problem.

/sportishqiptar/

separator

Tirana lë Pukën, sot kthehet në shtëpi

Saturday, August 7th, 2010

Pas një jave përgatitjesh intensive, skuadra e Sulejman Starovës në mbrëmje do të kthehet në kryeqytet

Ditëve të përgatitores së bardhebluve në qytetin e Pukës u erdhi fundi dhe sot “djemtë” e trajnerit Sulejman Starova do të rikthehen në kryeqytet. Pas një jave të ngarkuar stërvitore, të gërshetuar me përgatitje fizike, por edhe tekniko-taktike, sot pas mesditës Tirana do të lërë kampingun e Pukës, aty ku u stërvit për një javë me dy seanca stërvitore në ditë.

Fillimisht kur do të niste faza nga një pjesë e madhe e lojtarëve bardheblu, por edhe nga stafi, ideja “Puka” nuk u pëlqye, por duket se të gjithë tashmë po largohen me kokën prapa, me përshtypjet më të mira për qytetin e vogël verior, jo vetëm për kushtet e stërvitjes, por edhe për akomodimin dhe cilësinë e ushqimit.

Bardheblutë në Pukë zhvilluan edhe një ndeshje miqësore me Tërbunin, të cilën e fituan me rezultatin e ngushtë 1-0, por fituan simpatinë edhe të disa qindra fansave pukjanë. Pasi të zhvillojnë seancën e paradites, kontigjenti bardheblu do të drekojë në mesditë dhe më pas do të marrë rrugën e kthimit për në kryeqytet. Rreth orës 17:00, 24 herë kampionët do të ndalen në stadiumin “Besëlidhja”, aty ku do të luajnë edhe një ndeshje tjetër miqësore me ekipin e Lezhës.

Kjo ndeshje do të jetë testi i dytë për skuadrën bardheblu brenda një jave dhe do t’i shërbejë shumë trajnerit Starova për të testuar edhe të ardhurit e fundit. Me përjashtim të letonezit Silagails, që luajti titullar ndaj Tërbunit, Dushku dhe Hallaçi nuk u aktivizuan ndaj pukjanëve dhe me shumë gjasa sot do të jenë në lojë ndaj Besëlidhjes.

/sportishqiptar/

separator

Josa: Shkumbini të përqendrohet edhe në miqësore

Monday, August 2nd, 2010

Të shtunën Shkumbini u ndesh me Flamurtarin në Ohër të Maqedonisë, ku të dy këto ekipe vijojnë fazën përgatitore. Gjithçka u mbyll në barazim 1-1, ndërkohë që për peqinasit e trajnerit Josa ka qenë miqësorja e parë me një ekip të nivelit të vetë. Më parë janë arritur tri fitore radhazi me rezultate të thella, deri tenistike, por me kundërshtarë inferiorë, ekipe të kategorisë së dytë maqedonase. Sipas tiranasit të stolit bardhekaltër, rezultati i ndeshjes me vlonjatët ishte i drejtë. Ai pranon se u bënë edhe gabime: “Ishte një takim miqësor, që na vlejti, por do të thosha se nuk ishte koha për kundërshtarë kaq të fortë. Megjithatë, jam i kënaqur me gjendjen fizike të lojtarëve. U bënë disa gabime në pasime dhe mendoj se problemi ynë më i madh është se, kur jemi në zotërim të topit, bëjmë veprime të ndërlikuara, ndërkohë që mund ta zgjidhen fare thjeshtë situatën. Gjithsesi, skuadra ka përmirësime të dukshme në harmonizimin e veprimeve sulmuese dhe mbrojtëse,” – tha nëpërmjet linjës telefonike nga Struga trajneri Josa. Ai kërkon që edhe në miqësore ekipi i tij të ruajë përqendrimin dhe të vlerësojë kundërshtarin. “Shkumbini duhet të tregojë karakter në çdo ndeshje, qoftë edhe miqësore. Duhet të luajë gjithnjë për të fituar. Do të kemi edhe miqësore të tjera deri në fillim të kampionatit, ku do të dalë në pah karakteri i skuadrës, që është edhe në traditën e Shkumbinit,” – theksoi në fund trajneri Mirel Josa.

/sportishqiptar/

separator

Blanko: Konkurrenca rrit cilësinë te Dinamo

Saturday, July 31st, 2010

Sipas trajnerit dinamovit Luiz Blanko, Dinamos i nevojiten afrime e reja për të progresuar mes grupit

Dinamo, krahas merkatos së vazhdueshme verore, tashmë do të udhëtojë drejt Sllovenisë për të kryer fazën përgatitore numër 2, pasi një të tillë blutë e kanë zhvilluar përpara performancës në Ligës e Kampionëve. Numri një i pankinës dinamovite Luis Blanko, tashmë është konfirmuar në krye të Dinamos edhe për sezonin 2010 2011. I intervistuar nga mediat e pranishme përpara nisjes drejt Sllovenisë, ai ka komentuar lakimet e fundit të merkatos së Dinamos, duke e konsideruar pozitive konkurrencën në skuadër.

Emrat e fundit që fliten në radhët e dinamovitëve janë luksi, kur bëhet fjalë për Dorian Bylykbashin dhe Ervin Bulkun. Ndërkohë që Blanko komenton edhe miqësoret e luksit ndaj Real Sociedad dhe Palermos, të cilat sipas tij, ia rritin piacën Dinamos, duke ngritur cilësinë dhe përkushtimin.

- Sa ju shërben kjo fazë përgatitore sërish në Maribor të Sllovenisë?
- Janë 8 ditë intensive dhe do të zhvillojmë 3 ndeshje miqësore dhe kjo fazë do të na shërbejë shumë. Flitet për kundërshtarë me infrastrukturë të nivelit të parë dhe ne do të na shërbejë shumë për të rritur cilësinë dhe nivelin profesional. Nuk ka se si të ndodhë ndryshe, kur flitet për ekipe si Real Sociedad dhe Palermo.

- Me çfarë strategjie do të ndërtohet stërvitja juaj atje?
- Skuadra duhet të mendojë për Ligën e Kampionëve, edhe stërvitja, mentaliteti, përkushtimi e gjithçka duhet të bazohen në këtë nivel që të mendojmë për të ardhmen. Sigurisht, në fillim duhet të mendojmë për t’u shpallur kampionë të Shqipërisë, por unë jam i bindur se, duke punuar në ritmet e Ligës së Kampioneve, do të arrihet edhe objektivi në kampionat. Kujtoj që në përballjet me Sherif Tiraspolin patëm vetëm 1 muaj kohë për të përgatitur ekipin.

- Flitet për dy lojtarë të kombëtares. Ju jeni në dijeni?
- Po, jam në dijeni që ata mund të vijnë.
- A i njihni Bylykbashin dhe Bulkun si futbollistë?
- Po, kam parë disa video të kombëtares. Sigurisht, ato nuk ishin aktuale, por më shërbyen për të parë karakteristikat e futbollistëve. Do të shohim cili nga ata do t’i bashkohet Dinamos.
- Konkurrenca në skuadër është negative apo pozitive?

- Për mendimin tim, pozitive. Unë jam për idenë që të ketë konkurrencë, është e vetmja mënyrë që skuadra të rritet në nivel. Nëse dikush nuk është i përqendruar në punën e tij, atëherë ka dikënd tjetër pas shpine që e pret. Ndërkohë, nëse do të kemi vetëm 11 futbollistë, spontanisht futbollistët nuk japin më të mirën e tyre.

- Të kesh disa futbollistë të kombëtares është një luks i madh. A e ndieni diçka të tillë?
- Eshtë luks. Le të jenë edhe 10 futbollistë nga kombëtarja, është diçka pozitive. Gjithnjë është diçka e mirë kur ke lojtarë me nivel teknikë në skuadër. Edhe skuadra me këta elementë funksionon më mirë.

Blanko: Konkurrenca rrit cilësinë te Dinamo

separator

Plaku, “lamtumirë” Tiranës për Flamurtarin

Saturday, July 31st, 2010

Sulmuesi Sebino Plaku është larguar dhe do t’u bashkohet vlonjatëve për sezonin e ri futbollistik

Ka zgjatur vetëm 6 muaj “aventura” e sulmuesit Sebino Plaku te skuadra e Tiranës, pasi ai duket se ka zgjedhur ekipin vlonjat të Flamurtarit për të vazhduar karrierën. Plaku dy ditët e fundit ka pasur një takim me presidentin e Tiranës, Refik Halili, dhe shefin e klubit, Rauf Dimraj, por që me sa duket mes palëve nuk është arritur akordi që bashkëpunimi të vazhdonte edhe për sezonin e ardhshëm.

Dje, Plaku gojarisht ka komunikuar për “Sportin shqiptar”, se do të vazhdojë karrierën te kuqezinjtë e Flamurtarit. “I prita gjatë drejtuesit e ekipit të Tiranës, edhe pse kisha oferta qysh pas mbylljes së sezonit të kaluar nga Shkumbini dhe Flamurtari, mirëpo unë po u qëndroja besnik bardhebluve.

Dy ditët e fundit e kisha lënë për të biseduar me presidentin Halili rreth të ardhmes, mirëpo akordi nuk u arrit. Kështu që tashmë e konsideroj veten pjesë të ekipit të Flamurtarit. Aty më kanë respektuar dhe më kanë pritur gjatë, duke më vlerësuar. Më vjen shumë keq që largohem kaq shpejt nga Tirana, sepse kur firmosa janarin e shkuar, kisha dëshirë që të vazhdoja gjatë me këtë ekipi, duke qenë se është më i miri në Shqipëri.

Megjithatë, të gjithë e dinë se gjërat nuk funksionuan ashtu siç duhet, të paktën muajt e fundit. E mbylla me drejtuesit e Flamurtarit, edhe pse akordi është arritur pothuajse prej një muaj. Mendoj se drejtuesve të Tiranës u kam dalë borxhit, sepse sa kohë që kam qenë aty kam dhënë maksimumin dhe i prita gjatë. Do të shkoj në Ohër për t’u bashkuar me ekipin tim të ri, Flamurtarin,” u shpreh sulmuesi Sebino Plaku.

Në fund ish sulmuesi i bardhebluve, Plaku, lëshoi edhe mesazhin për tifozët e TIranës dhe trajnerin Starova, për të cilët shprehet me mirënjohje dhe konsideratë: “U kërkoj të falur të gjithë tifozëve të Tiranës, sepse më kanë bërë që të ndihem si i shtëpisë, duke më përkrahur në çdo ndeshje. Me kaq kohë që ndenja aty, vura re se kanë qenë dhe do të mbeten lojtari i 12 të i kësaj skuadre.

Gjithashtu, dua të falënderoj edhe trajnerin Sulejman Starova, që po jep shumë për këtë skuadër, madje edhe në periudha të vështira pas kampionatit arriti që të organizonte ekipin. Në mendjen time do të mbetet si një njeri profesionist dhe trajner i madh. Më donte patjetër në skuadër për sezonin e ardhshëm, mirëpo qëndrimi im nuk varej vetëm nga unë.

Po largohem nga Tirana për të filluar një epokë të re, ku shpresoj që t’ua shpërblej drejtuesve vlonjatë dhe këtë sezon të bëjmë konkrete objektivat që kanë për fitimin e Kupës apo titullit. Do të nis një eksperiencë të re me një prej ekipeve me tradita të mëdha në futbollin shqiptar”, tha në mbyllje të fjalës së tij Sebino Plaku, ish sulmuesi i Apolonisë, Dinamos dhe Tiranës në kampionain shqiptar.

Plaku, “lamtumirë” Tiranës për Flamurtarin

separator

Ks Shkumbini Peqin is proudly powered by WordPress
Entries (RSS) and Comments (RSS).
Theme by Spanish Translation US.