Posts Tagged ‘kastrioti’

Caca: Ndihemi të karikuar nga përgatitorja

Friday, August 6th, 2010

Krutanët vazhdojnë stërvitjen në Ohër të Maqedonisë

Skuadra krutane mund të qëndrojë deri më 15 gusht në Ohër të Maqedonisë. Ndërkohë që stërvitja po zhvillohet me ritme të kënaqshme, po ruhet i njëjti regjim stërvitor, ku futbollistët janë të detyruar t’u nënshtrohen dy seancave stërvitore në ditë. Një sforcim i tillë vjen pasi skuadra krutane e ka nisur pak me vonesë fazën përgatitore. “Jemi të mbingarkuar për arsye që tashmë dihen. Po zhvillojmë një fazë përgatitore mjaft të mirë dhe tejet profesionale.

Një grumbullm i tillë, përveç fitimit të parametrave fizikë, ka edhe një avantazh tjetër, pasi forcojmë dhe konsolidojmë dhe më tej marrëdhëniet me njëri-tjetrin, aq të domosdoshme për ecurinë e skuadrës për më tej,” do të shprehej për gazetën “Sporti shqiptar” ish kapiteni i krutanëve gjatë fazës së parë të kampionatit të kaluar, Fatmir Caca, që rikthehet te skuadra “mëmë”. 26 vjeçari Caca, pas një përvoje 6-mujore te Teuta, mendon se ardhjet pranë Kastriotit jo vetëm që i bëjnë mirë forcimit të ekipit, por shtojnë dhe më tej dhe konkurrencën, për të cilën, siç pohon edhe vetë, nuk i trembet, por e nxit për të qenë në parametrat maksimalë.

“Skuadra nga dita në ditë po e ndien peshën e futbollistëve cilësorë. Të gjithë duhet të jemi koshientë se fitimi i vendit në formacion arrihet në sajë të punës dhe këmbënguljes individuale. Të jeni të sigurtë që Kastrioti i sivjetëm do të jetë më i fortë se ai i sezonit të kaluar.

Argument për këtë është fakti grupi i futbollistëve, që është jo vetëm më cilësor, por dhe më kërkues në realizimin e objektivave personalë,” do të shprehej mbrojtësi krutan. Ndërkohë, krutani Caca komenton dhe kalendarin e kampionatit të ri, duke përfunduar: “Ndeshja miqësore ndaj vlonjatëve ishte e para dhe natyrshëm vështirësitë janë të pranueshme për një skuadër që është në kulmin e ngarkesës stërvitore.

E rëndësishme është që skuadra jonë është drejt konsilidimit dhe gradualisht do të arrijmë edhe harmonizimin e grupit, një element mjaft i rëndësishëm për një skuadër që kërkon të jetë mes më të mirave të kampionatit. Kalendari? Mendoj se të gjitha ndeshjet do të jenë të vështira. Duhet të hiqet mendimi i skuadrave të vogla apo të mëdha. Të gjithë jemi të barabartë.”

Mbërrijnë dy mesfushorë rumunë

Skuadra krutane kërkon ende të surprizojë në afrimin e futbollistëve cilësorë. Madje oreksi i saj ka shkuar përtej kufijve të vendit. Prej ditës së martë pranë skuadrës janë afruar edhe dy futbollistë rumunë. Dje ata kanë marrë pjesë në seancën e parë stërvitore nën urdhrat e trajnerit Ramazan Ndreu. Futbollistët Marius Roman dhe Andrei Mutulesku, që të dy luajnë në rolin e mesfushorit, repart të cilën skuadra krutane e ndien më shumë të nevojshme për t’u fuqizuar.

Pretendohet se dy futbollistët e sapoardhur të jenë aktivizuar me skuadrat cilësore të kampionatiti rumun dhe thuhet se ka qenë pjesë e skuadrës së Steaua të Bukureshtit. Ndërkohë, që dje është larguar nga ekipi i Kastriotit edhe kroati i fundit, Boris Bakoviç, i cili siç duket nuk e ka bindur trajnerin e skuadrës, në ndeshjen me Bylisin, fituar nga skuadra krutane me rezultatin minimal 2 1.

/sportishqiptar/

separator

Kroatët nuk “ia mbushin syrin” Ndreut

Wednesday, August 4th, 2010

Kastrioti, pas provës, largon futbollistët Marko Radoviç, Boris Bakoviç dhe Denis Lonçar

Tre kroatët e ardhur te skuadra krutane janë larguar dje paradite. Një gjë të tillë e bën të ditur trajneri i skuadrës krutane, Ramazan Ndreu. Në fakt, trajneri krutan e kishte planifikur largimin e tyre qysh të dielën paradite, por biseda e zhvilluar midis tyre e ka detyruar stafin drejtues krutan që t’u jepte dhe një mundësi tjetër kroatëve të ardhur për të parë afësitë e tyre.

Ndeshja miqësore ndaj vlonjatëve i shërbeu stafit krutan për të marrë një vendim të menjëhershëm: largimin e tyre nga skuadra. Bëhet fjalë për dy mesfushorët, Marko Radoviç, që ka qenë pjesë e Rijekës në sezonin e kaluar, Denis Lonçar dhe sulmuesin Boris Bakoviç, që janë aktivizuar me skuadrën e Zagrebit. Kreu i pankinës krutane, duke folur për gazetën “Sporti shqiptar”, mes të tjerash do të shprehej: “Kroatët të ardhur te skuadra jonë nuk ishin në lartësinë e duhur dhe, për rrjedhojë, vendosa largimin e tyre.

Provë për ta ishte ndeshja ndaj vlonjatëve, ku paraqitja e tyre ishte mjaft zhgënjyese,” do të shprehej trajneri krutan, Ramazan Ndreu. Bashkë me treshen kroate janë larguar dhe katër kosovarët, të cilët u mendua se do të plotësonin strukturën e skuadrës për edicionin e ri futbollistik. Largimi i tyre është bërë dje paradite.

Ndërkohë, stafi drejtues është në pritje të futbollistëve të tjerë. Sipas trajnerit krutan, mësojmë se shpejt pranë skuadrës do të vijnë dhe dy sulmues të tjerë po nga Kroacia, dhe ndërmjetësues është sërish sulmuesi tashmë i konfirmuar, Ivan Babiç. “Duke qenë se futbollistët e ardhur nga Kroacia na rezultuan të panevojshëm, mund t’ju them se së shpejti radhëve të skuadrës do t’u shtohen dhe dy sulmues, një prej tyre shtatlartë. E thënë shkurt, ne jemi në kërkim të një sulmuesi, siç thuhet në të tilla raste “sulmues race”. I presim që të na vijnë sa më shpejt të jetë e mundur.

Sa më shumë kohë të kalojë, në dëmin tonë është,” thotë trajneri Ramazan Ndreu. Ndërkohë, kreu i pankinës krutane flet me nota pozitive për skuadrën që po stërvit, duke bërë njëkohësisht edhe komentin e ndeshjes ndaj vlonjatëve.

“Jam i kënaqur me ecurinë skuadrës deri më tani. Futbollistët kanë përkushtim në marrjen e ngarkesave fizike. Për ndeshjen me Flamurtarin mund t’ju them se në përgjithësi jam i kënaqur. Vend për përmirësime ka. Ishte ndeshja e parë dhe mendoj se gradualisht do të shënojmë progres,” do të shprehej duke përfunduar trajneri Ramazan Ndreu.

Kastrioti, sot prova e dytë ndaj Bylisit

Sot, në qytetin e Ohrit, skuadra e Kastriotit do të zhvillojë ndeshjen e dytë miqësore ndaj Bylisit, një prej rivalëve të krutanëve në këtë kampionat. Ndërkohë, sipas trajnerit Ramazan Ndreu, mësojmë se ka të ngjarë që skuadra krutane të zhvillojë edhe një tjetër ndeshje miqësore ndaj Vllaznimit të Gjakovës, e cila po e zhvillon fazën përgatitore në shtetin fqinj.

/sportishqiptar/

separator

Presidenti Djala: Jam i kënaqur nga ky Kastriot

Monday, August 2nd, 2010

E veçanta e krutanëve në stërvitjet e deritanishme në Ohër ka të bëjë me atë që pranë skuadrës po qëndron presidenti Artan Djala, që në këtë merkato vere është i interesuar që ta mbyllë sa më parë kontigjentin e futbollistëve të tij, për ta lënë më pas të qetë trajnerin Ndreu të punojë me të tijtë. Pranë skuadrës në Ohër “bosi” i krutanëve, Djala, është shprehur tepër optimist për skuadrën e tij, teksa do të theksonte: “Deri tani jam shumë i kënaqur, sepse kemi bërë afrime vërtet cilësore. Duke filluar që nga Alikaj dhe për të vazhduar më tej me Muçollarin, Çaushajn, Djarmatin etj., të cilët do të jenë baza e skuadrës ku do të mbështetet Kastrioti për sezonin e ri. Ndodhem këtu në Ohër, pasi prania ime i obligon më shumë lojtarët, të cilët jam i bindur që edhe me afrimet që kemi kryer, kanë krijuar një grup me të vërtetë të fortë. Detyra ime është që t’i sjell trajnerit sa më shumë lojtarë cilësorë dhe këtë besoj se e kam kryer në mënyrën më të mirë deri tani. Do të vazhdoj të financoj për Kastriotin, pasi ne mendojmë që në sezonin e ri jo vetëm të jemi surpriza e superligës, por edhe një ekip i denjë për të gjitha skuadrat që synojnë kreun. Nuk mund ta fsheh objektivin, pasi jam i të njëjtit mendim me trajnerin Ndreu dhe do të jem i kënaqur nëse ekipi do të renditet në gjashtëshen e parë të superligës. Ia kam krijuar të gjitha kushtet e nevojshme ekipit dhe presim që t’i kënaqim së shpejti të gjithë tifozët krutanë, që mezi presin ta shohin ekipin e tyre të zemrës. Kemi kohën e nevojshme deri në fillimin e sezonit të ri dhe jemi duke mbyllur kontratat e fundit me lojtarët që kanë mbërritur këto ditë. Ndoshta me një ose dy afrime, merkatoja do të quhet e mbyllur, por këtë më mirë se kushdo tjetër e di trajneri Ndreu. Unë kam për detyrë të financoj dhe atë po bëj, ndërkohë që futbollistët duhet t’i shtrohen punës, gjë që ka ndodhur më së miri deri tani. Kastriotin do ta shikoni shumë shpejt,” – përfundon prononcimin e tij për gazetën nga Ohri presidenti i Kastriotit, Artan Djala.

Kastrioti sot me Flamurtarin, të mërkurën me Bylisin
Java e parë e përgatitoreve në Ohër u mbyll pa ndeshje miqësore për krutanët, ndërkohë që duhet theksuar se java që nis sot do të fillojë me ndeshjen e parë miqësore. Sipas stafit teknik, është rënë dakort që sot, pra të hënën, Kastrioti të luajë ndeshjen e parë miqësore me Flamurtarin, ndërkohë që të mërkurën ekipi do të luajë me Bylisin. Të paktën këto do të jenë dy takimet e para miqësore, pasi në ditët në vazhdim Ndreu mendon që të zhvillojë nga një ndeshje testi në tri ditë. Kjo do të tregojë qartë gjendjen e të tijve, por edhe vlerat e lojtarëve që janë afruar së fundi te Kastrioti, që duket se do të jenë edhe disa ditë të tjera në provë.

/sportishqiptar/

separator

Ks Shkumbini Peqin is proudly powered by WordPress
Entries (RSS) and Comments (RSS).
Theme by Spanish Translation US.